Bharatanatyam

विकिपीडिया कडल्यान
 
Romi
   
A Bharatanatyam performer expressing a part of a play with hand and facial gesture, in the dance's distinctive bent leg position.
Left: 7th century Shiva in Karnataka; Right: Bharatanatyam pose

'Bhortonattyom ho ek obhizat bharti-i nachacho prokar. Tachea namvauyleanuch bhortachea nattyoxastrakodden sombond axil'leachem spoxtt zata. Bhortonattyom' hi ek som'mixr kola. Tichebhitor kauy, natty, songit, tal ani loi hea soglleancho aspavo zata. Nortikechea hatapamyanchi halchal, sonketik va sadrixyodrxok hatacheo mudra, tal, loi ani kauy him sogllim bhortonattyomachim bhavo uktaupachim sadhnam. Hea sogllea angantlean khoincho tori divy oso sondex prekxokam'meren pavoup ani prekxokank tanche vastou ovsthentolean titlea kallameren tori voilea pamvddeacher vhorop oso hea nachacho het asta. Nachantole kothaprosong ramainn, mohabharot,purannam ani mohakaveam hatuntlean ghetil'le astat. Tea tea prosongantole te te vyoktichem onukoronn kolakar korit asta. Bhortonattyomachi sadhna ho ek yog oxem mhonnttat. Hea nachant mudra ani dolleamni uloupachem asta. Tekhatir sadhkak kaim nem' ani potheam pallchim poddttat. Purannant ani agmant (xastr) xiv ho zoso nortok toxench to yogi-i asa. Nottraz hi tachi nrityokolentoli upadhi. Bhortonattyom'

Bhortonattyom' hi ek don hozar vorsamsaun prochlit asa. Bhortonattyom' hi xoili mull tomillonadduntlea tonzaur jilheachi mhonnun namna asa. Ho nach chodd korun bailoch kortat. I. So. Dus-ya - tis-ya xenkddeantolea 'xilppodhikarom hea tomill gronthat hea nachacho ul'lekh melltta. Tonzaurchea chol razanche karkirdint hea nachachi pod'dot axil'li. Tancheuporant naik raje hamnni hea nachak khub urba dili. 18 vea xenkddeant tonzaurak protaposimh ani tache uprant tullzaji hanchea kallant he kolechi khub udrogot zali. Tanchea dorbarantole rajkovi mohadevo onn'nnavi ho nattyoxastrantolo vidvan ani subborai hedd ut'tom' nortok mhonnun gajle. Subboroyache char put chin'noyea, pon'noyea, voddivelu ani xivnondom' hea pill'lle bhavancho 'orengettrom (poilo rongmachoyer provex),dusro sorfoji moharaz (kar. 1798-1832) hachea dorbarant 1825 vorsa zalo. Hea charui bhavank aichea poromporagot bhortonattyom' pod'dotiche ad'd prourtok mantat. Hea charui bhavamni telugunt kaim tomill bhaxent rochil'le nachache prokar poromporagot nrityopd'dot mhonnun ruddh zaleat. Hech sodeachea bhortonattyomache prokar asat.

Survek hea nrityoprokarak 'kut'tu', 'att'ttom oxim namva axil'lim. Uprant deudasimni hea nriteachi zotnai gheun zopasona keli. Tokhatir taka 'dasiatt'ttom hea namvan vollkhunk lagle asumye. Punn dusro sorfoji bhomsle hannem aple sodrent va dorbarant ho nach korpachi porompora chalik laun hea nachak prochixttha melloun dili. Ten'nasaun hea nachak 'sodoratt'ttom mhollear dorbari nach hi manachi suvat favo zali. Telugu sahiteant nrityonatteacho 'bhortoxastr' oso ul'lekh melltta. Bhavo, rag ani tal hancho zannkar to bhorot oxem bhortoxastrant manil'lean sodoratt'ttom' nachakuch uprant bhortonattyom' mhonnunk lagle.

