Judasachem Potr

विकिपीडिया कडल्यान
हुपून वचात: दिशा-नियंत्रण, सोद
ह्या विषयावयर देवनागारींत बरयिल्लें पान वाच : जुदासाचें पत्र

Epistle of Jude

Apunn Jakobacho bhav mhonn sangun, hea Potracho boroinnar vachpiank apli vollokh korun dita. Mhonnttoch ho Jakob Potrachea vachpiam modem bhov vollkhicho ani bhovman zoddlolo monis zaunk zai. Konn to ? Polea xenkddeant Jerusaleache povitr- sobhent Jakob nanvacho dusro konn xrextt monis naslo, bogor Jakob Dhormudut, Jerusaleache povitr- sobhecho Vhoddil vo Gonglli-Bap. Ho Dhormdut mhollear “Dhaktto Jakob”, “Jezuchea bhavam” modlo eklo. Judas, hea Potracho boroinnar, tea Jakobacho khaxa bhav vo laxilo soiro zait kai? Kiteack mhollear Matev(13/55) ani Marku (6/13) somiachea bhavam modem eka Judasachem-I nanv ditat. Luk, aplea Xubhvortomanant ani Dhormdutanchea Itihasant, dhormdutanchim nanvam ditana, donim-I vollerimnim Judasak “ Jakobacho put” mhonntta; mhonnttoch tachea bapaichem-I nanv Jakob aslem astolem (Lk 6/16, D. I. 1/13 polle). Heram Xubhvortomananche boroinnar hea Dhormdutak “Tadev” mhonnttat ( Mt 10/1-4; Mk. 3/13-19). Ho “Somiacho bhav” ani Dhormdut Judas ekuch zait kai ? Ani veglle zatit zalear-ui, hea Potracho boroinnar khorench tanche modlo eklo zait kai? Hea prosnank Povitr Pustokachea xastriam modem veg-vegllim motam asat.

Konn-ui zaum to boroinnar, ho “Judas” ekach ganvche povitr-sobhek aplem Potr dhaddina: tem veg-vegllea sobham modem bhonvddaun vachpachem mhonn gomta. Aplea vachpiank Adlea Korarachi ani Judevanche poromporechi bori vollokh asa mhonn ho lekhok somzota. Tori Tem fokot Judevam modlim Kristanv zal’lim tankam hem Potr tannem boroilem mhonn sangunk zaina. Portench zalear, zaun tankam zaum videxiam modlim Kristanv zal’leank, Palestinant vo Dhaktte Aziechea ganvamnim aslolea povitr-sobhank, hea Potrachi xikovnn ani xiddkavnni to diunk sodta.

Hem Potr mottvem khorem, punn tea Kristanvam modem upraslolea prosnanchi khobor korta ani hankam nitt zobab dita. Povitr-Sobhent thodde xastr-virodhi upzol’le ani tanchea khottea xikovnnank lagun hea Potrachi goroz zali dista. Jezuchem khorem mon’xasoimb te manun ghenasle, ani Jezu ekloch Dhoni ani Somi mhonn tea plea khottea jivitan nakartale. Kristi sot’tiechim nib gheun, te kamcharak lobhdol’le. Moriadik jivitachea sogllea kaideanchi te vat laitale.

Polleiat[बदल]

Sandarbh[बदल]


[1]

[2]

  1. http://www.usccb.org/bible/books-of-the-bible/index.cfm
  2. http://www.archgoadaman.org/bible/14
"https://gom.wikipedia.org/w/index.php?title=Judasachem_Potr&oldid=161603" चे कडल्यान परतून मेळयलें