Juanvachem Poilem Potr
| |
Romi
|
|
First Epistle of John
Chouthem Xubhvortoman boroilem tannench hem Potr boroilam. Hantum kitem boroil’lem asa tem-bi bariksannem polleunk gelear, hem Potr Juanvachench mhonn tthavem zata. Dhormdut koso, ho borovpi odhikaran boroita. Tea bhair Xubhvortoman ani hem Potr borabor dhorlear, totvam tinch ani bhasui tich mhonn dixtti poddta. Hem sogllem lokxant gheun, zannaranchem mot oxem, ki hem Potr Juanvan Xubhvortomana matxe adim vo matxe uprant boroilem dista.
Jezu khoro Devacho Put, hea sota vixim apnnem kitem boroil’lem tacho ugddas korunk, khorea dhormacher add bhavarthiank ghott korunk, dhaktte Aziechea Kristanvank hem Potr Juanvan boroilem. Tea ganvchea povitr-sobham modem khotte xikovpi ani provadi upraslole-xem dista. He Kristache virodhi; Jezu Soddvonnar ani mon’xasoimb ghetlolo Devacho Put mhonn te manun ghenasle.
Hea Potrachem mull-totv mhollear hem: Dev, Jezu Krista udexim, amkam vollkhunk mellta; mhonnttoch jim konn Bapachea ekcharant jieunk sodtat, tim monis zal’lea Puta udexinch hea ekcharant bhitor sorunk pavtolim.
Tea bhair, hea Potrant anink tin sotam netan ugddapim keleant : Dev mhollear Uzvadd, Dev Nit ani Dev Mog. Mhonnttoch, Outa udexim Bapa kodde amkam ekvott zai zalear, ami uzvaddant, nitint ani bhavam-bhoininchea mogant jieunchi goroz. Jim konn Jezu Devan makhlolo ani monis zal’lo Devacho Put nhoi mhonnttat, tantam to fottkire ani Kristache virodhi mhonntta.
Heram vostum modem, to pritimogachem vortepon vakhannta ani to khobor korta to Devacho mog peleachi opurbai korun dixtti poddta toslo. Hea bhair, Devachim bhurgim konn ani devcharachim bhurgim konn, tim koxim dokhol zatat, ani xekim patki mon’xank koxem bhogsonnem mellta, tem to dakhoita.
Hea Potrachi manddavoll oxi :
[बदल]Prostavna : 1: 1-4
Uzvadd ani kallokh :1: 5-2:29
Devachim bhurgim ani devchargachim bhurgim : 3: 1-24
Sot ani chuk : 4: 1-6
Mogacho kaido : 4: 7-21
Bhavarthachem zoit : 5: 1-21