Hea nachachea odheaponachi survat bo-ya mhurtacher vidhiyukt pujen kortat. Survek xikoitat tea podaghatank 'oddvu' oxem mhonnttat. Oddvu mhollear nachpachi survechi halchal. Hea pamyanche halchalink tomill-telugu bhaxent oddu va oddvu oxem mhonnttat. Hea oddvunche khaxele pongodd asat te oxe-

1) tott'ttu oddvuH pam-i marpache prokar-7 2)nott'ttu oddvuH pam-i rompache prokar-9 3) ta toi toi ta oddvu va choturxr host oddvu-4, 4) vordhoman host va xikhor host oddvu-4, 5) tot toi ta oddvu-11, 6) tott'ttu mett'ttu oddvu-5, 7) kudit'tu mett'ttu oddvu-1, 8) chokradhar oddvu va sornnochari oddvu-5, 9) periy oddvu-5, 10)zati oddvu- he tixr zatipromann 3 matramni xikoitat. Tatunt ek podneas axil'le 2 prokar astat, 11) monddi oddvu-4, 12) gorudd sthan oddvu-4, 13)ginn tom' oddvu-5, 14)tori kitt tom' oddvu-5

ginn tom' oddvu ani tori kitt tom' oddvu he donuy prokar he 'mut'taipu' va tihaiche prokar bol somecher haddpakhatir vaprotat. Toxench 'noddoi oddvu' mhollear cholpache prokar ani mey oddvu mhollear ang haloun korpache prokar veglle xikoitat. Vegvegllea gurunchea somprodayapromann oddvunchi sonkhea chodd - unni asta. He oddvu xikpak unnoch don vorsam kall lagta. Oddvunt vaprotat te host, pad, sthan, monddol tea tea kroman thoim thoim xokoitat. Osomyukt host 32 asat, somyukt host 23 asat, padbhed 6 asat, sthanam 6 asat ani monddomla 10 asat. Bhortonattyomant nrity kortona ji mullchi nachachi ovstha asta, tika tomillint aroi monddi va ait monddlom' oxem mhonnttat. Hakach choturxr sthan oxem-i mhonnttat. Oddvu xiktokoch poilim 'olaripu', 'zatisvorom osle sompe nrityoprokar xikoitat. Uprant 'xobdom, 'vornnom, 'podm, 'zavill', 'til'lana', 'xlok' he prokar xikoitat. He soglle prokar tea prokarank onurup oxa git-gaina soit kortat. Tanchi thodde bhitor mhaiti oxi-

1) stuti stuti mhollear ixstoun. Nachacho proyog yoxsvi zaupakhatir podd'ddo ugddoche poilim gompoti, sorsvoti, lokxmi, nottraz hea ixttodeutanchi tust kortat.

2) olaripu ho bhortonattyomantolo poilo prokar. Purvil'lea gronthamni hacho 'puxpanzoli' oso ul'lekh melltta. Puxpanzoli mhollear fulancho poso. Nortoki rongmachoyer yetkochothoim axil'lea sogllea deutank puxpanzoli omppacho ho prokar. Komoll jepromann lhou lhou paklle-pakllen fulta techpromann hi nortoki aple dolle, man, bhumveo, khande hanchea nazuk halchalimni survat korta. Hea halchalimni eke torecho veayam' zal'lean nachacheo fuddleo halchali chopllayen korunk mellttat. Hea prokarocho dusro het oso, nortoki apleamatheacher tonddasamokar ani hodd'ddeacher onjli hosot dourun vighnohrta, rongdeuta, guru ani vidvanank nomskar korta ani fuddli kareavoll yoxsvi zaupakhatir axirvad nomskar magta. Tot, toi, toiyum', tam' hea kar vachok bolanchi hi rochna asta. He bol ragdarint mhollear purvil'lea xastri-i gronthapromann 'nottoi' va natt rangant gaitat. Olaripu chotuxradi vingodd vingodd zatimni kortat.

3) zotisvor mho bhortonattyomantolo dusro prokar. Zoti mhollear bol ani svorom' mhollear svor. Kotthinn oxa hea nrityoprokarant man, hat ani pam-i hancheo talobd'd halchali astat. Rag, svor ani tal hanchea somyogan ho prokar akrxok korpacho asta. Ho xudhd nach axil'lean nrity hea prokarant moddtta. Hem nrity chalu astona vadeancher khoinchyai tori ragachi dhun vazoitat.

4) xobdom' devadikanchea nattyopurnn kothaprosongancher adarit kauy mhollear xobdom'. Somskritant haka yoxogiti oxem mhonnttat. Hea gitant devachi va konnai naikachi tokhnnai asta. 'salmure' mhollear tumkam nomskar kortam hea utran hea gitacho xeutt zata. Hea nriteant mudrancho upeg kortat. Bhavo ani mudra hanchea adaran hatunt gitacho orth uktaitat. Kounak sobsaroke addavo nachpachi hatunt yeuzonn asta.

