परिपाट

परिपाट ही एक ल्हान वनस्पत.ही वनस्पत चड करून भात रोयतात त्या शेतांत किल्लून आयिल्ली दिश्टी पडटा.शियां दिसांनी ही वनस्पत किल्लून येता.परिपाटाचे हें वनस्पतीक तांबूस-जांबळ्या रंगाचीं बारीक फुलां आनी तिळा सारखीं बारीक गोल फळां लागतात.गरमे दिसांनी ही वनस्पत सुकतकच ती काळ्या रंगाची जाता. हाचीं पानां, फुलां तशेंच मुळासकट सगळे वनस्पतींत वखदी गुणधर्म आसून घरगुती वखद म्हूण ताचो उपेग करपाक मेळटा.थंडी जावन खोंकली मारता जाल्यार परिपाटात गंजनाचीं पानां, तुळशीचीं केसरां आनी खडिसाकर घालून कसाय करून ती पियेवची. वयलीं लक्षणां रोखडीच कमी जातात. गांवगिऱ्या वाठारांत घरगुती वखद म्हूण हो प्रयोग चड प्रमाणांत केल्लो दिश्टी पडटा.तोंडाची रूच इबाडल्या, भूक कमी जाल्यार, तशेंच दंतांचो त्रास आसत जाल्यार परिपाटाचो काढो करून पोटांत घेवंचो. परत परत तान लागता जाल्यार लेगीत वयलो काढो पोटांत घेवंचो. परिपाटाचो काढो करून पियेल्यार कुडींतलें रगत शुद्ध जाता. ते भायर कामिणी सारक्यो फिग्दाच्या दुयेंसांत ह्या काढयाचो उपेग जाता. आंगाक जळजळ पडल्यार तशेंच मुतपाक त्रास जायत जाल्यार लेगीत हो काढो घेवचो.दोंगरी परिपाट म्हूण परिपाटाचे हे वनस्पतीचे एके वेगळे जातीचो उल्लेख आयुर्वेदाच्या ग्रंथांनी मेळटा.ताचीं पानां पोपायेच्या पानां भशेन पूण बारीक आसून तांबश्या रंगाची लांबट फळां लागतात. दोंगराळ भागांनी थंडायेच्या जाग्यार ही वनस्पत किल्लून येता. हाचो लेगीत वखदी उपेग करूं येता. फिग्दाच्या दुयेंसावेळार हाचो काढो करून घेतल्यार कुडींतले इबाडिल्ले दोश संडासावाटेंतल्यान भायर काडून दुयेंस बरें जावपाक मजत जाता.घावो जाल्यार हाचो लेप घाव्यार लायतात.परिपाटाचे हे वनस्पतीक चडशे लोक वळखतात.तशीच ही वनस्पत सहजतायेन मेळिल्ल्यान तिचो वयल्या दुयेंसावेळार उपेग करूं येता. परिपाट सुकोवन एकठांय करून दवरचो आनी गरजेच्या वेळार उपेगांत हाडचो.