Sod vavr ani tachem mhotv

विकिपीडिया कडल्यान

Sod vavr borovpi sodanch sodta, punzayta, topasta, parkita, foddnni (analysis) korta, mellovnni (synthesis) korta ani je nixkorx (conclusions) melltat, borovpi aplie pod’dotin te loka mukhar dovorta. Boro borovpi sodanch xikpi, chintpi, sod lavpi ani novem ghoddovpi, vegllem kitem tori divpi, aplem khaxeleponn samballpi asta. To novem polleta, vo adlem asa tem nove nodren polleta, tacher niyall korta.

0. Sod vavrachem mhotv: Sod vavr korun kelolie khoinche-i borpavollik lambay, runday, kholay ani unchay asta. Haka lagun borovp, vachpiank chodd faideachem zaum yeta ani aple vichar manddta. Haka lagun vachpiancher vhoikari (positive) probhav poddum yeta. Tanchi vachpachi ruch bodlum yeta. Tankam novi dixa ani nodor mellta. Sod vavrak lagun borpavollicho panvddo sudarta ani dorjedar sahitya toyar korunk hatbhar lagta .

1.0 Sod vavr keloli Romi Konknni borpavoll: Romi Konknnint sod vavr korun keloli borpavoll kaim promannant asa. Jezvit Padri Antonio Pereirachim pustokam ghetlim zalear tantlim chodd-xim pustokam tannem sod vavr korun boroyleant. Dekik Saibinnicher boroylolem pustok Dhortorevoili Sundori; Fuddari:Sant Inas de Loyola; Kalljidar:Sant Fransisk Xaveir; Jezuchim Komllam:Jezvit Sant Bhokt; Kunkollechea Jezvit martirancher boroylolem Saxttichi Tambddi Mati; Zuze Vazacher boroylolem Zatrekar Jose; Gõyche Dhortorevoilo Pri Agnel; Gõychem Mannik:Padr Agnel; Konknni Xastri Dalgado; Konknni Oparinchem Bhanddar; Anvddeancho Monis: Sant Vincent Pallotti ani her tachim kaim pustokam.

Jezvit Padri Moreno de Souzan boro sod vavr korun Tisvaddecheo Igorzo[1]; Bardescheo Igorzo ani Saxtticheo Igorzo bhag 1 ani 2 buk boroyleat. Fr. Ave Maria Afonsochem Rendermam’ ani Tachem Jivit; A. Carvalhochem Madd ani Tacho Upiog; Nevil Alphonsochem Nal’lachi Lagvodd, Fr. Planton Fariachem Kunkolle Ek Mahan Ganv, Jezvit padri Matthew Almeidachem Romi Lipient Konknni Kors[1], Bonaventure D’ Pietrochem Songit Doulot Goenkaranchi, Jose Pereirachem Konknni Bhagti Gitam he buk sod vavr korun boroyleat.

Sod vavr koso korcho ho prosn zaitiank poddta. Sod vavr kortoleamni poilim apnnakuch kaim mullave ani mhotvache prosn vicharunk zay ani tanchio zapo sodunk zay. Te prosn he: 1. Mhaka kitem zay? Hoch prosn matso vegllie toren vicharum yeta. Mhaka khoinchea vixoyacher sod vavr korunk zay? 2. Mhaka to vixoy kiteak zay? vo to vixoy hanvem kiteak vinchla? 3. Tea vixoyak lagu zaloli mahiti mhaka khoim melltoli? Konna lagim melltoli? Kitli melltoli? Kednam melltoli ani ti koxi melltoli? 4. Punzaylolie mahiti thaun kitem ani kitlem hanvem gheunchem? 5. Ti mahiti hanv kitem kortolom/lim?

Hea prosnanchea zapancher adarun sod vavrak hat ghalcho poddta. He voile prosn ami fokot sod vavr kortanam mat nhoy bogor jivitant vinchnni korchea vellar vichartanv. Orthabhorit jivit jiyeunk he prosn chodd gorjeche ani faideache.

