Agra

विकिपीडिया कडल्यान
हुपून वचात: दिशा-नियंत्रण, सोद
ह्या विषयावयर देवनागारींत बरयिल्लें पान वाच : आग्रा

…. Page needs to Edited.

Tomb of Akbar the Great
The Red fort, Agra, c. 1820
Agra, Main Street, c.1858

Ut'tor prodex rajeantolem adlea itihasik vastunkhatir somvsgorik namna mellil'lem mhotvachem xar. Yomuna nhoinche udent deget hem xar voslam. Dil'lichean agneyek 192 kimi. Ontracher hem xar asa. LoksonkheaH 11,10,364 (1981). Mohabharotant hea xaracho ogroun oso ul'lekh melltta. Tea kallant hem xar xursenache sot'tekhala khub bhorbhorattik ayil'lem. Hangach komsachi bondkhonn axil'li. Hea xaralagosar axil'lea bottexrvor kxetrant xrikrixnnache purvoz ani vonxoz hanchea vosnnukeche khub ovxex mell'lleat. Xrikrixnnacho put prodyumn ani natu onirudhd hanchea namvan vosoil'li ‘ podmon khedda ’ ani ‘ oundhkhedda ’ him namvam he gozalicho puravo ditat. Agra hem xar vojr vattharantolem mukhel nogor aslem. Thoinchea bara vonant ogroun hem ek von axil'lem. Ary lok bhartant yetkoch tamnni panch kodden vosti keli. Tatuntolem ek agra xar, zaka aryogrih oxem-i mhonnttale. Hea aryogrih va ogroun hea namvamveleanuch hea xarak agra hem namv poddlam oxem sangtat. Xrikrixnnachem khellpachem tholl, onsuya, xobri hanchi topobhum-i; porxuram', vedveas ani surdas hanchi zolmobhum-i mhonnunoi agreak mhotv asa.

Dhavea xenkddeache okheromeren hem xar hindu razanchea xekatolla axil'lem. I.So. 1028 vorsa muhom'mod gojni hannem zoipal razakoddlean tem jikhun ghetlem. Gulam', khilji, mogol hea vonxatlea sultananchea kallant hem ek sadem xar axil'lem. 1501 vorsa sikondor lodi hannem tachi udrogot korun thoim apli rajdhani sthapli. 1526 vorsa babran hem xar aplea xekatolla ghetlem. Tea vellauyole luttint taka namnecho kohnur hiro mell'llo. Tachea uprant ponchvis vorsamni tacho natu okbor hannem agra xarak mogol samrajeachi rajdhani korun xarache udrogotint bhor ghali. Fuddem xohazohanachea razouttint hea xarachi sobitokai vaddli. Tannem aple auddotte rannyechem yadstik mhunn yomuneche deger songmorouri fatrancho sundor tajmohal bandlo. Fuddem hea xaracher ourongojebacho xek ailo. Tannem 1652 to hanga axil'li apli rajdhani dil'lik vheli. Hea kallant agra xaracher khub ghureo zaleo. Kaim kall hem xar bhortopurchea zattankodde axil'lem. Kaim kall morattheamni-i tacher aplo xek choloilo. 1803 vorsa hem xar brittixamni aplea xekatolla ghetlem. 1857 meren agra hi tanchea vaivy ximeuylea vattharachi rajdhani axil'li. 1858 saun hem agra jilheachem kandr zalem.

Sikondor lodichea kallasaun hem vidyechem kendr axil'lem. Okborache razouttint hanga farsi bhaxa ani sahity hanchem xikop xikoup choltalem. Hangche somskritik mhotv zannun gheun surdas hanga yeun ravil'lo. Tansenachea kallasaun hea xarak songitachem mukhel kendr manunk lagil'le.

Sodea hem ut'torprodex rajeantole vepari ani udyegik kendr asa. Hanga xendreo, galiche, kapus pinzun tatuntleo bio kaddop, rosainam, komvchi, dhatukam' adinche torekovar karkhane asat. Hanga chamddeacheo ani songmorouri fatracheo vostu toyar kortat. Relvemarg, vimanomarg ani rosteamvorovim hem xar bhartachea her mukhel xarankodden zoddlam. 1823 to hanga poilem mohavidealoi nirmann zal'lem. Hea xarachea ostont bhagant agra videapitth asa.

Hea xarant okboran bandil'lo vhodd kil'lo asa. Hea kil'leachea zagear adim badlogodd namvacho kil'lo axil'lo, oxem sangtat. Ho kil'lo tambddea fatramni bandla.Kil'leacho amvatth saddetin chovo. Kimi. Asun bhomvtonnochem durig, daram, bhitl'lo okbori mohal hem sogllem okboran bandlam. Kil'leabhitl'lem kitlexench kam' okbora uprantchea razamni kelam.Hanga tajmohal, okbori mohal, zohangir mohal, xix mohal, divann-i-khas, divann-i-am', moti moxid, nogina moxid, zami moxid (1648), yomuneche ostont deger axil'li itmad ud'doulachi sundor kobor, babor rautalo to udeanprasad, rambag, chini-ka-rozha ani her zaiteo vastu pollounk mellttat. Hea xarachea vaivyek atth kimi. Ontracher okborachi kobor asa.


Polleiat[बदल]

Agra

Chitr Prodorxonn[बदल]

Sondorbh[बदल]

"https://gom.wikipedia.org/w/index.php?title=Agra&oldid=163116" चे कडल्यान परतून मेळयलें