5) vornnom' vornnom' mhollear bhortonattyomacho gabhoch. Haka 'podournn' va 'choukournn' oxam-i nava asat. Ho nrityoprokar samko guspagondollacho ani kotthinn asta. Nrity, songit ani obhinoi hancho kolapurnn somyog mhollear vornnom'. Nortokachem budhdikouxly ani obhinoikouxly hatunt chodd dixtti poddtta. Hatunt gey podeacho orth zos-zoso bodlota. Hostomudramni koulacho orth ani mukragan tatuntlea ontorbhaunecheo vingodd vingodd chhotta dakhoupacheo astat. Rag, tal, ani bhavo hancho trivenni songom' sadun obhinoyachim vegvegollim angam dakhoupachim axil'lean ho nach purai zaupak ek vor tori lagta. Vilombit, modhy ani drut oxo tinuy loyi hea nriteakhatir vaprotat.

6) podom' vornnomantlea halchalink lagun nortoki thokta, tekhatir tika suxegachi goroz asta. Dekhun podom' ho vegllo pod'doticho nach kortat. Hatunt mudra-obhinoyacher bhor divn soukasayen nachtat. Podom' mhollear premgit. Tatunt pol'lovi, onupl'lovi ani choronn oso krom' asta. Devo, raza hancher him podam rochil'lim astat. Hatuntolim choddxim podam tixr-triputt talant gaitat. 'mixrom, 'mixr chapu' va fokot 'chapu' him sogllim tixr zati-triputt talachinch namvam asat. Him podam vilombit loyent gaupachi chal asa.

8) zaulli ho chodd korun modhy loyint uddtte chalint gaupacho prokar. Hatuntolem sahity xringaros prodhan asta. Nayika va tichi ixttinn zaullintlean aple bhauvikar uktaita. Hatuntlea xringarobhavachem svorup ekekodam sadem-sompem, loukik ani kaim fauttim ut'tan asta. Hanchi pol'livi, onupl'lovi ani choronn oxi rochna asta. Ken'naken'nai ekaporos chodd legit choronn astat.

9) til'lana til'lana mhollear hindusthani songitantolo toranna. Hatunt 'til'lilana' ,dirna' 'tom' dirna', 'ton'nom oslea prokaranche bol ekttham-i korun tanchi ragant ani talant boska kel'li asta. Hatunt goti, zox ani vegvegolle podaghat astat. Tatuntole svor, loi ani bol khaxelem vatauronn toyar kortat. Hatunt loikarik chodd mhotv asun nortikechea angachem vegvegllea konxamni ani xorirausthantolean dorxon ghoddoita. Songit ho hea karyokromancho atmo asta.

10) virut'tom' churnnika ani xrlok tinuy prokar ekamekank samke lagim asun te tomill telugu ani somskrit bhaxantlean sador kortat.

11) koutukmy linchea kallant ho prokar fokot deullamninch polloupak mellttalo, punn halim ho prokar rongmachoyer olaripu poilim kortat. Purvil'lea gronthamni hacho ul'lekh 'kout', 'kut't' oso melltta. Hatuntlea bolancher yogy tem nrity ani sahiteacher obhinoi kortat.

12) mongllom' proyogachea xeuttak gaupacho ho prokar. Hacher nach korinat, punn nortoki fokot podaghat korta. Proyogant zal'lea git, vady, nrity hatuntlea chukamvixim devakodden chuk magop, ho hea mongllom' prokaracho mukhel het asta. Mongllom' mhollear 'sogllem mongoll zaum, borem zaum' oxi devak kel'li prarthona. Hoch proyogacho xeutt asta.

Bhes[बदल]