Ek boro lekh, pustok, kotha, kadom’bori, nattok, tiatr boroytanam vinchlolea vixoyacher sod vavr korun boroylear ti borpavoll borich kholayechi ani probhavi zata. Dekik Gõyche roste ani bazar nitoll korpi kamgaranchea jivitacher ek kadom’bori borounk konnem fuddakar ghetlo zalear tannem/tinnem tea kamgaranchi bhas thoddi tori xikchi poddtoli. Uprant tanchea ghoramni vochun tankam mellun tanche lagim uloun, tanchem jivit, jivita kodde tanchi nodor, tanche prosn, tanchio oddchonni, tanche achar, riti-rivaz somzun ghevun, tannim kam’ korchea zageamni vochun tanchi kam’ korchi rit, thoinchi poristhiti somzun gheun tanchea jivitacher adarun ani apli thoddi kalponikota (imagination) vaprun bori kadom’bori borounk zata.

Sod vavr don prokarancho asta. Poilo bhitor bosun kelolo sod vavr. Oslo sod vavr korpi apleach ghorant bosun vo vachpa ghoramni vochun pustokam, nemallim vachun, vebsaitti polleun sod korta. Dusrea prokaracho sod vavr asa to moll obheas (Field study). Hea prokaracho sod vavr korunk zaite kodde vechem poddta.

2.0 Sod vavr korchi rit:

2.1 Vixoy vinchop: Vixoy vinchtanam voir dilolea prosnanchio zapo motint dhorchio poddtolio. Te bhair ani kaim gozalincher chit diunchem poddtolem. Dekik, vincholea vixoyacher obheas korunk mhoje lagim kitlo vell asa? Obheas korchi takot mhoje lagim asa? Obheasa khatir pois vechem poddtolem? Obheas korunk zay aschim sadhonam mhoje lagim asat vo mhojea vottharant tim melltat? Obheas korunk kitlo khorch lagtolo? Hanvem vinchlolea vixoyacho konnak ani kitlo upyog zatolo? Sod vavr korunk mhaka konn vatt dakhoytolo/li? Sod vavr kortoleamni hea prosnank zapo sodunk zay.

Sod vavr korunk vixoy kaim unne nant. Te sodun bhonvchi goroz nam. Te amchea vottharant vo ganvantuch melltat. Tantle kaim vixoy he. (a) Parom’parik dhon’dekar: render, poder, kharvi, nustekarni, goddkarni, kharem vikpi, kum’bar, paddeli, fulkar, pede, moddvoll, vollar, khajekar, mhale, sakristanv, murtikar, dudkar, xinvpi, vinnpi, lohar, sonar, sutar va thovoy, kuroikar, ghaddi, rong lavpi, adi. Hantlea khoinchea-i eka dhon’dekarachea jivitacher, vavracher ani tanchea khaxelea utrancher sovistor mahiti diunche bore lekh vo pustokam borounk zatat. (b) Tiatr, khell tiatr ani nattok: Ekek tiatrist va nattokkar gheun tannem/tinnem sador kelolea tiatrancher, khell tiatrancher ani nattkancher sod vavr. (c) Tiatr ani nattok machie pattlean kam’ korpi kolakar. (d) Kantarist, kesetti, CD, ani DVD. (e) Konknni filmam. (f) Konknni bhokti gitam ani tanche rochpi. (g) Konknni borovpi ani tanchi borpavoll. (h) Konknni Lokved:mhonni, humannim, kannio, gitam, khell, pallnnea gitam, bhurgianchim gitam, kamgaranchim gitam, kazarachio ovio, galli,... (i) Gõychea ganvchim nanvam ani tanchi utpot’ti. (j) Vivid somazachio chali riti, vidhi ani achar. (k) Vivid somazachim jevnnam khannam, pivnnam ani nhesnnam. (l) Parom’parik nach: manddo, dekhnni, zagor, khell, muslla nach, divleancho nach, intruz, kalo, dhalo, fugddi, xigmo, romttam mell, ghodde moddnni, virbhodr, gof, kunnbeancho nach,… (m) Gõychem soimb: ruk-zhaddam, fulam, follam, bhajio, suknnim, pisollim, jivannim, masllio, nhonyo, tollim, dongor, manso, voktam, ran mon’zati,... (n) Konknni nemallim. (o) Prosar madhyomam: reddio, TV hea madhyomamni Konknni. (p) Gõycho xiklolo Kristanv lok Konknni ulounk, vachunk kiteak pattim sorta? (q) Konknni bhaxent Farxi, Arbi, Portugez, Kon’nodd bhasanchi utravoll. (r) Gõychea igorzancho, kopelancho ani mon’dirancho itihas. (s) Dharmik ani samajik vidhi: ladin, rayanchem fest, Korezmant zavpi pas, santancho pursanv, Gõychea Saibachem noven ani fest, Sant An’n Saibinnichem fest (tovxeanchem fest) Mhapxeanchem Milagris Saibinnichem fest, São João, sangodd, chovot, divzam, Peddnnecho dosro, Zambavllecho gulal, Fatorpeanchi zatra, Xirganvchi Lahiraichi zatra, Boddgeshvarachi zatra, Maxelantlo chikol kalo, Sivolecho zagor, Mhaddollchi Kojagiri Punov, tullxichem login, Kunkollechio sotrio, dinddi,… (t) Adlim kazaram ani vidhi. (u) Gõyche kil’le ani itihasik zage. (v) Gõychim adlim ghoram ani tantlio vostu. (w) Sollavea xekddeantli Konknni bhas ani borpavoll. (x) “Opinion Poll”, Rajbhas chollvoll, iskolamni Konknni xikop, hantum Romi lipi vaportolea lokachem yogdan. (y) Sonvstha ani tancho Konknni vavr: Konknni Bhaxa Monddoll, Dalgado Konknni Akademi, Goa Konknni Akademi, Kala Academy, Sahitya Akademi, Thomas Stephens Konknni Kendr,Tiatr Academy of Goa… (z) Dharmik Sahitya: igorzantlim gayonam, sermanv, magnnim, vachpam,…

