Pri. Tomas D'Aquino Sequeira

Pri. Tomas D'Aquino Sequeira (Juli 3, 1953-Septembre 9, 2013) ek Goenkar ponddit ani songitkar.

Bhurgeponn

Toh Marsache 7ver, 1973 vorsa Corlim-Tisvaddint zolmak aile. Bhurgeaponnar tanchem mullavem xikop ganvche sorkari sallent Portugejin zalem. Dha vorsanche piraier Saliganv seminarint padri zavpak khatir tannim proves kelo. Hanga sov vorsam sarlea uprant tannim Raiturche seminarint sat vorsam padriponnachem fuddem xikop ghellem. Abrilache 30ver 1976 te padri zale.

Huxar, Sallganv ani Duler

Te ginnean motte huxar ani urben xikpi asle. Taka lagun te chodd korun padriponnachea akarnnechea ghoramni vavrunk pavle. Sallganvche seminarint perefeit koxe ani Dulerchea Seminary Niwasant kharbhari koxe.

1982 tem 1986 vorsamni tannim Romak, Pontifical Biblican Institute hantunt Biblechea vixes xikpant Licentiate in Sacred Scripture keli. 1986 tem 2000 Raiturche seminarint xikxok koxe, 2000 tem 2005 Reitor koxe ani uprant ek voros Utorda ganvant Vigar koxe te humedin vavurle.

Sinod, Biblechem baxantor, adi

Thoddo kall tannim Goenche Sevadhormik Songit Somiteche ani Goenchea Sevadhormachea Kendrache vangddi koxe vavr kelo.

"Goeant jen'na Fevererant 2002 vorsa Sinod (Porixod) zalo ten'na tannim tatunt ek mhotvachi zobabdari choloili. Goeant Biblechem Konknni bhaxantor korpache somiteche te vangddi asle. Bibleche babtim tannim torekvar xibiram choloilim ani ulopam kelim. Dusreo mhotvacheo zababdari choloita astanach te Diocesan Centre for Biblical Apostolate hea khateachea chittnis zale. Ten'na tannem "Vomp'pi" hem Biblecher adharun nemallem uzvaddak haddlem. Biblechea xetrant tannim mathem marun boro vavr kela," oso Pri Lino de Sa boroita. (Renewal, Novsorni, Renovacao, November 16-30, 2013, Vol LI-22, p. 23)

Songattachi bazu

Pri Tomasachea jivitachi anik ek loklokit bazu mhollear songattachi. Songitachea mollar te ek boreantle bore songit rochpi ani songitachi manddavoll korpi. Tanchem songit sarkhem kallzachea pallam-mullamni romb sarkem. Tanchea songitant ek kherituch odd ani ruch asa.

Songita bhair te ek monzull ani thorthortea talleache gaiok. Te bore guitar ani church organ vazoupi. Tannim kaim opperettank, dhormik gitank, natalgitank, lokgitank ani dusre torechea gitank songit rochlam. Hantlea tanchea thoddea gitanchem songit "Panchgita" hea Pri. Lino de Sa'chea postokant melltta. Bhov thoddem tanchem songit Devachea Bhurgeanchim Gitam hatun aspavlolem asa.

1998nt tannim Gavana (Gavpi-Vazoupi-Nachpi) ho ek lokgitancho pongodd aplea fuddariponna khal ghoddlo. Ho pongodd ghevun kaim vorsam legit tannim Goenchi Konkani, Goencho nach ani Goenchem songit bhailea desamni fankoilem. Tanchea pongoddeacheo panch songit CD asat.

CBCI-chea mandollachem up sorv chitnis

Pri Tomas 2006 tem 2012 Delhik, Bharoti Katolik Bispanchea Mondollache Up Sorv Chittnis (deputy secretary general of the Catholic Bishops' Conference of India) asle. Jivitant tanchi mokh sodanchi odik ani odik sopurnnaicher asli. Xikpachi ani zanna zavpachi xim' tankam ken'nach lago nasli.

Californiant doctorate

Delhik aple zuttiecho kall somptoch te 2012 Biblechea vixes xikpant "doctorate" korunk Californiache Berkley Vidheapittent bhitor sorle. Thoim xiktana boraboruch te St. Bernard, Tracy, he firgojent Parochial Vicar mhonn aplem padriponnachem munniarponn choloitale. Oxem sodanchem jivit jietana tankam nokollttana ek kankrachi pidda lagli ani te begin Setembrache 9 tarker hea sonvsarak ontorle.

Setembrache 28ver, Vodd'lem Goem, Se Catedralant, Goenchea Arcebism Filipe Neri Ferrao hanchea mukheliponna khal char Bismamni ani sumar donxim padrimni tanche khatir Mis bhettoilem. Tancher apli nimanni nodor ghalunk ani tankam adeus korunk hea Misant lokanchea ani madrimchea chombeamni vantto ghetlo. Tanchem kuddichem nikhepop tanchea zolm-ganvant (Corlim) kelem. Yem entry Pri. Lino de Sa-an borilem lekhacher modd'dot mell'i mhunn dinvasi.