Shivaji
Romi
|
Xivaji Maharaj, bhosle ghoranneantlo ek xrextt raza ani hindvi svorajeacho sonsthapok.
Zolm' ani bhurgemponn[बदल]
Fevrerache 19ver, 1630 hea vorsa Pune hanga tancho zolm' zalo. Tacho bapuy Xohaji ho survek adiloxahint zalear uprant nizamoxahint subhedar podacher aslo. Xivajichim poilim kaim vorsam Xohaji vangdda Maharaxttrant ani Kornattokant gelim. Xivaji sov vorsancho astanam, Xohajin Jizabai vangdda taka Benglurchean Puneak dhaddlo. Tachi dekhrekh korpa khatir Xohajin Dadoji Kondd'devachi nemnnuk kel'li.
Xivajin Dadojichea hata khala rajy' karbharachem xikxonn ghetlem. Toxench aplea zohagirichea mulukhant vosuli pod'dot veusthit bosoili. Xivajichem bhurgeponn tachi Auy Jizabai hiche vangdda gelem. Tachem xikxonn-ui ghorach zalem. Jizaba-in taka Ramayan Mahabharotantleo kotha sangun tachea monachr kxatrot anne borensomskar ghoddoun haddle. Hatuntlean-uch Xivaji Maharazachea monant svorajeachim bhavnnam nirmann zalim oxem sangtat.
Svorajy[बदल]
Xivajin svorajeacho vaur suru kel'lo tedna bhartant mukhelponnan Muslomanachich razvott axil'li. Survek, Xivajin Konkann dorea-deg, Soheadri ani Maull hea dongri prodexantuch svorajy ubarpachem tharail'lem. Te khatir tannem Maulleank ektthaim korun aplem soinik ubarlem. Toxench bhonvtonnche kil'le ghetle. Ut'tore koddchem Mogol ani dokxinne koddchi Adiloxahi he tache mukhel dusman axil'le. Punn gonimi ddaupech ankhun, tanchea vhodd soineak tanchea vhodd soineak Xivajin aplem rajy vaddoilem.
Xivajichi vhoddvik sangpi ani tachea sangateanchea porakromachi tokhnnai korpi Ofzhol Khanacho vodh; baji probhuchem bolidan; xahistekhanachi fojeti; tanajichem bolidan; agrachean suttka heo kaim prosid'd ghoddnnuko asat. Xivajichi vaddtti prosid'di polloun Aurongjeban nimanne kodden Mirzharaza Zoising haka vhodd soinik diun dokxinnek dhaddlo. Mirzharazan dilerokhanachea adaran purondor kil'leak revaddo ghalun, Xivajik kil'leacheruch bondkhonnint dovorlo.
Moglanchea vhodd soinea mukhar aplem soinik nikami thortolem hem zannun nimanne kodden xivajin mirzharazakodden itihas prosid'd purondor koblat ghoddoun haddli. He koblatik lagun Xivajik aple ordeavoir kil'le moglank divche poddle. Toxench Xivajin moglancho fokot zohagirodar mhunn ravcho oxi ott ghali. Uprant Mirzharazan taka ani Sombhajik bollzoborin agreak vhole. Uprant Aurongjeban tankam nodrokoident dovorle. Xittuksannen apli suttka korun Xivaji portun Puneant ailea uprant tannem aplem rajy vistarchem dhoronn tatpurtem bond dovorlem. Punn kaim kalla uprant portun rajyovistarachea vaurak laglo.
Zoisingakodden zal'le purondorache koblatint tannem jem kitem vogddail'lem tem sogllem portun melloilem. Toxech anikui nove mulukh hatasole. Aurongjeban xivajicho paddavo korpache khub yotn kele. Punn Xivajin te soglle moddun uddoile. Agreachean ailea uprant Xivajik dinddori, salher, mulher him vhodd zhuzam korchim poddlim. 1672 to Xivajin Xri Somrath Ramdas Svamichea sohvasant kaim temp sarlo. Ramdasan taka rajy' vevostha, loksongrh, rajkaronn ani yer vixoya sombondim gurupodex dilo.
Rajeabhixek[बदल]
Xivaji Maharaz jednam apleak rajeabhixek korpak mukhar sorlo tednam taka kaim sordar ani zohagirodarankoddchean khub virodh zalo. Tachea kxotriyt'tvabod'dol monant dubavo aslo. Te taka raza mandpak toyar naxil'le. Dekhun tannem kaxicho mahaponddit gagabhtt'tt haka apoun haddun dhormxastrachea adaran aplem kxotriytv sidh kelem. Uprant jyextth xu. 13 xukrovar xoke 1596 hea disa apleak rajeabhixek korun ghetlo. Xivajin tea vellar rajy choloupa khatir oxttoprodhananchi nemnnuk keli. Tanchi volleri oxi.
- Mukhy prodhan
- Amaty
- Senapoti
- Pondditoravo
- Neayadhix
- Sochiv
- Montri
- Sumont
Toxench rajeabhixekachea nimtan xivajin ‘hon‘ ani ‘xivrai‘ oxim don nannim poddlim. Rajy' karbharachem madhyom' svobhaxent aschem mhunn tannem rajy' veuharokox uzvaddak haddlo. Aplem svorajy vaddoitanam taka Purtugez, Ddoch, French ani Brittix hea porkiankodden-ui songhorx korcho poddlo. Te khatir taka zhuzari tarvam bandchim poddlim. Toxench malounn lagsar doreant Sindhu durg ubarolo ani Rotnagiri, Podmo durg, Vizoi Durg koddlean ani her kodden navik kendram nirmann kelim.
Rajeabhixeka uprant Xivajiche choddxe dis vaitt gele. Tachi bholaiki ibaddl'li. Jizabaik moronn ailem ani tacho put Sombhaji moglank mell'llo. Punn bholaiki sudarlea uprant tannem dokxinn koddche jinji, velor he prodex gheun rajy' vistar kelo. Toxench kutuboxahi ani adiloxahi kodden bore sombond sthapit kele. Punn uprant tachi bholaiki portun ibaddli ani tantun-uch taka moronn ailem.