J P Souzalin

विकिपीडिया कडल्यान

J P Souzalin,zachem sarkem nanv mhollear Jose Pascoal Fernandes tea kallailo ek kolavont digdorspi. To ganvan Aldona, Calvim vaddeantlo. To 1903 vorsa zolmolo, ani mullavem xikop tannem aplea ganvchea iskolant Purtugezint kelem. To lhanuch astana tacho bapui somplo, ani Souzalin aple avoychech simpnnent vaddlo. Fuddem xikop korpak to Karachik gelo. (Tedna Karachi Indiechoch ek bhag aslo ani thoim xikpak mhunnon zaite Goykar vetale). Punn taka Inglez xikxonnachi titli avodd naslolean to Mumboint ailo. Bhurgeponnaruch tachea rogtant kola asa mhunnon zaite zannttele odmasaitale, karann to lhanuch astana chedram podd'dde koxe vapddun tiatr kortalo. Ani Mumboint ailea uprant taka aplea rogtantli kola dakhovpak soeg gavlo. Tannem apli poilich bhumika 'Romeo' virachea svogan keli. Ho tiatr zaun aslo Saib Rocha, hancho 'Romeo Ani Juliet'. Hea tiatrant ti bhumika korun Souzalinan borich namna zoddli.

Uprant anik eka tiatrant tannem 'Souzalin' nanvachea patrachi bhumika keli, ani lokank ti itli avoddlo, ki tea fuddem tiatr-pollennar taka Souzalin mhunnon pacharunk lagle. Ani he toren to Jose Pascoal Fernandes aslo to J P Souzalin zaunk paulo.

Survatek Souzalin ostorechio bhumika kortalo ani gitam-i gaitalo. Gitam gaitana to ostorecho tallo bes boro kaddttalo. Tachim zatim gitam HMV rikorddancher prosidh zal'lim asat.

Souzalinachea okhondd digdorsponnak lagon taka Cecil De Mille hea nanvostea digdorspeak sor kortale. Adlea kallar Mumbointlea Bhangwaddi aslelea 'Princess Theatre', hea tiatr-ghorant tiatr dakhovp mhollear ek vhodd bhag aslem. Tannem heach vosreant ekech sirvisechea disak (weekday) 'Sam Francis Xavier' hea aplea tiatrache tin proyog kele (sokallim-sanje-ratri) ani tinui show 'houseful' zale, je vorvim mhunnom ieta tannem tedna akhkhea sonvsaracho nattkancho rikordd moddlo.

Tannem sumar 40 ek tiatr boroun digdorxit keleat, ani dor eka tiatrant kitem nam kitem novem dakhovpacho proyotn kela. 'HEM ASA TEM' ho tacho ekuch tiatr, Bhangwaddi machier 27 pavtti zal'lo. Khub novea kolakarank tannem machier haddleat ani tantlo eklo mhollear 'Goa's Melody King - Alfred Rose'.

Souzalin ek okhondd digdorspi. Tannem je pod'doticher tiatr boroileat, tosle atam polleunk mellunk bhov muskil. Tacho tiatr borovpacho vixoy mhollear choddxe dhormik tiatr asle, ani takach lagon to palkar chodd gazlo. Tachea thoddea lovkik zal'lea tiatranchim nanvam zaun asat: 'DREAM OF LISBON', 'HEM ASA TEM', 'DADLO VHODD VO OSTORI?', 'SAT DUKHI', 'PAI TUJEA TONDDAN MAGUN GHETLAM', 'ASNODDCHO KISTULO', SAD AMORECHO', 'NIMANNIO CHER VOSTU', 'PAICHI CHUK VO MAINCHI?' 'PATKANCHEM DAR', 'DEV BAPACHI DHUV', 'OXENCH KELEAR SUDHROT GOEM', 'SEZARNI HO GO DODLACHO?' 'ESSUA ANI JACOB', 'KHOTTI SONGOT', 'HANV TO MHAPXENKAR', 'FILOMENACHEM SOPON', 'XEVTTEAK POLLEUN JUSTIS', 'DEKHO XETT UKA AUROT', 'CONDE DE MONTE CRUZO', 'JESUS ANI JUDAS', 'PA. AGNEL', 'PANCH MISTER HORKACHE', 'BHAGIVONT JUZECHI KHORVONT', 'SAM FRANCIS XAVIUER', 'SANT ANTN', 'TIKLEM CHEDDUM' ADI. ADI. Morchea adim MISACHI BHETT ho tiatr to borovpachea kamant gul'l aslo.

Poilo to aple tiatr Mumbointuch dakhoitalo. Punn 1965 vorsant Janerachea mhoineant tannem aplo 'Sat Dukhi' ho tiatr poilech pavtt Goy bhor dakhoilo. Uprant tannem 'Hem Asa Tem' ho tiatr dakhovpak survat keli. Hea tiatra khatir taka Goyant boro vankandd favo zalo. Tea uprant magir itihas. Tachea tiatrank prekxokanchi khett. tiketti mellonastana zaite pavtti prekxokank niraxi zaun p[orot vechem poddttalem. Machi nettovpak ani bore bizleche dekhave dakhovpak taka lagtolo dusro digdorspi naslo. Tea bhair tea kallar aiche porim tontrik ani bizle vevostha nasli. Prekxokanchi kuvet monant dovrun to aplea tiatrache proyog zatat te pormonnem fuddem-fuddem tiketichi dor komi korit vetalo khoim, je vorvim sogleank aple tiatr pollevpak soeg mellche khatir. 1970 vorsa Julayache 18ver Souzalinacher avchit moronn ailem. Aple zaite anvdde to monantuch dovrun gelo. 'Sam Francis Xavier' ani 'Sant Anton' ho apleo tiatr Goyant dakhovpak ani 'Asnoddecho Kistulo' he tiatr Mumboint dakhovpak tachio rattavolli choltalio. Tech borobor aplo tiatr 'Misachi Bhett' borovpak hatant ghtolo, punn chintinastanam ho amcho akhant tiatr digdorspisomplo. Tachea oslo ekloi digdorspi Konknni machier zolmunk nam mhollear otitay zaum nezo. Aplea digdorsponnachea jivitant tannem aplea boroborchea soglea digdorspiank haloile.

Itlem asun, tache he artik lagon Goychea sorkaran mat kainch korunk nam. Mumboint, Dhobitalao to ravtalo te eke golliek tachem nanv ghatlam.

Polleiat[बदल]

Nirmon

"https://gom.wikipedia.org/w/index.php?title=J_P_Souzalin&oldid=199437" चे कडल्यान परतून मेळयलें