Intruz
| |
Romi
|
Intruz mhollearoch ‘karnaul’ (*) oxem mhonnum yeta. Tori astana ‘intruz’ oxem mhonnttale.Hem utor portugez intrude hachevelean ailam. Karnaval ho vhoddlo dobazo dhorlo tor intruz ho tacho ek vantto oxem manu yeta.
Intruz ho kiristamv gõykarancho utsou aslo, tori magh mhoineant kaim itihasik karnnank lagun hem namv hindunchea eka sonnakuy lailam. Ho kiristamvancho sonn aslo tori haka kiristamv dhormachi va igrjichi manyotai na.
Loksongit ani loknachachem daiz samballopi intruz hi moujechi porob, vhoddlea gõyamsaun 9 kimi. Ontracher axil'lea ddongri hea gamvant monoitat. Intruz mhollear kiristamvancho karnival zalo tori ddongrer zaupi intruz mhollear hinduncho xigmo koso monoitat. He porbek intruz hem namv koxem poddlem hevixim ek gozal sangtat ti oxi- ‘portugezanchea kallant gõykarancher khub bondhnam astalim. Ek porob monoupachi aslear sorkara koddlean manyotai gheunchi poddttali. Tatunt hindunchea porbek manyotai ditna portugez odhikari addmellim haddttale. Dekhun,jen'na xigmo korpak manyotai gheunk ddongrevelim zanntta monxam gelim, ten'na tanna xigmo mhonni nastona intruz monoupakhatar manyotai magli. Hea namvan portugez fottoule ani tamnni porob monoupakhatir manyotai dili. Ten'nachean ddongrevelea xigmotsovak ‘intruz’ hem namv mell'llem.
Karnival ani intruz heo porbo gõyant vangddach monoitat. Ddongrevelo intruz ho gõyantolo poilo xigmo. ‘sumvari’ ani ‘mell’ hankam lagun intruzak mhotv mell'llam magh mhoineachea krixnn pokxantlea poilea sukrarak hi porob suru zata. Hi porob panch dis cholta. Poile dis ‘fotteam-sumvari’ asta. Hea disa tea tea mattvantolo lok ekttham-i yeta. Vorsobhor bond axil'lim ghumttam,kasallim hea sarkim vadeam mattvant haddttat ani ‘fotteam-sumvari’ vazoitat. Taka fotteam- sumvari hem namv koxem poddlem tevixim ek gozal sangtat ti oxi – konknnit fottem mhollear kamboll.Intruzachea disamni ten'na khub thonddi poddttali. Dekhun, ghorche dadle ghora bhair sorta astana kamboll pangurotale. Kamboll (fottem) pangrun vazoil'li sumvari ti fotteam-sumvari. Tea disa her khoinchech dhormik suvalle korinat.
Intruzachea dusre disa xenvarak borench mhotv asa. Tea disa kitley pois gel'lo gamvcho monis sotri fulounk yeta. Hech ratim intruzache vidhink survat zata. Thoinchea panch mattvantole lok apaplea mattvant ekttham-i yetat. Guddeo, tornnam, obdagir sozoun dourotat. Divtti gheun kullavi toyar rautat. Xenai vazounk ani xing funkpak vonxporomporen kam' korpi lok thoim astat. Gamvche zanntte lok xantadurgek, gramdevo sakhlloyak, roullonath ani panch ponchixttank garannem ghaltat, sotrechea devak sotrer vochun bospachem avahon kortat. Uprant zhogzhogit diveanchea ujvaddant xemell, ghumott ani kasalleanchea avazan sotreo fuloitat.Uprant ho purai mell gamvantlean bhomvta. Vhoddlea bhattantleo tin ani dhakttea bhattantleo don oxeo panch sumvari vazot gazot intruzachea mattvant yetat. Thoim ek pimpllachem pedd asa, tachea mukhar yeun soglleo sumvareo vajtat.
Aitara dis porteo sumvareo yetat ani dorek ghoramukhar bhomvtat. Dorek humbreacher sogllea vadeanchi puza kortat. Sumvareo porteo mattvant yetkoch nattkak survat zata. Vhoddlem bhatt ani dhakttem bhatt hanga donuy kodden nattkache proyog zatat.
Somara sanjchi devichi palkhi kagdachea fulamni sozoun, ticher mennvati laun bonddachea talant gamvantlean bhomvddaitat. Ten'na sovaixinni bailo devik humvallun tichi hontt bhortat. Palkhi porti mattvant yetkoch nattkak survat zata.
Mongllara disa mell asta. Hea disa sumvari vazoinat, zalear dhol, taxe oslim vadeam vazoitat. Panchuy mattvamni jen'na ekttham-i mirounnuk vota, ten'na tankam mell mhonnttat.Budhvara dis gulal zata. Char disanchi vorsuki porob hea disa sompta. Nimnne soglle mattvant zomtat ani porob bore toren zali mhunn devak garannem ghaltat. Sotreveloya devak porto aplea zagear bospak sangtat. Birestarak sotyonarainnachi mohapuza kortat.