Gorvancho Paddvo

विकिपीडिया कडल्यान
Jump to navigation Jump to search
ह्या विषयावयर देवनागारींत बरयिल्लें पान वाच : गोरवांचो पाडवो
Goenchea ganvamni divallechea utsovant somorpilolo ek utsovn. Hea utsovant gaianchi bhokri korpant ieta.Hea utsovak Dhendlo Padvo mhonnttat.

Gorvam paddvo mhollear rakhnneancho ani xetkarancho utsovu. Divalli ho dipotsov. Fantodder norkasur lasovn ghora-ghoramni diveanchi aras. Likpiki laitti, angnnant xenn sarouv rangolli ghalop, akaxdive lavpachi pod'dhot. Divalli, lokxmi puzon, bhavbiz, paddvo sogllinch monoitat. Paddveachi khori moja toxench tachi protha pollouvak Goenchea ganvgirea vattharant vochpak zai. Ti moja svota onnbhovlear khorea orthan paddvo monoilo hachem dhadosoponn monak bhogtolem

Rakhnneancho ani xetkarancho utsov[बदल]

Gorvam paddvo mhollear rakhnneancho ani xetkarancho utsov. Poilinchea kallar jea konnager gorvam chodd astalim tankam chodd girest mantale. Gavdde somazantle lok ektthaim ievn ho utsov monoitale ani azunui monoitat. Goem mhonnttanch amchem thett natem xetam - bhattamkodden volltta ani xetamantlim kamam korpak xetkarak gorvancho adar ani tachea koxttachi porotfedd korpak ho utsov ganvamni vhodda dobajean monoitat.

Dor vorsa lokxmipujechea dusrea disa gorvancho paddvo monoitat. Paddveachea disa gorvank fokt suseg divop. Tankam koslench koxttachemkam' korpak divop na. Oxem mhonnttat ki Goenchea xetkaracho adar mhollear gorvam ani tanchea kaim sangatachi porot fedd korop mhollear gorvanchi puja korun tankam tacho man divop ho bhavarth.

Gorvanchi puja[बदल]

Goenchea dhennleak xennapasun ghoracho nokaso toiar kortat

Paddvo mhonnlear gorvanchi puja korop. Paddvea disa fantodder utthun gottho dhuvun limp korop, Fulam ani ambeache talle lavn to sozovp. Divallek zoximami tel, uttnnem lavn nhatat toxench paddveak gorvank tel lavn nhann ghaltat. Nhalea uprant gorvank hollod - pimzor laun onvallttat. Tankam fulamni sozoitat ani tanchea fattir rongbirongi chitram kaddttat. Puje uprant gaichea golleak datt polle bandpachem xastr asa. He polle khas ukdde tandull ani udd'ddamchi dall ghalun kortat. Kaimvellan te polle kaddun ghorchea lokank toxemnch xezareank vantt’ttat.

Sot'tori[बदल]

Sot'tori talukeantlea Hondda ganvantlo ganvkar ,Sotu Ganvkar mhonntta ki thoim dhennlo nachoina punn xennapasun ghoracho nokaso toiar korta. Tantunt veg-veglleo kuddi ani gotthoi toiar kortat.Katt'tteank vir topun gorvam korun gottheant dovortat. Tonnacho rakhnno korun gottheant bosoitat ani bavlek saddi nesovn randchekuddant randta ti dakhoita. Hi bavli xennapasun toiar kortat ani tika lugttan sozoitat.Hea chitrant sangpacho hetu mhollear rakhnno vo gonvlli (gonvlli mhollear rakhnno) gorvank rakhta ani govllonn randchekuddant jevonn randta. Vorsapormonne gorvanchi ani rakhnneachi rakhonn mhonn tinkatrer ho gottho moddun ekuch xennacho thapo korun govllonn ani rakhnneak ektthaim bosovn divli vo ponntti pettoita. Mukhar ganvche ganvkar oxeim mhonnttat ki dor vorsa rakhnneak nal'l, tandull, ani kopddo ghalun tacho bhovman korpachi pod'dhot. Sanjevellar divli voa ponntti pettovn vorsachi rokxonnachi boghavoll.

