Mogachem Dusrem Rup

Borovpi : Vincy Quadros

‘Ghoooooo’ korun pavs ailo ani mathear aslolo bhoro gheun sumar 60 vorsanchi Sumitra dhanvot durgant bhitor sorli. Boro thoinch uddoilo ani bhizot ghorant dhanvli. Vaddloleo dhapo nivllavpak tinnem matso visov ghetlo. Bolkanvacher bosun aslolo avoychea mogacho ticho put Shashikant tika churchurtalo punn tachean kainch zainaslem. 25 vorsancho manãy zalolo, tori avoy-bapay kustar jevtalo. Ghorantli poristhiti taka kollttali punn kitem kortolo? Neturle tacho ganv, mhollear ranuch tem. Xetant vochpachem, zhaddam kap’pachem, maddar vochpachem oslench kam’ mellttalem jem taka korunk naka aslem. Tache boraborcho eklo osoch ganv soddun xarant gelolo ani to borem zoddttalo. Hakai tich goddi lagloli. “Hanv dhaktte mavxeger Moddganv vochunk sodtalom, Mavso sorkari nokrek asa, dovortolo khoim tori.” Tannem aple avoy fuddeant bosot sanglem. Tinnem tacher ek barik nodor marli. Aiz Chondrim’ khoinchean udelo kai mhonn ti chintunk poddli. Sanjer jevtanam tinnem aplea ghorkarachea kanant hi khobor ghali. To toyar zalo.

Te pormannem sokalli utthun don nog kopdde gheun to Moddganv ailo. Sumitran taka mavxecho Fatorddecho pot’to boroun dilolo. Sorkari sevok zal’lean khub zannank mavxachi vollokh asli. Kadomba Bos Thannear tacho pot’to dakhoilo tednam bosvalean taka sarko Fatorddechea P.W.D. ofisa koddem denvoilo. Gonvllivaddear tanchem ghor. To rokddoch tanger pavlo.

Donpar zaloli. Mavxi bhitor randtali. Tannem bel vazoili. Bel aikun ti bhair aili ani Shashikantak polleun ojap zali.

“Are Shashi! Okosmat oso? Sogllim bori asat mure? Yo yo bhitor yo.” Mavxen taka boro yevkar dilo. Taka borem dislem. “Bos” mhonnit ti bhitor geli ani glas bhor udok gheun aili. Itlea vellachea provasan thoklolea Shashikantan ghottaghott udok sompoilem. Mavso jevnnak ailo tednam Shashikantak polleun to-i ojap zalo. Titlem mhollear tanchim bhurgim kolejintlean ailim. Vhoddlem Nimisha baravek xiktalem ani dhaktto Anil dhavek aslo. Tim-i taka polleun ojap zalim. Khub tempan taka pollelolo. Halinchea vorsamni bhurgeanchea obheasak lagun soglleank veost dovorlolim. Iskolant obheas, ghorant obheas ani tea bhair ttuixon, bhurgim jam’ zaun vetalim. “Koslem-i kam’ aslear polle re mavxa, ghora koddem….” Jevtam jevtam tannem man pondak ghalun sanglem. Mavso aikunkuch urlo. Punn kaim uloilo nam. Bhurgim mat taka motte dolle korun polleunk laglim. ‘Tuka hanv kam’ polletam punn tunvem ek lokxant dovorchem poddttolem. Tuka xikop chodd nam, dekhun kam’ lhan vhodd asum-ieta. Kosleim kam’ iman’daren ani nixtten kelear kainch vaitt asonam ani koslench unneponn disonam. Kortolo mure?” Mavxean hansot vicharlem.

“Hoi, koslem-i kam’ korunk toyar asa hanv punn thodde dis hangach ravtolom.” Portun man pondak ghalit Shashikantan sanglem.

“Hem anik sangop zalem? Tujench ghor mure hem.” Aplea bhurgeancher nodor marit mavxen mhonnlem. Tannim-i manen hoikar dilo. Shashikant khuxal zalo. Dusrea disa mavso Shashikantak gheun Fatorddechea Sharda Restaurant-ant gelo. Taka eka veittorachi goroz asli. Patranv mavxeak vollokhotalo dekhun Shashikantak tannem tednanch nokrek dovorlo.

Shashikantan rokddench kam’ samball’lem. Her veiottoram koddem ixttagot keli. Mon lavun giraikachi seva korunk laglo. Tachem kam’ polleun patranv tacher khux zalo. Rati koddem ikram poilim ghora vochunk mellonam hich ek oddchonn asli punn poilea disa tannem kamacho anond bhoglo. Mavso taka just vellar vhorunk ailo.

Oxech Shashikantan hansot-khellot dis sarle. Kaim pavtti borem ttip mellttalem. Modem don-tin pavtti to ghora vochun ailo ani aplea koddem aslole poixe avoychea hatant ghale. Ti-i khuxal zali. Ek dis 4 zann tornatte eke choliek gheun Restaurant-ant aile ani soroll A/C rumant gele. Sumar 10.30 voram mhollear te borech piyele ani eklo te cholie koddem mosti korunk lagle. Tea vellar tea rumantlem sogllem giraik bhair sorlolem. Her taka addaunche bodla takach tenko diunk lagle. Ti choli babddi veakull zaunk lagli. Shashikant jednam tanchem bil gheun bhitor gelo tednam te cholien okosmat Shashikantacho hat dhorlo ani tache fattlean ubem ravlem. Te soglle Shashikantak ghurunk lagle. Shashikantan bil mezar dovorlem ani te choliek bhair gheun ailo Gol’lear bosun aslolea patravank ghoddloli gozal sangli. Patranvan choliechi khobor ghetli. Choli tachea vollkhicheachi aslem. Patranv tea tornatteam fuddeant gelo. Tankam ragan pollele ani oslim kortubam adhartanam porot oxe khoimsorui sampoddlear pulisent ditolom mhonn dhomki diun bhair ailo.

