Monsignor Herculano D. O. Xavier Gonsalves

विकिपीडिया कडल्यान
Jump to navigation Jump to search

Monsignor Herculano D. O. Xavier Gonsalves[बदल]

Kallam-kalla modem Dev aplo vavr fuddem vhorunk aplea sevokank vinchun kadda ani tanche koddlean to vavr sufollyek pavoita. Msgr. Herculano Cana Bannavle ganvant 1868 vorsam Febrerache 11ver Remedios Santana Gonsalves ani Angela Fremiot Maria Amarante hancea dekhivont ghorabeant zolmolo, lhan vhodd zaun Raiturche Seminarint padriponnachem xikop kelem ani 1891 vorsa Setembrache 19ver taka Prodhan Sevokachi makhnni dili ani Dezembrache 17ver 1892 vorsa Padrponnachi makhnni Bom Jezuche Igorjent Adlea Goyant Patriak D. Antionio Sebastiao Valenten dili. Fr. Herculano Gonsalvesan aplem Poilem Mis Raiturche Igorjent Dezembrache 22ver bhettoilem.

Padri zatoch poilech pavtt 1893 vorsa Kalanguttche igorjent Povitr Brestara dis Jezu Kristache vhoddle khaltikayecher sermanv kelo ho sermanv ednache O Crente potrar (ank Abril 12, 1893)uzvaddaillo mellta. Hea sermanva vorvim Fr Herculano Gonsalvesan khaltikayecho xegunn apnnaillo mhonn disun yeta. Ho xegunn to moro porian jielo. Jem dusreank xikoita tannem aplea jivitant poilem pallunk zai, hem tachea jivitachea kornneamni porzolllem. Aplem jivit khorchun, Devachea onodak ani gorjevontanchea ani onathanchea boreponna khatir jiello.

1893 vorsa Junhan taka Daman diosezint dhaddlo, thoim taka thoinche seminaricho profesor ani atmik direktor nemlo. Tachea borea vavra khatir taka 1898 vorsa Damancho misionar nemlo. Dabul (Mumbai) igorjent ravunk gelo ani 1918 taka to kur nemlo, teaa kallar re firgojent 25 hozar Katolk lok aslo, tanchi atmik korunk kitlech padri astale. Fr. Herculano lokachim kazaramcho karbhar polletalo. 1923 vorsa taka Sonapur dhaddlo, thoim tannem cheddvam bhurgeank iskol ugoddlem. Toxeoch tannem zaitio zobabdario choloiliot. Goyant yetoch 1930 vorsa taka Kalangutt Vigar nemlo, thoim tannem onathghor ugoddlem, 1931 vorsa Little Flower of Jesus iskol suru kelem. 1932 vorsa taka Ghatar aslolea igorzancho Vigar Jenral nemlo, Belgaum thanv taka edo vhoddlo vattar polleuncho poddtalo, jevnna-khannache tras, ravpache tras kheddea ganvamni seva keli. Hi zobabdari 13 vorsam choloili.

1934 vorsa Setembrache 19ver tannem vhodd kamachi buniad ghali, Goyant Madrinchi Sonvstha sthapunchi yevzonn tachea monant yevzoli. Dekhun tannem Pia Uniao das Irmas de Sto. Alexio hea nanvan ek cheddvancho zomo ghoddlo. Tanchi atmik toyari korun 1935 vorsa Janerache 16ver Novisiad suru kelo. Poilea 8 sisterimni Setembreache 8ver 1937 vorsa Poilo Dharmik Bhasavnnio keliot. Tancho bapui kozo tannem tanchi seva kelo, tankam atmik ani her margdorxonn dilem 1946 vorsa thavn to Kallangutt yevn tanchea konventant ravlo. 1947 vorsa taka Baravea Pio Pap Saiban Papal Chmberlain Monsignor kelo. 1949 vorsa hea madrinche songhottnnek Canonical Erection korun Dharmik Sonvsthecho dillo Msgr. Herculano Gonsalvesan pollelo. Az hea madrink Handmaid of Christ (Kristachio Dasi) mhonnun vollkhotat, tancho iskolam ani ajilam choltat. Jezucho mog tim xikxonnnik ani somaji seventlean vistarunk vavurtat. Xekim 52 vorsam Somiachea molleant seva korun jivitachia 82 vorsanchi yatra vhodde xantin Marsache 22ver, 1950 vorsa sompoili ani sorgvaxi zalo. Punn tachio kornniom, tachim utram, tachem jivit aiz omor zalam.

"https://gom.wikipedia.org/w/index.php?title=Monsignor_Herculano_D._O._Xavier_Gonsalves&oldid=172007" चे कडल्यान परतून मेळयलें