3. Sod vavrachi ankhnni: Vinchun kaddlolea vixoyacher sod vavr kortanam tacho vistar kitlo astolo, sod vavr korchi rit, vellachi ani khorchachi yevzonn hancher vichar korcho poddta. Dekik renderacher obheas korunk vixoy vinchlo zalear, akhea Gõychea render somazacher obheas zatolo vo tharavik vottarachea renderancho obheas zatolo hem tharaunk zay. Render somazak som’bond zalolea sorv vixoyancher obheas zatolo vo kaim vinchlolea vixoyancher obheas zatolo hem adi fuddench chintunk zay. Toxench tea obhyasant sur kaddchi rit, surechi fenni, godd ani xirko korchea ritincho aspav astolo vo na hacho-i vichar zaunk zay. Renderanchim kantaram, avtam (tools) ani tanchea vavrak sombon’d zalole achar, vidhi ani dharimik riti hancher sod vavr zatolo vo na tem tharaunk zay. Jitli sod vavrachi ankhnni bori zata tea mapan sod vavr boro zata.

4. Mahiti ekttaim korop: Mahiti mellche zage ani mahiti ekttaim korchi rit oxe don bhag hea vixoyant aspavtat.

4.1 Mahiti mellche zage: Sod vavr kortanam kalponik vichar vo purave naslolim motam manddunk zainant. Puraveancher adarun aple vichar manddche poddtat. Purave mellunk mahiti ekttaim korchi poddta. Sod vavrak zay, ti mahiti amkam vachpa ghoramni (libraries), doftorkhaneamni (archives), sorkari khateamni, vostu songrohaloyamni (museums), khasgi songrohamni (private collection), prodorxonamni (exhibitions) mellta. Toxench molleamni, bagamni, kullagoramni, xetamni, dongramni, ganvamni ani soimbant mellta. Toxench ti mahiti zannkaram lagim, zannteam lagim ani tea tea vixoyachea mon’xam lagim vochun ekktaim korunk zata. Reddio, TV, CD, DVD, kesetti, fotte, chitram, filmam, vebsaitti oslea prosar madhyomamni (mass media) amkam mahiti mellta.

4.2 Mahiti ekttaim korchio riti: Mahiti ekttaim korchio kaim riti asat. Sod vavrachea vixoya pormannem mahiti ekttaim korchi rit vinchchi poddta. Tantli ek vo eka poros chodd riti vaprun mahiti ekttaim korunk zata.

4.2.1 Prosnavoll(questionnaire): Prosnavoll toyar korun zanche koddlean amkam mahiti zay tankam ti dhaddchi. Mahiti boroun zatoch, tim mon’xam prosnavoll amkam pattim dhaddtat. Hi pod’dot vaporlear somest mon’xam amkam zapo boroun dhaddtolim hachi khatri nam. Prosnavoll gheun ami mahiti ditolea mon’xam lagim vochun zapo boroun ghetlear kam’ vegim zata ani sarkem zata. Amchea khatrechea mon’xank torbeti (training) diun tanche lagim prosnavolli diun zapo boroun haddunk laylear kam’ azun vegim zata.

