सुमित्रानंदन पंत

सुमित्रा नंदन पंत भारतीय ज्ञानपीठ पुरस्कार फाव जाल्ले हिंदी कवी।ताचें मूळ नांव गुसाई दत्त,पूण तांणी काव्य लिखाणा खातीर हें टोपण नां घेतलें।तांचो जल्म २० मे १९०० दिसा कौसानी-उत्तर प्रदेश हांगा जालो।तांच्या भुरगेपणांतच तांचे आवयक मरण आयलें।तांच्या बापायन आनी आजयेनच तांकां ल्हानाचे व्हड केले।महाविद्यालयीन शिक्षण घेवपा खातीर तांणी बनारस हांगाच्या क्कीन्स कॉलेजीत नांव घाल्लें।पूण असहकार चळवळीच्या प्रभावान तांणी शिक्षण अर्द्यारच सोडलें।

तरी तांचो सभाव सभाभीरु आनी एकांतप्रिय आशिल्ल्यान ते राजकारण पसून तशे पयसूच आशिल्ले।संस्कृत,इंग्लीश आनी बंगाली भाशा साहित्याचो तांका अभ्यास आशिल्लो।इंग्लिश काव्याचें तर तांणी खाशेलें परिक्षण केल्लें।१९५०-५७ ह्या काळांत तांणी आकशवाणीचेर हिंदी विभाग मुखेली म्हूण आनी १९५८ उपरांत सल्लगार म्हणून काम पळयलें ह्या काळांत तांकां जायते भोवमान आनी पुरस्कार फावो जाल्ले।