श्री देवकीकृष्ण संस्थान, माशेल

श्री देवकीकृष्ण संस्थान, माशेल

इतिहास

श्री देवकीकृष्ण हें फोंडें म्हालांतल्या माशेल वाठारांत आशिल्लें नामनेचें देवस्थान. ह्या देवतेचें मुळ स्थान गोंयांतल्या तिसवाडी तालुक्यांतल्या चोडणां जुंव्यावयल्या पांडववाडो वाठारांत आसलें. सोळाव्या शतमानांत हो जुंवो पुर्तुगेज राजकर्त्यांचे सत्तेखाला येतकच तांणी ख्रिस्ती धर्माच्या प्रसाराखातीर हिंदूंचो छळ सुरू केलो. तांणी हिंदू देवळांची आनी तांतूंतल्या मुर्तिची मोडतोड चलयल्यान हें दैवत स्थलांतर करून त्या वेळावयले पूर्तूगेज शिमेभायर दिवचल म्हालांतल्या मयें गावांत व्हरचें पडलें. थंयच्यान कांय वर्सांनी फोंडें म्हालांतल्या माशेल गांवांत देवूळ बांदून थंय ह्या देवाची स्थापना केली. चोडण जुंव्यावयल्यान हें स्थलांतर सुमार इ.स. 1540 पूण 1564 आदीं मयें वाठारांत जालां आसुयें आनीं मयें वाठारांतल्यान श्री क्षेत्र माशेलांत 1751 आदीं जाला आसूंक जाय. देवता पांडववाडकार आनी गावणवाडकार ह्या दोनूय कुळ्यांच्या एकंतर म्हाजन कुळावी लोकांची मुखेल देवता मानतात.

म्हाजन

ही देवता जांणी स्थापन केली ते गौड सारस्वत ब्राह्मण, अत्री, काश्यप,वत्स, कौशीक आनी भारद्वाज ह्या पांच गोत्रांचे आसून तांचीं उपनांवांच वेगळी आसात देखीक अत्री गोत्रांच्या मनश्याचें मूळ उपनांव प्रभू पूण फुडें थळ, गांव आनी वेवसायावयल्यान तांच्या उपनावांत बदल जायत गेलो आनी ते प्रभू वेर्लेकार, प्रभू पर्रीकार ह्या नांवांन वळखूंक लागले. वत्स गोत्राच्या मनशांचीं उपनांवां प्रभू दाडसाखळकार आनी भारद्वाज गोत्रांच्या मनशाची उपनांवां वरजे अशीं वळखूंक लागले.

जात्रोत्सव

श्री देवकीकृष्णाची जात्रा दर वर्सा मार्गशीर्श म्हयन्यांत शुक्ल त्रयोदशी तिथीक आनी वर्सान वर्स चातुर्मास सोडल्यार पाक्षिक निमतान शिबिकोत्सव जाता तोय त्रयोदशी तिथी दिसाच. हाचेवयल्यान कळटा की त्रयोदशी तिथीक खुब म्हत्व आसा. श्री देवकीकृष्णाची जात्रा ही सगळ्या धारवाडकार घराण्यांच्या लोकांची जात्रा.त्या दिसा श्री देवकीकृष्णाक गंध पुजा करतात मागीर दिवजां,महाआरती आनी नैवेद्य जाता.रातच्या वेळार श्री देवकीकृष्णाच्या मुर्तेची पालखी जाता.