अन्वेषा सिंगबाळ

अन्वेषा सिंगबाळ हे कोंकणींतले एक कवियत्री आनी वावुरपी.

जल्म

22 मार्च 1986

नामो

गौरीश अपार्टमेंट, खडपाबांद, फोंडे गोंय

वेवसाया संबंदान म्हायती

• 2008 वर्सा जी आर कारे महाविद्यालयांतल्यान कायद्याचे शिक्षण पुराय केले.
• कायद्याची पदवी घेतले उपरांत वेवसायाचो मार्ग बदलूंन पत्रकारितेंत उडी.
• सुमार दोन वर्सा ‘सुनापरान्त’ ह्या कोंकणी दिसाळ्यांत आनी ते उपरांत ‘गोअन ओब्जर्वर’आनी ‘गोवा 365’ ह्या खबरांपत्रांत आनी चॅनलात काम केलां. ‘द गोवन’ ह्या सप्तकी खबरापत्राखातीर लिखाण केला.
• तारा ट्रस्ट ह्या बिगर सरकारी संस्थेंत प्रशासकाची जबाबदारी निभयतना हेर जायत्या बिगर सरकारी संस्थांतल्या आनी शाळांतल्या अनाथ तशेंच खासा क्षमतेच्या भुरग्यां बरोबर काम केला.
• अणकार क्षेत्रांत काम करता. सरकाराच्या अणकार मंडळाचेर अधीकृतपणान नेमणुक जाल्या आनी सरकारी कागदपत्रांचे कोंकणीत अणकार करता.
• अभिनव क्रिएशन्ज हो स्वताचो वेवसाय चलयता. पुस्तक प्रदर्शनां, भुरग्यां खातीर कार्यशाळा, पुस्तकांचे वितरण अशें ह्या वेवसायाचें स्वरुप.

साहित्यीक वाटचाल

• वयाच्या 12व्या वर्सा सावन लिखाणाक सुरवात केल्या.
• कविता, निबंद, अणकार अशें तरेकवार साहित्य प्रकार हाताळटा. सुनापरान्त दिसाळे तशेंच जाग, बिम्ब, कोंकण टायम्स, युवा टायम्स, कोंकणी अश्या साबार मासिकांनी नेमान लिखाण करता.
• ‘सुलूस’ हो पयलो कविता झेलो नोव्हेंबर 2011त प्रसिध्द जाला.
• 'पडसाद' हो कविता झेलो 2016 वर्सा प्रसिध्द जाला.
• 'दांत' हे बाल काणयेचे पुस्तक 2017 वर्सा प्रसिध्द जालां.
• गोंयात तशेंच गोंयाभायर इन्स्टीट्युट मिनेझीस ब्रागांज, साहित्य अकादेमी, गोवा कोंकणी अकादेमी, नागरी लिपी परिशद, अंत्रुज घुडयो केल्ल्या साबार प्रतिश्ठीत कार्यावळींनी कविता सादर केल्यात.
• इंटरनॅशनल सँटर, विद्यापीठ, गोमंत विद्यानिकेतन सारकेल्ल्या प्रतिश्ठीत संस्थांनी आयोजीत केल्ल्या चर्चा सत्रांनी सहभाग.

सामाजीक योगदान

• पयलीच्यान कोंकणी खातीर आनी तरणाटे तशेंच बायलां खातीर वावुरपाची धडपड. कोंकणी मळार एक बरे संघटक म्हणून वळखतात.
• कोंकणी भाशा मंडळाचे 2020-2023 वर्साचें अध्यक्ष. कोंकणी भाशा मंडळाचे आदलें सचीव.
• 2007 वर्साच्या अखील गोंय विद्यार्थी मंचाच्या आंदोलनांत सक्रीय.
• 2006 वर्सा प्रादेशीक आराखडो 2011 विरोधी आंदोलन तशेंच सॅझ विरोधी चळवळींत वांटो आसा.
• 2012 वर्सा राम सेने ह्या समाज घातकी संघटना आड आंदोलन उबारूंन 'आमी गोंयकार’ ही संघटना स्थापन केल्या आनी फॅसबूक सारकेल्ल्या सामाजीक माध्यमांतल्यान तशेंच तरणाट्यां बरोबर बसका घेवन जागृताय पातळायल्या.
• 2011-12 वर्सा माध्यम भास चळवळींत मोलाचे योगदान दिलां. गांवागांवातल्यान रस्तो नाट्य तशेंच बसका घेवन ह्या विशयाचेर जागृताय पातळायल्या.
• गोवा युवा महोत्सव ह्या राज्यांतल्या सगळ्यांत व्हडल्या महोत्सवाच्या आयोजनांत सक्रीय सहभाग.
• 2012च्या विधानसभा वेंचणुका वेळार “भायर सरात मतदान करात” हे ब्रिदवाक्य घेवन 100 टक्के मतदाना खातीर मतदारांक प्रेरींत करपा खातीर वावुरलां
• ‘चित्रंगी’ ह्या साहित्यीक आनी समाज वावुरपी बायलांच्या गटांतल्यान समाजांत बायलांचे मेळावे आनी परिसंवाद चित्रंगीच्या माध्यमांतल्यान साबार गांवांनी तशेंच महाविद्यालयांनी घडोवन हाडल्यात. बायलांच्या मासीक पाळयेवेळार तांकां भश्टे मानपाच्या पध्दतीक विरोध करत तरणाट्यांमदीं जागृताय घडोवपाक वावुरता. राज्यांतल्या साबार शिक्षणीक संस्थांनी हे विशीं चर्चा सत्रां आयोजीत करता.
• कायदो विशयाचेर खास करूंन बायलांच्या कायदेशीर हक्कां संबद्दान साबार कडेन व्याख्यानां दिल्यात.
• कोंकणी मळार एक बरे सुत्रसंचालक म्हणून ख्याती आसा. ‘त्रिवेणी’ह्या कोंकणीतल्यो जेश्ठ कवियत्री नुतन साखरदांडे, नयना आडारकार आनी माया खरंगटे हांच्या कविता सादरीकरण कार्यावळीचे सुत्रनिवेदन सांबाळटना गोंय तशेंच गोंयाभायर कार्यावळी सादर केल्यात.
• फोंडेच्या रॉटरेक्ट क्लबातर्फे पर्यावरण, समाज, शिक्षण, मनरिजवण, भलायकी अश्या साबार मळार मोलाचे कार्य केलां.

पुरस्कार

• 2010 वर्सा संस्कृती प्रतिश्ठानान ल्हान वयांत पत्रकार क्षेत्रांतल्या योगदाना खातीर भोवमान केला.
• 2013 वर्साचो गोवा कोंकणी अकादेमीचो युवा चैतन्य पुरस्कार फावो जाला
• 2016 वर्साचो साहित्य अकादेमी,दिल्लीचो युवा साहित्य पुरस्कार फावो जाला