Gaionacho Jhelo

Gaionacho Jheleantlo ek gitachi nad

Gaionacho Jhelo zaun asa Goenche mha-dhormprantacho gaionacho pustok. Ho khup adim poiloch bhair kadlolo. 1993 vorsan novo ank prokashit kel'lo. Ho pustok Goychi Sevadhormik Somoti prokashit kortaKristi sevadhormik ritincho toxench ieram bhozonnik somorambhancho maz mhollear Jezucho Paskancho Gutt. Thoi Jezu vorvim, Jezu sangata ani Jezu thai Deva ani amche modem ekvott zaiteam khunnam udexim zata. Heam khunnam modli ek khunna mhollear Utor.

Utor ami zaiteam bhasamnim vaportanv ani git ek akar zaun asa. Git utrak ut'tom surupai dita ani he porim amchea kallzant xrextt bhavna utpon korta. Dekhun gitachem mol korun Bhagevont Paulu oxem boroita : "Povitr Atmean bhorlolim zaiat. Tumcheam zomatimnim stotram, gitam ani bhokti-gaionam gaiat, ani tumcheam kallzamnim gitam-gaionamnim Somiak vakhannit ravat." (Efez 5, 18-18; poile Kol 3, 16)

Git kallzachea sontosachi ek khunna (polle D.I 2, 46). Ani Bhagevont Augustin oxem boroita : "Gavop mogainchem kam." Adleanchi oxi ek mhonn'nni asa : "Gaita to don pavtti magnnem korta."

Heach pasot Povitr-Sobhen aple bhozonnent sodanch gitak mhotv dilam ani favo tea mapan tacho vapor kela. Git bhozonne voir ravunk favonam, punn gitam bhozonnechi chakri korunk zai. Mon'xank Devachea ekvottant bhitor kaddunk ani vakhann'nnecheo, toxench dukhicheo, mogacheo, visvasacheo, xanticheo bhavna utpon korunk dharmik gaionank boll asunk zai.

Hem sogllem ani he babtint Povitr-Sobhen diloli xikovnn monant dhorun, soglleamnim sevadhormik ani ieram Kristi bhozonnecheam ritimnim xitaben vantto gheunche khair, toxench zonn-ekleachea jivitak atmik faido mellche pasot, Goyche Sevadhormik Somitin ho GAIONANCHO JHELO toiar kela.

Poilech pavtt hem pustok 1967 vorsa uzvadda ailem. Veg-veglleam somoianr gavunk upkartat toslim ani bhovkorn Povitr Pustokantli sfurti gheun rochil'lim gitanm amcheam Kristi bhavam-bhoinninchea hatant ghalunk poilinch thaun ho GAIONANCHO JHELO xhapun kaddlo.

Oslim gitam vaddon-choddon sat avruti (1967, 1969, 1974, 1976, 1979, 1984, ani 1988) uzvadda aileo. He atthve avrutint sogllim mellun 515 gaionam melltat. Thoddim adlim ani thoddim novim ghalun sonkia vaddoilea. He pavtt gitanchi manddavoll nove pod'dotin kelea. He pod'dotint vibhag dakhounk okxoram vaporleant ani vibhagam pormannem kel'leam zomeamnim dor-ek git okxorankromim anklam. He toren fuddarak novim gitam chodd bodol korinastana vibhagam pormannem kel'leam zomeamnim ghalunk zata.

Gaionam adim "Loka Sangatim Misachi Manddavoll" xhapun dilea. Ti-i faideachi zavpak, amcho lok JHELO gheun him Misachim magnnim vhoddlea tallean mhonntolo mhonn ami axa ballgitanv.

Zaum sevadhormik ritimnim zaum iet bhokti-zomatimnim him gitam kallzant thaun gavun, toxench ekvoddeponnan tim niallun, Devacho ani peleacho khoro mog kallzant vaddtolo, dhormachim sotam monant khonchon rigtolim, ani kristi dhorma pormannem amchea dispottea jivitachi chal-ui bodoltoli mhonn bhorvanso. He porim, akhea jivitant ekach Povitr Atmean bhoron, Jezuk ekvotton ani Bapachi khori bhokti korun, sogllim Tachea ekcharant jieunk pavtoleanv. He kallzache khotkhotit otrek.

Sondorbh

Gaionancho Jhelo