Sant Juze Vaz

विकिपीडिया कडल्यान
Jump to navigation Jump to search
 
Romi
   
Saint Joseph Vaz, C.O., Apostle of Ceylon
Sant Juze Vaz

Sant Juze Vaz Kristi Povitr Sobhecho ek sant. Goyche bhuier zolmol'lo poilo-voilo sant. Konknni somazcho niz Goykar to. Abrilache 21 ver, 1651 vorsa, Sukrara disa, Bannaule ganvant tacho zolm zalo. Atthvea disa, hea supurlea bhurgeak Bannaule, Juanv Batistache firgojent Povitr Snan dilem ani taka JOSE (Juze) hem sobit nanv dilem. Hea Povitr Snanacho somarombh Pri. Jacinto Pereira hannem somarombhlo. Avoi-bapai borabor, bhavarthan bhurgeak vaddounk Sebastiao Vaz (podon) ani Esperanca de Miranda (modon) hannim zobabdari ghetli.

Kuttumbachi Vollokh[बदल]

Vaz Ghorabeachi Vollokh[बदल]

Christopher Vaz ganvan Sankvallecho. Tachea purvozamni Kristi bhavarth apnnailear nnovod (90) vorsam zal'lim (1567) Adim tanchem add nanv Naik aslem, atam Vaz. Adinch thaun tanchea kuttumbak vhodd man aslo; ho man-abru tannim tosoch rakhun dovorlolo. Hea kuttumbachem ek khaxeleponn mhollear magnneachem jivit. Devak magnneantlean tim bhoztalim. Dhumpacho pormoll zoso choddta sorgar, tosoch tancho magnneacho pormoll soglleak fanktalo ani tanchea zonn ekleachea jivitant disun yetalo. Hea kuttumban Kristi bhavarth vengoilear zorui nnov’vod vorsam zal'lim, torui tancho bhavarth boroch adlo koso distalo. Thoddkeant sangpachem mhollear magnneak tim poilo-voilo zago ditalim. Tancho bhavarth ujea bhoxen bhog-bhogtalo. Rit-rovixecho ani kristi totvamni bhorlolo bhorlolo to ghorabo.

Miranda Familichi Vollokh[बदल]

Maria de Miranda, Bannaule ticho ganv. Hichem logn Christopher Vaz, hache lagim zal'lem. Bannaule ganvant bhavarth khub vorsam uprant posorlo (1581). Hea-i kuttumbant magnneak kherit zago aslo. Bhavarth tancho bhov okhondd, toxench bore xistin ho ghorabo choltalo. Dusreanchea huskean jiyeop, tanche gorjek pavop, hi doyall kornni hea kuttumbak khub avoddtali

Tache Vixim Bhakit[बदल]

Supurlo Juze zolmuche adim tachea bapaik attvench kitem tori bhoglem. Heach aplea bhurgea vixim tannem aple familiche dispottier (dairy) oxem boroilem, "Eka disa ho mhozo put mahan monis zatolo”. Heach supurleachea zolma vellim tachea bapain don'parchea vellar choddtem noketr pollelem. Povitr Pustokant provadeamni Jezu vixim bhakit kelem ani hem bhakit Jezu vorvim xarthi pavlem. Toxench Juze Vaz-achea bapain kel'lem bhakit Juze vorvim xarthi pavlem. Adlea Korarantlea provadiank hem bhakit khaxa onnbhovunk mellunk na punn Christopher Vaz haka hem thoddkeant onnbhovunk mell'llem. Jen’na Juze Vaz yadnik zalo ten’na tachea bhakitak foll ailo.

Juze Vaz-achem Bhurgeponn[बदल]

Lhanuch astana supurlo Juze magnneachea vatavoronnant vaddlo. Bhurgim lhan astona avoichea dudan vadddtat hem khorem. Mannkulo Juze Vaz avoichem dud piyetam-piyetam sobond ghorcheam koddlean bhavarthachem dud piyelo. Juze Vaz-ak don bhav ani tin bhoinnim asleo. Teach borabor tachea bapaicheo don bhoinnim randd asleo teo heach ghorant ravtaleo. Teo ghorantlem kam’ kortaleo ani toxench bhurgeam-ballank bore toren vaddounk vavurtaleo. Zaite pavtti Gõychem mannik Juze Vaz tankam forsar kortalo, aplem vachop aikunk. Juze Vaz chodd korun bhagevontanchea jivita voir vo atmik vatten vadd zatat toslim pustokam vachtalo.Vachop kortana vhodde ruchin ani huxarkayen kortalo. Taka aikotolim tankam, tachem aikot ravchem oxem distalem.

