पेद्रु पाउल ब्राज कुर्रेय आर्फोसु
पेद्रु पाउल ब्राज कुर्रेय आर्फोसु (जल्म: 29 जून 1892, मरण:14 फेब्रुवारी 1965)
शिक्षण
[बदल]एक नामनेचो कोंकणी पत्रकार बापायचें नांव रॉक आनी आवयचे नांव क्लाऊन पाशेको. मार्च 1918 वर्सा तांणे मुंबय विद्यापिठाची कृषी विज्ञानाची पदवी मेळयली. बरे गूण मेळिल्लयान पुण्याच्या शेतकी महाविद्यालयांत ताचें नांव मानादिकांचे वळेरेंत आसा.
जिविताची वाट
[बदल]1918 वर्सा गोंयच्या कृषी आनी रान खात्यांत ताका नोकरी मेळ्ळी. 1918 ते 1931 वर्सामेरेन ताणें असोळणें गांवचो शासक म्हूण वावर केलो. उपरांत तो तेरसैरा सिरकूनश्क्रिसांव आग्रीकोला, मडगांव (Terceira Circunscricao Agricola) हे संस्थेचो मुखेल जालो. 30 वर्सां नोकरी केल्या उपरांत 1949 वर्सा तो निवृत्त जालो.
पुरस्कार
[बदल]1919 वर्सा तेन्नाच्या गोंयच्या कृषी आनी रान खात्याच्या निर्देशकान ताका ऊं गनेज सॅति पॅस इ सॅति काबेसश (Um Ganez de sete pes e sete Cabecas) (सात पांयांचो आनी सात तकल्यांचो गणेश) अशें म्हूण ताचो भोवमान केलो.
भारताचें पीक वाडोवपाचे नदरेन ताणें बरेच प्रयोग केले. असोळणें, वेळ्ळी आनी आंबेली गांवांनी सरकारी जमनींत ताणें माडाच्या पिकाची उदरगत केली. नाल्लाचे उदरगतीच्या संस्कृतीक, वेपारी आनी उद्येगीक आंगांचो अभ्यासाक लागून गोंयच्या गवर्नर जनरलान ताचो भोवमान केलो. ताणें बरयल्लो प्रबंध पुस्तकरुपान उजवाडाक आयलो. शेंतवडीचीं उपकरणां, रसायनीक सारीं, कीटकनाशकां आनी शेतवडीच्या मळार यांत्रिकीकरण करपांत ताचो म्हत्वाचो वांटो आसा. 1941 ते 1947 वर्सा मेरेन सालसेत नगरपालिकेचो अध्यक्ष ह्या नात्यान ताणें घाण आनी कोयरा पसून सारें करपाची पध्दत सुरू केली. ताणें देवी, रॅबिज ह्या दुयेसां आड खर उपाय येवजण केली आनी मडगांव शारांतली येरादारी वेवस्था गटार वेवस्था सुदारली.
तो खर राष्ट्रवादी आशिल्लो. 1950 आनी 1960 वर्सा अ व्हीद (A Vida) ह्या पोर्तुगेज खबरापत्रा खातीर ताणें बरपावळ केल्या.
1962 वर्सा ताणें गोंयच्या कोंकणी भाशा मंडळाची थापणूक केली आनी मंडळाचो संस्थापक अध्यक्ष जालो. ह्या मंडळा वरवीं ताणें कोंकणी कार्यकर्त्यांचो एक पंगड तयार केलो आनी कोंकणी भास आनी साहित्य हांचे उदरगतीक हातभार लायलो. 1962 वर्सा मडगांवां भरिल्ले आठवे कोंकणी परिशदेचो तो येवकार अध्यक्ष आशिल्लो.