आयुवेदांतलो अक्षय्यवट

आयुवेदांतलो अक्षय्यवट

वड हें एक पवित्र झाड आसून ताच्या धर्मीक म्हत्वाक लागुन तें आमच्या सगळ्यांचे वळखीचें. वडाचें झाड बरींच वर्सां जगता. हाका लागून आयुवेदांत ताका `अक्षय्यवट’ अशेंय म्हणटात. ह्या झाडाच्यो खांदयो अयसपयस पसरतात. ताच्या खांद्यांतल्यान पाळां जमनींत वचून घट्टट जातात. ह्या पाळांखातीर वडाच्या झाडाक तांचो बरोच आदार जाता.

वडाचे महत्व

वडाच्या झाडाचीं पाना लांब - गोल आनी दाट आसून ताचीं फळां गोल आसतात. पिकतकच तीं तांबड्या रंगाचीं जाता. पूण खरें म्हळ्यार हीं फळां फळां नासून तातूंत खूब बारीक फुलां आसतात. वडाची पानां, साल, दीख, फळां, पाळां (प्ररोह) तशेंच वडाच्या झाडाक जो आंकूर फुट्टटा वा कोंब येता ताक आयुर्वेदांत बरेंच म्हत्व आसा. सादेदुखींत तशेंच सांदेसुजींत वा आमवातासारक्या दुयेसांत वंडाच्या झाडाच्या कांडांतल्यान येवपी दीख लायता. तशेच सांधेदुखींत वडाचीं पानां सांद्दांचेर बांदपाक वापरतात. ते भायर काडिल्ल्या `ग्रंथी शोथ ‘(lymph node enlargement) ह्या सारक्या लक्षणांचेर लेगीत वयलो दीख लायतात. कान व्हांवप, दुखप, दांत दुखप वा दोळे येवपासारक्या दुयेंसावेळार हो दीख भायल्यान लायतात. बिकांत लेगीत हो दीख लायतात पातळ परसाकडेन जायत वा संडासातल्यान रगत पडत जाल्यार वडाचो दीख पोटांत घेवंक दितात. घाव्यार तशेंच कांय तरांच्य कातीचे विकारांत वडांची पाळां बारीक वाटून ताचो लेप त्या भागार लायतात.

वडाच्या सालीचो उपयोग

बांयलाक आंगार धवे वा तांबडें चड वचत जाल्यार वडाचे सालीचो वापर करतात. गर्भाशयांत गर्भ स्थीर करचेखातीर आयुर्वेदांत ‘पुसंवन विधी’ सांगला. तांतूत वडाचो कोंब (वटशृंग) वापरतात. ह्या वटशृंगार कांय संस्कार करून तो वयल्या ‘विधी ’ खातीर उपेगांत हाडता. कांय जाणांच्यो पांयांच्यो शिरो मोट्यो जावन रगत सांठवल्ले भशेन जावन गुटलां तयार जाता (vericose vein) अशा लक्षणावेळार वडाच्या पाळांपासून तयार केल्लें तेल लावपाक वापरतात.