Magnneacho Porzoll[बदल]

Gõychem Noketr Juze Vaz lhanuch astana magnneachea mogan bhorlolo. Povitr Pustokant oxem mhonnlolem asa, “Tum magnnem kortai ten’na ... gupit kelolem polleta to Bap tuka mozuri ditolo" (Mt. 6:4). Chodd korun to aplem magnnem gupit kortalo. Tachim bhavnnam nhidun sust zalea uprant to magnnem kortalo. Sokallim utthun toxench kortalo. Dusrim bhurgim khelltat zalear to eksure svater vochun magnnem kortalo. Aplo vell magnnean sarunk taka bhov umed bhogtali. Eka disa oxem ghoddlem. To aplea ghorant darache kuxik vo fattlean, konnak disona toso magnnem kortalo. To magnneant boroch gul'l zal'lo. Tachea bapain na kolltam, dar zoran ugoddlem. Supurlo Juze sarkoch chidd'dolo, taka mar laglo khoro punn apleak dukh zalea mhonn dakhoun diunk na.

Tachi Huxarkai[बदल]

Juze Vaz xikunk huxar aslo zaum Sankvalle vo Bannaule.Tache xikoupi tachi tust kortale. Aple huxarkayecho labh to fokot apnnakuch dovrinaslo bogor jim bhurgim xikpant unnim aslint, tankam to bore toren somjikayen xikoitalo. Tankam bore toren somzoupacho taka kherit gunn aslo. Konnui bhurgim mosteponna kortat zalear, xikoupi taka dusreanche kan vollunk vo dusreanchea hatancher pott'tti marunk sangtale ten’na to soglloch movalltalo.Taka toxem korunk borem disonaslem. Ken’na-ken’nai to xikovpeak kolltam-na-kolltam apnnacher martalo. Eka disa tachea vhoddlea bhavache kan vollunk sanglem ten’na, tannem mhollem, "Hanv tache poros mottvo asa. Mhoje hat pavonant”. Xikovpean taka bankar choddun toxem kor mhonn sanglem ten’na tannem mhollem, "Mhojea vhoddleam sovem toxem korunk mhaka puttvona." Juze Vaz Latin xikunk Bannaule aple avoichea ghora gelo. Thoim to vhodde huxarkayen ani umedin xiklo. Vorgant (class) toxich vorga bhair tachi xist ekdomuch bori asli. Lhanvikai tachea jivitan noketra vorim porzolltali.

Vedi Sevok Dublleam-Mogi[बदल]

Juze Vaz, Sankvalle astana taka goribam ani dublleam sovem zaito husko dakhounk mell'llo. Konnui bhikari tache samkar ubo zalo zalear to tankam khuxal kortalo. Aple boxientlem pasun jevonn kaddun to tankam ditalo. Hem dusreanche nodre-bhair korunk vavurtalo. "Tuzo uzvo hat kitem korta tem dhavea hatak kollonk zaina”. Hech utram vorvim Povitr Pustokache dixen to vagtalo.

Jen'na to Bannaule gelo, ten’na osle soeg zobor mellunk nat. Ek mat taka odik faideachem zalem tem mhollear igorjecho mog. Sodanch misak vantto ghevop, vedi-seva korop.Konnui vaddeant melo zalear tache pasot magunk to fattim soronaslo. Dusreank-ui magunk to huskaitalo.

Tachea Boraborcheam Borabor[बदल]

Khella poros magnnem taka odik avoddtalem. Tache boraborche bhurge taka man ditale kiteak to heram bhurgeam bhoxen tovnaxiponnam korinaslo, vaitt utram (gallio) uloinaslo. Soglleank to bore toren lekhtalo. Tachim xezarim taka mogan pachartalim. Tachi bhoktiponnachi vagnnuk soglleank mandtali. Tachim ghorchim taka mogan "Santulea" (dhakttulo sant) mhonn ulo kortalim. "Ho bhurgo koslo utortolo-so tumkam dista? To zaitea zannank Deva-xim portun haddtalo" oxem lokak tachea vixim bhogtalem.

Polleiat[बदल]

Saint Joseph Vaz

"https://gom.wikipedia.org/w/index.php?title=Sant_Juze_Vaz&oldid=191590" चे कडल्यान परतून मेळयलें