Milagrincho Khuris - Borea Dekhavechea Dongraracho

विकिपीडिया कडल्यान
Jump to navigation Jump to search


Borea Dekhavechea (Boa Vista) Dongraracho Milagrincho Khuris[बदल]

Febrerache 23ver, 2019 hea vorsa Boa Vista – Borea Dekhavechea Dongrar Milagrinchea Khursacher umkolltea Jezuchem disnnem zalear 400 vorsam bhorlim.

Hea disnneachi khobor korchie adim anikui zal'lea disnneachi thoddkeanuch khobor : amchea purvileaitihasachea panamni boroil'li mella. Goy xarant poilech pavtt Daujimhea Madre de Deus Franciskan Kapuchos fradinchea Motthantli Khursar asloli imag Goychea poilea Arsebisp Gaspar de Leao Pereira lagim uloili mhonn sangtat: hem ghoddlem 16vea xekddeant. Dusrem disnnem 1619vorsa Febrerachie 23ver zalem, tem Boa Vista dongravelea Khursacher, ani Jezuchem tisrem disnnem zalem tem Santa Monikachea Motthantlea Kapelant 1636 vorsa, Pracyhit Kallachea poilea Sukrara. Tea disa Khursaveli Jezuchie imajin aple dolle ugoddle an dukham ani rogot vhanvlem. Hem disnnem 1636 vorsacho Setembr 22ver porian zaite pavtt distti poddlem. Kochincho Bisp Minguel Rangel tedna Goyche Arkidiosezicho karbhari also. Tannem, Goychea Up-Raza Pedro da Sila ani heram odhikareamni pollelem. Oxem sanglolem asa ki hachie uprant Goa Xarachen padd zaunk laglem.

Milagrincho Khuris[बदल]

Xarachie Udente vatten ho Borea Dekhaveacho Dongor asa, Thoim thavn ak'kem Goa xar disti poddta. Ho dekhavo (view – Vista) nazuk, zhadam-peddamni bhorlolo dongor. Sokoilo bhonvtonnecho lok voir aplo vell sarunk vetalo zait dekhun Se Katedralachea Vigaran Fr Manuel Rodriguesan savlleacho ek 22 futt lambayecho khuris korun eka khoddpacher ghalo. Ho khuris itlo unchaer also ki to Divadde, Piedade, Naroa ani Malara disti poddtalo mhonntat. Hea khursa vixim ek tondd-kotha asa ti oxe: ho khuris gorvam rakhnneamni maddachea piddeacho khuris korun ghal'lo to vaddunk laglo. Hi loka modem choltoli khotha.

Khursacher umkolltea mon'xachem rup[बदल]

1619 vorsa, Febrerache 22ver, Khursa bhonvtim vochitr khunnam disunk lagleo. Sokoll nodint zaitio patmari (botti) asleot. Auchit lokak khursacher tambddea rongachim bonderam ubtolim disunk laglim. Dusrea disa 23ver Divaddechea lokan Khursa bhonvtim veglloch kirnnancho uzvadd pollelo. Sumar sokallchea 9 vaztam foujecho voiz Dr Pedri da Silva ani tacho sevok Antonio tea dongrar choddtale. Tea sevokan Khursacher monis umkollta to pollelem. Khursavelea mon'xachi nodor xaracher asa ani khuris soglloch davean ani uzvean hallta tem pollelem. Tea voizal apli nodor sarki na oxen dislem ani tannem sokoilean vetolea Simao Borgesak apounk dakoilem ani pollelam tem khorem mhonn khatri zali. Borges aple vatten ghelo pun Dr Pedro ani Antonio Khursasorxim gele tea velar Khursacher kainch dislem na.

Dr Pedro tea Khursa mullim dimbi ghalun magnnem kortana tannem Khursak veng marloli tacheam atvoch pormoll ailo. Uprant zaito lokui thoim gelo ani tosloch pormoll tannim onnbhovlo. Katedralant vavurtoleamni vizanv pollelem.

Arsebisp Cristovam de Sa e Lisboa haka gomtoch tannem ghoddloli khobor Dr Pedro da Silva lagim vicharun ghetli ani Arsebisp ani her odhikari Khursa sorxim vochun chovkoxi kortoch to khuris Uzvaddache Saibinniche Igorgent vhorun dovrunk sanglem. (hi Igorz atam thoim na) Don dis porian tie igorjent soglleamni magnnim kelim.

Arsebispan disnneachi choukoxi korunk somiti nemli ani soglli sarki choukoxi zatoch ek odhikrut dakllo toyar korun soio korun arsebispan to dakllo Mayachie 7ver, 1619 vorsa soi kelo. Punn tori stana Arsebispak anik khatri zai dekhun portun nitidarank ani Igorjechea odhikariank haddun boska ghetli ani soglleamniekach motan ti khori milagr mohnn Arsebispak khatri dili. Tea uprant Arsebisp ani soglle Katedralant thanv pursanv korun Uzvaddache Saibinniche irgorjent gele szaim to khuris dovololo, thoim Dobajik Mis bhettoilem Arsebispan ti disnneachi jahir porgottnni keli.

Khuris Se Katedralant[बदल]

Jezu distti poddlolo tea zagear ti igorz bandun Febrerache 23ver 1671 vorsa to Khuris portun nove igorjent haddlo. Uprant Agustinian ordichea fradimni ti Igorz Oratorian padrink dili. Marques de Pombalan dharmikancher bondi ghali tedna 1843 vorsa Mayache 3rer to Khuris Boa Vista dongravele igorjentlo kaddun Se Katedralant vhelo ani Soddvondarachea Povitr Somacichea Kopelant altara fattlean ubo dovorlolo aa.

1961 vorsa Janerachie8ver tem 16 ver St Jose Vazachia mornnachim 250 vorsam somarombhlim tedna Dom Jose Viera Alvernaz Patriarkan ek satollem jahir kelem ani Milagrinchea Khursache Igorje lagim Boa Vista dongrar Mis bhettoilem. Teda thanv dor mhoineachie 23ver sokallim Mis bhettoitat ani dor vorsa Febrerarche 23ver Se Katedralant thanv prachitachem pursanv korun dongrar vetat.

Sorgest Fr Pedro Filomeno Soares-ak visrunk zaina. Tannem Khursachi igorz moddot pavloli ti dusrust keli, ticho patos dhamplo, rosto kelo ani udkacho noll voir haddlo. “Hangasor Oratorian jive zaunkuch zai” oxem Fr Filomeno Soares-an mhunlolem aiz xat'tipavlem. St Joseph Vas Spiritual Centre thoim voir sorlo.

Sondorbh[बदल]

Vauradeancho IxttIFebrerbrer 23, 2019