Raia
| |
Romi
|
Raia, Konkani bhaxent chodd-xe Rai, ho Bharotantlea Gõy rajyachea Dokxinn Gõychea Saxttintlo ek boroch vhodd ganv. To ek xetam-maddamni, dongor-dongurleamni, zhori-tolleamni nettlolo sobit vatthar. Tachi sumar 15000 loksonkhea asa. Kristi lokancho xek aslolea hea ganvant Hindu ani Muslim lokui ravtat. Halinche kallar onGõykar lok thoim vostek aslolean tachi loksonkhea 18-20 hozarancher pavlea. Raia ganv Ut'torek Camurlim, Udentek Rachol, Dokxinnek Moddganv Nogorpalika ani Ostomtek Nuvem ganvamni rovoddlolo asa.
Raia mhonnlear Rajancho ganv. Gõy rajya sumar 450 vorsam Purtugezanchea xekatolla aslem. Teche adim Raia ganvcher zaitea razamni rajya kelem oxe purave melltat. Dekhunuch ghoddie hea sobit vattharak Raia mhonn nanv poddlem. Atanchem Camurlim ani Rachol, he adim Raia ganvche probhag asle. Loksonkhea vaddli ani kallan tache kuddke korun Camurlim ani Rachol heo don noveo ponchayoti ghoddleo. Tachi vaddti loksonkhea polleun to anikui vanttcho asa oxem dista. Arlem ani Manora he don vadde Onusuchit Zomat loksonkhenche asat. Hea donuch vaddeant 11 ward-anche ponchayotint sadde chear ward yetat. Dekhun he donui vadde atam novi ponchayot ghoddpachi toyari kortat.
Neves Saibinn
[बदल]Neves Saibinn hi Raia ganvchi patron. Agostache 5ver vhodd ghonnghonnan tichi porob zata. sorbhonvtonnche ganvche lok he porbek hajir ravun Raia ganvchea lokam modim ek vegllich khuxalkai nirmann kortat. Teach disa mon'xachea koxttan roilolem poilem konnos katortat ani Devachea manak omptat. Purai Gõyant konnos katorpachi prokria poili Raia gavant ghoddta, dekhun Neves Saibinniche porbek Konnsanchem Fest mhonnunui vollkhotat.
Ganvak nam'nna haddpi Raikar
[बदल]Raia ganvant vhodd vhodd monis zolmole. Rajki mollar tor Raia ganv khub famad. A vorg ponchayot aslolea hea ganvant montri khasdar amdar zaun gele. Eduardo Faleiro, Alex Sequeira, Luis Alex Cardoso, Antonio Gaunkar he rajya panvddear gazlole rajkarnni. Antonio Gaunkar Manuel Cardoso, Costa Pereira, Savio Gomes, Flory Monteiro, Rumaldo Gonsalves, Nazareth Gomes, Xavier Fernandes he hangache Sorponch zaun gele. Raia ho padrincho ganv mhonntat. Fr. Santan Faleiro, Fr. James Torris, Fr. Agnel Pinheiro, Fr. Richard Pinheiro, Fr. Orlando Luis, Fr. Quadros ani her padrimni hea ganvchem nanv Gõyche Diocesek sodanch voir dovorlem. Vincy Quadros, Marcos Gonsalves, Tarkeshwar Naik, Roque Dias sarke Konknni borovpi kirlole. John D' Cruz, Joseph Quadros sarke khellgoddeamni purai Gõyak sonvsarachea pavddear unchlea zagear dovorla. M. Boyer zorui Raicho naslo punn tannem Raia ganvant aplem ghor bandlem ani tiatr mollar Raichem nanv voir kaddlem. Aristis Dias, Lucian Dias, Roque Dias, George Fernandes, George Coelho, Caitan Fernandes, John Quadros, Vincy Quadros, Caetano D'Souza Nicolau Monteiro, Fulgencio Gaunkar sarkea kolakaramni Raichi rongmachi gazoili.
Mhotvacheo Khunna
[बदल]Ganvchea modekar Neves Saibinnichi Igorz ubi asa. Tika tenkun tichea asrea khal cholpi Our Lady of Snow High School asa. Iskolache bhazuk Raia Bhou-ud'deik moidan ani vosro asa. Ek Kilometr mukhar St. Thereza's Konvent asa Manora ganvant ek moidan asa ani taka tenkun Manora Vikas Kendran ubarlolo prokolp asa. Tachem kam' azun purnn zaunk na punn fuddlea vorsak thoimsorui ek vosro yevpacho asa. Manorachem Monserrat Saibinnichem Kopel ani Arlem-chem Libramento Saibinnichem Kopel Raia ganvche don okhondd dhormik khambe oxe. hea ganvant Santemol, Arlem, Uzro, Solva hanga Hindu devllam asat ani Arlem hanga Muslimachem Masjid ani Madrasa iskol asa.
Her Vixex Khunna
[बदल]Raia ganvant sobit zhori asat zoim lok gormechea disamni nhann gheunk vetat. Xetank lagun tor Raia ganv khub famad. hea xetkarank adhar korunk Neves Xetkari Songhottna ghoddlea jicho vavr chalu asa. Raia ganvak tenkun aslole Rachol Seminacho entrad mhonnlear Raia ganvchem ek akorxonn asa. Novo kel'lo chovpodri rosto Raia ganvche yeradharichi bori zotnai gheta. Manora ganvant ek ontor-rxttri Catering Kolej rup gheta.