4.2.2 Mulakhot: Mahiti ami mulakhot gheun ekktaim korunk zata ani tantlean khup mahiti mellounk zata. Mulakhot ami tonddi vo fonar gheunk zata. Mulakhoti vellar ami mulakhot ditoliank kaim prosn vichartanv ani tanchea zapancher adarun tankam fuddle prosn vicharunk zatat. Fonar ghetlole mulakhoti poros mon’xank mellun tonddi mulakhot ghetloli chodd faideachi.

4.2.3 Nirikxonn (observation): Zea vixoyacher amkam sod vavr korunk zay tea vixoyak som’bond zalolea zageamni vochun, nirikxonn korun ami mahiti ekttaim korunk zata. Nirikxonn don prokaramni korunk zata. Vantto ghevpi nirikxonn ani vantto ghe naslolem nirikxonn. Vantto ghevpi nirikxonnant, nirikxonn kortolo vixoyant vantto gheta. Dekik dhaleacher obheas kortolo/li dhaleanchea gitamni ani nachant vantto gheun svotachea onnbhovan sod vavr korta. Vantto ghe naslolea nirikxonnant, sod vavr korpi dhaleachea manddar veta ani fokot dhalo polleun obheas korta.

4.2.4 Stithi obheas (case study): Eka mon’xacher, ekie sonvsthecher va eka somudayacher kholayen obheas kortanam stithi obheas pod’dot vaportat. Vixoyacho pattlo itihas, tachi vaddavoll, tache prosn, oddchonni, ani onnbhov hancher sod vavr korcho poddta.

4.2.5 Nomuno obheas (sample study): Jednam vixoyacho vistar khup vhodd asta, tednam soglleancher obheas korunk zainam. Oslea vellar kaim nomune gheun tancher obheas korun nixkorx kaddche poddtat. Dekik Gõyant bhurgim aplem iskolachem xikop ordear kiteak soddtat ho vixoy gheum-ia. Iskol soddlolea bhurgeancho ankddo vhodd aslolean dor eka bhurgea lagim vochun obheas korunk zaunchem nam. Mhonntoch taluka pormannem kaim sorkari ani khasgi iskolanche nomune gheun obheas korcho poddtolo. Hea obheasachea adaracher jeral nixkorx kaddche poddtat.

5.0 Mahitichi vanttnni: Ekttaim keloli mahiti khup asum yeta. Tantli amkam khoinchi gorjechi ti vinchun vixoya pormannem tiche lhan lhan vantte korun, foddnni ani mellovnni korun nixkorx kaddche poddtat. Nixkorxancher adarun puraveam soit amche vichar toyar korunk zatat.

6.0 Sod vavracher adarun borpavoll: Sod vavrachem kam’ zatoch mell’loli mahiti ani nixkorx vaprun lekh, pustok vo her borpavoll korum yeta. Sod vavr kortanam vixoyak som’bond zalole her prosn vo vixoy upzaleat zalear te lekhant manddlole bore. Haka lagun fuddem her konnak tea vixoyancher sod vavr korunk vatt ugti zatoli.

7.0 Sompovnni: Konknnichi borpavoll dorjedar zaunk zay, tika kholay zay, her bhasanchea panvddeak ti pavunk zay tor sod vavr chodd gorjecho. Lokak kitem zay tench amche borovpi dit ravle zalear te posorkar zaun urtole. Apnnem lokak kitem diunk zay hacho vichar korche borovpi sod vavr korun apli borpavoll kortole ani itihasant takotdar ani vicharvont borovpi mhonn omor zatole. Amchea tornattea borovpiamni sod vavr, aplie borpavollichi buniad korun ghetli zalear Romi Konknni sahitya unchlea panvddear pavtolem. --Pratapnaiksj (talk) 10:01, 6 April 2014 (UTC)

suchi[बदल]

  1. 1.0 1.1 Published by Thomas Stephens Konknni Kendr, Alto Porvorim, Goa

Polleiat[बदल]

"https://gom.wikipedia.org/w/index.php?title=Sod_vavr_ani_tachem_mhotv&oldid=200013" चे कडल्यान परतून मेळयलें