Madr Jane Mary Pinto

विकिपीडिया कडल्यान
Jump to navigation Jump to search

Madr Jane Mary Pinto 1941 vorsachea May-achea 7ver Milagres A. Pinto ani Annie J Cruz hancea ghorabeant Afrikentlea Kenya desant zolmoli. Ticho Avoy-Bapui Saliganvchim, pun ticho Bapui Afrikek British sorkari xikxonnik khateant vavurtalo. Jane 6 vorsanchi astana tichi Avoy apleam bhurgeanchea xikxonnacho fuddar polleun goyant aili. Apli Avoy sodanch amkam ratchi nidchea velar Santam-Bhoktancheo khobro sangtali teo aikun mhaka-I ek santinn zaum-xem distalem mhonn Madr Jane sangtali. He porim tika madr zavpachem apovnnem ailem.

Tichem poilem xikop Saliganvchea iskolant zalem. 15 vorsanche pirayer astana ti Navelechea Perpetual Succour Konvent bhitor sorli. Chowgule Kolejint ani uprant Karmel kolejint xikop kelem. 1961 vorsa Junhace 10ver tinnem Sankvalleche Sonvsthent Dharmik Angovnneo korun ‘Mary Jane’ hem dharmik nanv ghetlem, Batizman dil’lem nanv ‘Rita’ aslem. 1966 vorsa Mayache 13ver tinnem Xasvott Angovnneo keleot. 199 vorsa tika Navelechea Perpetual Sucour iskolachi headmistress nemli hi seva tinnem 1984 porian keli ani xikxonnik molar zaitem sudarop kelem.

1984 vorsa tika Sankvallechea Holy Family of Nazareth Sonvsthechi Xrextt Vhoddil zaunk vinchun kaddli. He sevechi zobabdari tinnem don pavtti 1996 voros porian choloili. Hea kalla modem Sonvsthechim zaitim misanvam ani kendram tinnem ugoddlim ani aplea madrink dhaddleo. Ti durbollanchi Avoy porim vavurli, Baina Vasku tinnem zhompdeamni ravtolea durbollanchi seva suri keli 1986 vorsa Birla zuari Nagar Somajik Vavrachem Kendr sthaplem toxench Baina xindullki vattarant klinik ugoddlem. Aplem karya Jezuche xikovnnecher tharavun choloilem.

Madr Mary Jane Pinto-l Ostoriam ani Bhurgeam Vikasachea Kendr Montralayan 2014 vorsacho “Rajyo Mahila Samman Puroskar” 2015 vorsa, Marsache 8ver, Ontor’raxttrik Ostoranchea Disa bhettoilo. Tinnem oxem mhollem : “ hi seva titli sompi nhoi, tori hanv mhoje kodde zaisor hanv korit ravtolim. Khorench Madr Jane xevott porian urbhen vavurli; tichi urbha kednach thambli na. dusreankui tinnem urbhen bhorle.

1997 vorsa Mumbaint ek xibir zalem taka ti hajir asli. Tea xibirant Bondkhonninchi Odhikarin Xmti Kiran Bedi-n hajir asloleank bhaxon kelem. Bondkhonn mhollear khastichi svat nhoi bogor jivit bodolpachi svat mhonn dkhoilem. Bondkhonnint asloleank bhorvanxachem jivit dium yeta mhonn Xmti Kiran Bedin iskuttailem tem aikun Madr Jane-n apunnui tench kam’ kortolim mhonn nichev kelo ani Sonvthechem Xrextt Vhoddilponnacho karya-kall somptoch Prison Ministry-chi seva apnnaili. National Directorate of Prison hache boskek hajir zali thoim Fr. Varghese Karippery National Prison Ministricho directoran mon’xacho jiv kaddpacho nhoi bogor konixttayen aslolea niraxanchea jivitak pekhounni divpachea magacho bomb ghalpachi goroz asa mhonn sanglem. Tedna thavn Madr Jane-k he sevechi prerna ani atmik boll mell’lem.

1997 vorsa Bharoti dharmikanche Porixoden (CR) Bondkhonnichi Seva suru korunk maglem ani Madr Jane-k Co-ordinator’ nemli. He Seve khatir Dezembrache 18ver 15 zannancho Ekvott ghoddun Aguadche Bondkhonnint Natalanchi Karyavoll keli. Thoim asloleamni sontosachim dukham golloilim ( Survatek hi seva Pilarche Sonvsthe khal choltali tedna hanv vantto ghetalom).

Hi seva odik nettan fuddem vochunk 2002 vorsa Madr Jane Pinto-n Goychea Caritas Sonvsthe khal aplo ekvott Bondkhonnichea kaidea pormannem Registered kelo. Uprant tichea fuddariponna khal he sevechem mhotv vaddlem. Ti zaitech pavtti Aguad, Vasku Sadda. Moddganv ani Mhapxam bondkhonnink bhett ditali. Bondkhonnit asloleank sobar torecheo vostu korunk tinnem xikoilem, undde bazunk ani her khavncheo vostu korunk dakhoilem. Tea bhair tinnem NOS, IGNOU ani Yeswant Rao Chaven Vidyapittant nond korun bondkhonnint asloleam zaiteam zannamni SSC ani 12vi porian pas keli ani graduation legun kelem. Ti Diosezan Women’s Desk hanchi vangddin asli.

“Jem tumi mhojea lhanantlea lhan bhavam bhonnink kortat tem khorench mhaka pvalem” (mt. 25:40). Him Jezuchim utram tinnem apnnailim ani jivitant tim pall’lim. Khorench nirdhareank ani bondkhonnint asloleam niraxeank ti bhorvanxacho foler zaun zaitea zonnanchem jivit uzvaddit kelem. ‘Prison Ministry’ – Bondkhonninchi Seva aplea hatant ghetoleak aplem jivit teach vavrak khorchilem.

Tichea tonddar amburko hanso khelltalo, Avoyponnachem kalliz tichem. Jivit sodanch sadem, teach sadeponnan tinnem zaitea lokachim dukham puslim, dukhovloleank buzvonnen vengoilim, vegllozar korinastana soglleank apnnailim. Hem sogllem amkam tichea mornna disa ugddapem disun ailem. Devan kherit apovnnem tika dil’lem, tea pormannem ti jieli ani jielea toxi ti sorgaveslean ufeli.

Madr Mary Jane Pinto, Abrilache 20- ver, 2016, sokallim Navele Madrinchea ghorant Devadhin zali. Tichi piray 75 vorsam asli. Tichi mornna vidi dusrea disa sanjechea 3 vaztam Naveleche Igorjent zali. Khup lok an isobar sonvsthancheo madri hajir asleot. Goyche Diosezan Dharmik Sonvsthanche sumar 70 odik padrimnni Arsebisp Filipe Neri Ferrao sangata dhin’vasnnechem Miss bhettoilem. Hi dhin’vasnni tichea urbhevont jivita khatir. Fr Valerian Vas-an provochon kelem ani Misa uprant Arsebispan nimnnim magnnim orpun tichi kudd nikhipili.

Hoi, Madr Jane amche modli geli khori, pun ticho punnyatmo tiche Sonvthechea madrink toxench tichea soglleam ixttank odik korun ‘Prison Ministry’ kortoleank kherit sfurti ditolo.

Polleiat[बदल]

ह्या विषयावयर देवनागारींत बरयिल्लें पान वाच : [[ ]]
"https://gom.wikipedia.org/w/index.php?title=Madr_Jane_Mary_Pinto&oldid=169955" चे कडल्यान परतून मेळयलें