Uprant patranvan Shashikantak apnnali skuttor dili ani te choliek pavounk dhaddlo. Tachem nanv Sandhya. Tem Chowgule Kolejint baravek aslem. Sadaronn familintlem gunnest bhurgem. Tachem ghor Housing Borddant aslem.

“Hanv nokllo aslem te tovnas bhurge mhonn. Amchea ganvche te. Tea soglleanchim nanvam hanv papak sangun ditam. Tuka khas Dev borem korum.” Sandhyan vetam vetam mhonnlem. Poilech pavtt eke choiliek aple borabor skuttoricher bosoilolem mhonn taka bhirant disloli. Punn sovka sovka to somadhani zalo ani tannem taka surokxit ghora pavoilem. Restaurant-ant kitem ghoddlam tem kitench kollunk dilem nam. Boreach disam uprant eke sanjer to kamak vochunk bhair sortanch Sandhya tanger ailem ani Shashikantak polleun ojap zalem. To-i ojap zalo. Tem Nimisha borabor xiktalem ani takach mellunk ailolem. Don dis zor ailolean tem kolejik vochunk naslem mhonn Sandhya tache khobrek ailolem. To taka hanslo ani kamacho vell zalo mhonn cholunk laglo.

Shashikant vetam vetam tache vixim chintunk laglo. Tem polleunk sobit aslem. Te rati tannem taka sarkem polleunk naslem punn aiz…… prokott uzvaddant tem tachea samkar aslem. ‘Tem mhaka avoddlam vhoi?’ Tannem Restaurant-ant bhitor sortanam apnnakuch prosn kelo ani aple kopdde bodlunk laglo. Giraik azun yeunk lagunk naslem. Shashikant toyar zaun bhair ailo. Pollet zalear Sandhya tache mukhar aslem ani tem takach mellunk ailam mhonn patranvan sanglem. To anik nervoz zalo. Sandhyan taka koddek apoilo.

“Tea disa tunvem mhojer itlo upkar kelo ani aiz hanv chukun tujea ghora koddem pavlem, matso boscho tori aslo mure.” Sandhyan aplo opekxabhong zal’leacho taka sanglem.

“Mhozo vell zal’lo nhi? Kamam koddem nixtta dovorchi poddtta.” Shashikantan sanglem.

“Nimishan tuji soglli khobor sangli mhaka. Faleam tukach mellunk yetolem hanv tumchea ghora koddem, sokallim 8.30 vorancher…..” Tem kuxin sorlem ani ekdom’ skuttor chalu korun gelem. Shashikant taka polleunkuch urlo. Patranvan gol’lear ravun “tachea mogan poddlo kitem re?” mhonn fokanddam keli. Tannem hat fafddit ‘kaim nam’ mhonnun ailolea giraikachi to seva korunk laglo.

Atam to ekloch kamak yetalo ani vetalo. Restaurant laginch aslolean taka bhirant disonasli. Donparchem toxench ratchem Restaurant-ant tankam jevonn mellttalem dekhun mavxek vhoddlo tras zainaslo. Nimisha azunui nivllunk naslem. Mhonn ti tache fuddeant bsoun asli. Sokallim taka dotorager vhorun haddlolem. Shashikant tanche fuddeant bhitor sorlo.

“Mavxe, tachea mathear jhelacheo goddyo ghalear taka borem distolem.” Tem porvonta tem polleun Shashikantan suchoilem. Mavxi taka pollet urli. To bhitor kuznant gelo ani apunnuch jhel gheun ailo ani aplo lens kaddun to jhel Nimishachea kopalar dovorlo. Matxe vellan tachem kopol xinnxinnlem ani angantlean kitlich hum’ bhair sorli. Tem ghaman buddlem.

“Mavxe, atam taka nhannient vhor thondd udkan pusun kadd. Tem sarkem nivollttolem.” Shashikantan anik ek sol’lo dilo. Ghamel’lean taka nhannoukuch zai aslem punn Shashikantan sanglolo upay korunk mavxen Nimishak nhannient vhelem.

Thoddea vellan hanstem mukhamoll gheun tim bhair ailim.

“Koslo dotor re tum?” Nimishan tachi fokanddam kelim.

“Hanv ganvtti dotor. Amcho ganv hengaddi punn soimban girest. Asum, tum borem zalem tem polleun khos zali mhaka.” Shashikant hansot mhonnlem.

Tim nhidunk veta mhollear boroch vell zaun gelo. “Are Shashi, utthonam? Polle konn ailam tuka mellunk.” Sokallfuddem mavxen salant ravun sad ghalo. Shashikant begi-begin utthlo ani tosoch salant ailo konn ailam tem polleunk. Pollet zalear khorench Sandhya ailolem aslem ani tem Nimisha fuddeant bosun aslem. Shashikant bhitor dhanvlo ani tondd bi dhuun toyar zaun ailo. Salant don patt lavun sozoun dovorlole. Ekacher mavxe-bhav Anil bosun aslo ani dusreacher Shashikantak bosunk sanglem.

“Tuje sarko bhav sogllea bhoinnink mellum.” Mhonnit tinnem Shashikantachi uvallnni keli ani tachea hatak rakhi bandli. Tache fattofatt Nimishanui bandli. Shashikant tankam pollet ravlo. Tanchem hem mogachem ani ek rup polleun to halun gelolo. Tim mat hanstalim.