Veg-veglleo kuddi[बदल]

Kulleam, Moleam ganvcho sodosio bab Umex Naik te aplea ganvchea paddvea bod'dol mhonntta ki te tullxi mukhar xennapasun ghorachi akruti rochun veg-veglleo kuddi toiar kortat. Tantunt gottoi asta. Katt'tteank vir topun tanchi gorvam korun gotthean dovorta. Bhatonnecho rakhnno toiar korta. "bhatonne " mhollear bhatachem tonn . Rakhnno gorvanchi rakhonn korta. Donparchea vellar tanka jevnnache pan dakhoita.Pan dakhovp mhollear xivrak jevnnacho nevodeo dakhovp hacher bondhon na, tor bhazlolem nustem vo nusteanche her jinos dhovea kopddeak bandun tachi pottli tea gottheamukhar dovortat jika "bhuti" oxem mhonntta. Zoso dhennlo nachot darant pavlo toso taka gond - ful korun nal'l tandllachi podd divpachi pod'dhot. Dhennlo nachot - gazot porot votana jevnnachi bhuti ghevn chalik lagta. "bhuti" mhollear jevnnachi bandloli pottli ghevn cholot ravta. Dhennlea borobor ail'le vangddi gottheatli gorvam mhollear katt'tteapasun toiar kel'li gorvam kaddtta , bhatonneacho rakhnno kaddun ghorar marta ani dhennlo ghevn vochpi monxeachea fattir katt'tti marta. Oxi tanchi pod'dhot. Mukhar Umex bab oxeim mhonntta ki "halim oxeim zalam ki adle zanntte gele, bhurge dhennlo nachta khorem punn te "tolli" vo "bhuti" vhorpache bhangoddik poddna. ("tolli" mhollear nal'l ani tandllanchi podd) vhorna mhonn atam dhennleak fokt poixe ditat.

Kaim kodden fokt tullxichea sobhonvtonni katt'tti manddttat ani modim Xri Krixnn devachi murti dovortat.He sogllem amkam Goenchea ganvgireavattharani pollouvak mellttat.

Ani ek gozal mhollear paddveak ganva-ganvani dheddlo nachovpachi protha. Kulleam, ontruz mhalantlea Prioll gavant, tivream ek lakddacho devaro ghevn tantunt Xri Krixnnachi murti bosovn ganvcho mukheli ani ganvche lok, protiek ghoran ho dhennlo ghevn bhonvta. Krixnnachich murti kiteak ghalop? oso proxn onekdam poddttat. Krixnn dev he gorvanche rakhnno he soglleankuch khobor asa ani teach karnnak lagun dheddleadis Krixnnachi murti ghevn dheddlo nachtat. Dheddlo kholleant pavtanch dheddlo gavpak lagta.

Kumbharzuvem ganvant

"De dheddlo,

dhennlea pavs xennlo

dhennlea ai mhatari

xelle un khatali

amcho dheddlo

gelo vangddi

kelleacho sali khavn pott rogddi

dita zalear dige maim

rogddo ghuvnnaita

attobor tandull 1 nal ......

De dhennlo

dhennlea pavs xennlo......

Kumbharzuvem ganvant[बदल]

Hea ganvant dhennlo nachovpachi pod'dhot soman asli tori dhennleache ghumttek rothacho akar tantunt chandichi Krixnnachi murti bosovn , rothak guddeo laita ani Hanuman murti rothar bosovn dhennlo ghoraghoramni nachoit bhonvta.

Dhemnnlo bhonvtona protiek ghoran devak dil'leo poddi mhonnlear tandull, godd nal'l hi soglli samagri ekechkodden ekhttaita. Ekhttaim kel'li hi soglli samagri dongrar vhorun, thoim chul ghalun eka topan goddxem korun soglleank vantt'tat.Krixnnacho prosad mhonn khavpak dongrar lok mud'da' zomtat. Dongrar goddxem randpa fattlo hetu oso ki poili rakhnne gorvank choronvk dongrar vhortale thoinch te kidteim xizovn khatale teach karnnank lagun dongrar goddxem randhpachi pod'dhot.

Oso ho Goenchea vattharantlo gorvancho paddvo zo veg-veglleo riti-pod'dhotin monoitat.

"https://gom.wikipedia.org/w/index.php?title=Gorvancho_Paddvo&oldid=176851" चे कडल्यान परतून मेळयलें