Asura

विकिपीडिया कडल्यान
 
Romi
   
The bas-relief of Samudra manthan from Angkor Wat, Cambodia, shows Vishnu in the center, in his Kurma avatar, with the asuras and the devas on either side. See an annotated version in the Wikimedia Commons.

Asur mhollear devanche dusman. Hankam dusrim-i namvam asat, tim oxiH ditiche put dekhun doity. Donuche put dekhun danou. Hamnni dhortorecher dha yugam rajy kelem. Tanchim devam add bara zhuzam zalim. Tamnni devancher zaite khepe zoit melloilam. Toit'tiri-i brahmonnant ‘osur’ xobdachi veakhea oxi kelea- ‘tenasuna suranosrizot। todsurannamosurtvom'।’ orth- tea osun mhollear prannan (prozapotin) tankam nirmil'le, dekhun tankam osur mhonnttat. Osur utracho khoro orth mholear prannvan, bollixtt, viryovan porakromi.

Dev ani osur he donuy prozapotiche put. Osur vhoddle ani devo dhakle. Prozapotin devak disache ani osurank ratiche utpon'n kele. (xotpoth brahmonn). Prozapotin osurank ondhkar ani maya heo gozali dileo. Dekhun te mayechi upasona korunk lagle. Osur hem utor rigvedant sumar 105 fautt ailam. Tatunt 90 suvatincher tacho vapor devo hea orthan kela. Rigvedant vorunnak ani her devank osur oxem mhollam. Ognidevak legit osur oso lekhla. Hanche puroitoponn bhargouxukr hache kodden axil'lem. Osur lok khoinche hachevixim char motam asat – osur mhollear 1. Purvil'le sumeriyon lok. 2. Purvil'le osiriyon lok 3. Mogodh va dokxinn biharantole lok 4. Purvil'le iranni ohuromjdache onuyayi.

Bhartant ary somskritai yeuchem poilim osur, doity, danou ani nag oxe vegvegllea somskritayanche somaz axil'le. He lok areanche virodhok axil'le. ‘meru dongracher, omrauti nogrant devancho rabito asa. Zalear meru dongrache khal irauti he osuranche nogor asa’, oxem sainnachary hannem boroilam. Bhartache ostont degek osuranchim rajeam axil'lim. Gujratantolem bhrigukchchh (bhoddoch) ‘boli’ hea osuranchi rajdhani axil'li.

Osur lambayen unch ani kuddin dhoxttopuxtt toxench bollixtt axil'le oxem murtintlean ani fatraptteantolean disun yeta. Te kems lamb dourotale ani khadduy lamb dourotale.Jeotixoxastracher tancho upatt bhavarth axil'lo. Zhuzak vochche adim osuranche soinik somratt sodanch bhovixy polloun ghetale.

Purvil'lea aesiriachi rajdhani mhollear nineuhe xar. Hea xarachea utkhononant babiloni bhaxanchea ‘kyuniform'’ lipint vittancher boryil'le kaim gronth mell'lleat. Tatunt osuramvixinchi borich mahiti melltta. Yufratis ani toigris nhoinche degek raupi purvil'lea lokank ‘semaitt’ mhonnttat. Osur he tanchech vonxoz oxem kaim vidvanachem mot asa. Sumeriyon lok osuranche xezari axil'le. I.So.Po. 1380 chea kallant osuranchi xokt khubuch vaddli. Tamnni babiloniacher zoit melloilem ani thoim osur samrajeachi thapnnuk keli. I.So.Po. 746 te 626 hea kallant jea osur somrattamni osur samrajeacher xek choloilo tatunt tigloth, pilesor, xalmonesor, sargon, sen'nocherib, ossurobonipal he somratt khub namneche asat.

Vhinsentt xril hannem osur deutanchea dil'le vollerent ‘osur mozhajh’ hi ek deuta asun ticho sombond ohuromjd hea zhortuxttri deutekodden zoddla. Iranni bhaxent ‘ohur’ hem utor ‘osur’ utra kodden laginchem asun tem borea orthan tor kaim utram iranni dhormogronth ‘ovesta’ hatunt borea orthan vaprant ailim. Hache urfattem kaim utram bhartant borea orthachim zalim zalear ‘ovesta’ dhormogronthant vaitt orthachim. Dekhun, osur utrak rigveda uprantchea somskritant vaitt orth mell'llo.

Osuranchim ani monxanchim lognam zal'leachim udahoronnam purannant borechokodden asat. Tanchi protibha unch pamvddeachi axil'li. Te koleche mogi axil'lean tankam chitrokolechi khub audd axil'li. Osur kolauntamni aple kuxoll protibhen fatrant korantil'lim xilpam ani chitram polloun aiz legit pondditank ani vidvanank ozap zata.

Polleiat[बदल]

Asura

Chitr Prodorxonn[बदल]

Sondorbh[बदल]

"https://gom.wikipedia.org/w/index.php?title=Asura&oldid=199056" चे कडल्यान परतून मेळयलें