बॅ. नाथ पै

विकिपीडिया कडल्यान
Jump to navigation Jump to search

बॅ. नाथ पै हांचो जल्म 25 सप्टेंबर 1924 ह्या दिसा वेंगुर्ल्या जालो. नामनेचो सुटके झुजारी आनी संसद सदस्य. ताचो बापूय भुरगेपणांत भायर पडलो. आवय तापी आनी व्हडलो भाव अनंत हांच्या संस्कारांचोच नाथाचे व्यक्तीमत्वाचे घडणेंत व्हड वांटो आशिल्लो. वेंगुर्ल्यांत ताचें मुळावें शिकप जालें. बेळगांवच्या लिंगराज कॉलेजींतल्यान अर्थशास्त्र घेवन तो बी.ए.(1947) जालो. उपरांत लंडनच्या लिंकन्स ईनांतल्यान बार ऍट लॉ (1955) मेरेन ताणें शिकप केलें. संस्कृत, मराठी, इंग्लीश ह्या भाशांचेर ताणें भुरगेपणांतूच प्रभुत्व मेळयलें. विल्यम शेक्सपियर, पर्सी शॅली, जॉर्ज बायरन हांच्या साहित्याचो तशेंच विदग्ध संस्कृत वाड्. मयाचो अभ्यास ताणें केल्लो. 1960त तो क्रिस्टल मिशॅल हे ऑस्ट्रेलियन चलये कडेन लग्न जालो.

   म्हाविध्यालयांत आसतनाच ताणें स्वातंत्र्य चळवळींत वांटो घेवपाक सुरवात केली. भूंयगत चळवळींत ताचो वांटो आसलो. टपाल कचे-यो आनी पुलीस स्टेशनाचेर हल्लो केलो म्हणून जायतो खेपे ताचेर खटलो भरलो.  1946च्या मुळाव्या शिकोवप्याच्या संपांत तशेंच गोंय मुक्ती आंदोलनांत ताणें वांटो घेतलो. तो बेळगांवां ‘राष्ट्रीय सेवा दल’ ही संघटना चलयतालो. सोशलिस्ट यूथ इंटरनॅशनलाचो तो स वर्सां अध्यक्ष आसलो. ताणें 6 ते 7 मे 1955क आझाद गोमंतक दलची गुपीत बसका, बेळगांव लागीं कानबागींत घेवपाक मार्गदर्शन केलें. 15 ऑगस्ट दिसा गोंयांत भितर सरपी सत्यग्रहांक मार्गदर्शन करपाक हेर मुखेल्यां वांगडा तो सावंतवाडी शिमेर येवन रावलो. 1957 ते 1971 ह्या काळांत तो प्रजासमाजवादी पक्षाचो खासदार म्हणून लोकसभेंत गेलो. गोंयांक बेगीन स्वतंत्र्य मेळचें म्हणून तो आपल्या उलोवपांतल्यान संसदेंत तशेंच भायरूय लोकां मदीं गोंयची बाजू मांडटालो.

17 जानेवारी 1971 वर्सा हुतात्म्यांक आर्गां ओंपपाक बेळगांवां अय्यिल्लो तेन्ना सभेंत भाशण जातकच काळजाचो आताक येवन अचकीत मरण आयलें.[1]

  1. भांगरभूंय. दिसाळें,25 Sept ,2017.
"https://gom.wikipedia.org/w/index.php?title=बॅ._नाथ_पै&oldid=176035" चे कडल्यान परतून मेळयलें