Nag Panchami
| |
Romi
|
Nagponchom' xraunnachea xudhd ponchmik monoitat. Xraunn mhoino suru zaun soglleant poilim yeupi ho utsou. Hea ponchmi disa ghoramni nagachi puza kortat, taka lagun tika ‘nagponchom'’ va ‘nagponchomi’ oxem namv poddlam. Ved kalla saun ho utsou monoit aileat. Hea sombondit sabar kanneo aikuvopak mellttat.
- xri krixnn jen'na kalika nagak porajit korun yomuna nhoinchea patallatlean sukhrup bhair ailo to dis xraunn xudhd ponchmicho axil'lo. Tea disa saun nagpuza korpak survat zali oxem mhonnttat.
- panch yugam poilim ‘sotyexvori’ namvachi ek devi axil'li. Ticho bhavo nagponchomichea adlea disa somvsarak ontorolo. Tea dukhan tinnem tea disa on'nacho konn pottant ghetlo na. Hea khatir, bhoinnin nagponchomichea adlea disa aplea bhavak dirgh ayuxy prapt zaunchem hea ud'dexan upvas korun devak magnneantolean vinoilo. Hea disa nagachi puza korpa fattlem karonn mhollear, sotyexvorik aplo bhavo tea disa nagrupat dislo. Ten'na tinnem tea nagrupak aplo bhavo manlo. Tea vellar nagdevan soput ghetlo ki, ji bhoinn taka bhavo manun tachi puza kortoli tichem to rokxonn kortolo. Haka lagun hea disa bailam nagrazachi puza kortat. Nagponchom' xudhd xraunn ponchmik monoitat
hea nagponchomi vixim purannant ek kotha asa. ‘tokxok’ nagan kel'lea opradha khatir kheast mhunn raza zonmezoyan sorpoigone suru kelo. Hatunt tannem sogllea sorpanchi ahuti divpak survat keli. Tokxok nag aplo jivo vattaupa khatir indrakodden gelo. Razan “indrai svaha, tokxai svaha” mhonnun indrodevachi legit ahuti tokxok naga vangdda dili. Hatlean, opradh korta ani tachem rokxonn korta to legit opradhi hem dakhoun dilem. Astik rixin razak top korun prosn'n kelo.Zonmezoyan jen'na taka vor magpak lailo ten'na astik rixin sorpoigone thamboupacho vor maglo. To dis xraunn xudhd ponchmicho aslo ani heach disa xri krixnnan kalia nagacho vodh kel'lo.
Horxim nag vixari punn, bharti-i somskritit nagak devo manla. Nagponchomi disa bailam nagachi puza kortat.