Poilinchea kallant bhortonattyom' nachakhatir nortoki sodlloso chuddidar ani paizomo vaprotali. Tacher erogenddi kopddoyachi nnou vari dhoviful'l saddi dhomprasokoil meren nhemsun davea khandauylean podor gheun to ujve kuxikoddlean fuddem haddun dave votten komrak khoitalim. He saddyek pavo inch rundayechi bhangra korachi zor astali. Dekhun he saddyek 'tuya seloi' oxem mhonnttale. Ticher komrak 'maza' cho komropotto ani voir rongit blauz ghalun soglle olonkar ghaltalim. Punn halim hea bhesant khub suttsuttitoponna ailam. Choleank nnou vari saddi nhespak zodd zata mhonnun, toxech torecho bhes ximvun toyar kortat. Ho bhes xalvacho ximvtat. Pum' ho bhes kas ghalun nhexil'lea pitambora bhaxen asun taka donuy vottamni ximvil'lo dhomprameren paupi ponkho asta. Tacher komrak gutthlail'lo teach kopddeacho xelo asta ani tea xeleakuy bomble sokoil yeta oso ek lhanso ponkho asta. Her olonkar mat poromporik pod'dotipromann astat. Mhollear golleant gollobhor mallo, hatbhor kanknnam, koplar bhangtillo, bazubond, nakant toxench nakache modim lambto 'bulak' namvacho olonkar ani pamyant bhorpur ghungur bandtat.

Poilinchea kallant ho nach choddso deullamni toxench lognasarokilea mongol suvalleamni korop zatalo. Punn uprant to rajdorobarant ani halim veusayik rongmachoyer toxench her somskritik kareavollimni pollounk melltta.

Bhortonattyomachea proyogant mridong, vinna, vayolin, murli, zhanz, chiplleo oxa vadeanchi sath asta. Tistr, choturstr, mixr ani adital he tache mukhel tal astat. Rongmachoyeche ujve votten him sogllim vadeam ani vadok astat. Lok bostat tea asnankoddlean poilim mridongovadok, uprant ghottom' vady aslear tem vazoupi tache dave votten fattlean, tache uprant mukhel gaik nott'ttuvonar ho 'tallom vazoit purai proyogachim sutram samballotta, tache fattlean ujve votten 'morsing' namvachem vady dant-ontthanche modim dhorun usvasachea adaran tonddan dazoupi vadok asta. Nott'ttuvonara fattlean dave votten tomboro vazoupi asta. Nott'ttuvonarachea fattlean sohaiyok gaik va gayika bosta. Uprant vinna va vayolin vazoupi vadok asta. Vennuvadok aslear to donuy gaikanchea fattlean asta. Bhortonattyomant dakxinnaty songit pod'dot vaprotat.

Bhortonattyomantole bhavo he obhinoyan uktaitat. Angik, vachik, sat'tvik ani ahary oxe obhinoyache char prokar asat. Toxench bhortonattyomant mukheloponnan tin provah ekttham-i zaleat. 1) nottuva melleachem sodir natty. Deudasinche nrity mhonnttat te hench. 2) tonzaurchea bhagout somprodayak onnsorun kortat tem bhagoutomella hem nrityoprodhan natty ani 3) kurvonji namvachem gamvgirem natty. Hea tinuy provahanchem susomvadi mixronn mhollearuch bhortonattyom' oxem xastrache zannkar mhonnttat.

Minakxisundorom' pill'lloi, mut'tukomar pill'lloi, choklingom' pill'lloi, chondroxekhor rill'lloi, ramyea pill'lloi, kitt'ttpa pill'lloi he bhortonattyomantole namneche poromporagot nrityoguru. Gouri om'mall, balasorsvoti, rukminnidevi aeronddel, kolanidhi narainn, mrinnalini sarabhai heo namnecheo nortoki ani ramgopan ho namnecho nortok.

Yamini krixnnomurti ani podma subrohyomyom' heo halincheo namnecheo nortoki. Toxench komla, indranni rehman, sonol mansing, voijyontimala, hema malini heo namnecheo nortoki. Mumboicho nrityoguru parvotikumar hannem tonzaurchea moratthi razamni bhortonattyomakhatir boroil'lea moratthi rochnancher sonxodhon kelem. Tachich xixea ani namnecho moharaxttri-i nortoki sucheta bhidde chapekor himnnem sonxodhon fuddem chalu dourolam.

He kolechi udrogot korpapasot kaim kolasomstha vaur kortat. Bhortonattyomachem pod'dotoxir podvixikxonn divpi 'kolakxetr' hi namnechi somstha chen'nint asa. Egmor hangache 'inddiyon insttittyutt ef fain arttos' he somsthechoi ul'lekh korpak zai. Boddodechea videapittha bhaxenuch halinchea kallant mumboi videapitthanuy bhortonattyom' nachak uchch ani otyuchch podvekhatir mukhel vixoi mhonnun manyota dilea.

Polleiat[बदल]

Bharatanatyam

"https://gom.wikipedia.org/w/index.php?title=Bharatanatyam&oldid=199116" चे कडल्यान परतून मेळयलें