Touxeanchem Fest

देवनागरी

Romi

Touxeanchem fest tollauli gamvant vhodda dobajean sant anachem fest monoitat. Toxench agond, bodd'ddeam, olaule,porra ani fonddeant hem fest monoitat.

Toxem pollounk gelear 26 zuloi hea disa purai somvsarant hem santinnichem fest monoitat, punn gõychea sogllea lokank hem fest mellchem mhunn santan tollauli hea gamvant hem fest 26 zuloi hea disa aitar ailear, na zalear 26 zuloi hea disa uprant yetlea aitara monoitat.

Hozarani lok hea festak yetat. Kristamv lokambhair hindu dhormache lokuy hea festak ayil'le pollounk mellttat. Hea festa fattlean axil'li ek vilkxonn porompora az legit cholot ailea. Zaitim tornnattim halinch logn zal'li toxim bhurgem naxil'lim ghovo bailam hancheo zoddeo hea festak yeun aple angounnicheo denngeo zoxem kuler, hudd'dda dall, touxim, kanknnam (chuddo) jezuche ajyeche murte mukhar dourun magnnim kortat. Choddso lok bhurgeanchea dennea khatir ani boro ghorkar va bori ghorkan'n mellchi mhunn magtat. Choddxea zannanche magnnem purai zata ani sant anank argam ompotona tel, vati, dhup, nal'l ani fulam bhettoitat.

Him magnnim ani denngeo bhettoupachi chal purtugezanchea kallar suru zal'li. Him magnnim tea kallar purtugez bha bhaxentlean mhonnttalim. Dekhik – chole lakddache kuler va chomcho bhettoun SENHORA TOMAI COLHER, DAI MULHER oxem mhonnttale. Mhollear saibinni, ghe hem kuler ani mhaka ghorkan'n di. Choleo mutthbhor huddid bhettoun SENHORA TOMAI URIDO, DAI MARIDO oxem mhonnttalim. Mhonnlear saibinni, he ghe huddid ani di mhaka ghorkar. Novich kazari ani ani bhurgem naxil'li ghovo baileche zoddpem touxem bhettoun SENHORA TOMAI, PEPINO, DAI MENINO oxem mhonnttalim, mhollear saibinni, ghe hem touxem ani di mhaka bhurgem. Him kaim magnnim soddlim zalear anik ek magnnem amkam melltta tem mhollear SENHORA TOMAI, DAI FILHA mhollear saibinni, ghe him kaknnam ani mhaka dhuv di.

Toxinch anik ek porompora polloupak melltta. He poromporent logn somskar ghetil'le ghovo baileche zoddpem chuddo bhettoun tanchea kazari jivitant xanti ani saibinnicho axirvad ascho mhonn magtat. Sant ana hika choleanchi, bhurgem naxil'lea zoddpeanchi, gurvar bailanchi, vauraddeanchi dhoninn mantat. Toxench sant anam kazari jivitant xanti sambhallun dourota, ghovo baile modi zaupi zhogdde pois korta oxem lok manta.

Ghorkan'ni khatir kuler va chomcheachi denngi

Hi porompora yeuropant chodd korun vels hea vatthrant choltali. Thoinche tornnatte apnnem aplea hatani toyar kel'lem kuler choli ghetlem he axen chole voranchi voram kuler toyar korpant sartale. Tem kuler cholyen ghetlem zalear te cholyek to cholo manoula oso orth zatalo ani hanga saun tanchea mogachi survat zatali. Uprant cholean cholyeche kalliz jikhlear tem kuler moladik oxem manun tanchea ghorache khoinchey eke vonnttik laitale. Tor heach visvasan apnnak ek bori choli va ghorkan'n mellchi mhonn chole sant anak kuler bhettoitat

Cholo va ghorkarakhatir hudd'ddanchi denn

Huddid ho ek jeunnacho podarth. Oxem mhonntta adlea kallar khoinchyai suvalleak choleo choleam khatir jeunn vaddttaleo ani hache voilean choli tea cholea ani tachea ghorcheamvixi kallji dakhoitali. Choleak cholyen kel'le jeunn ruchik laglem ani toxem tannem tika sanglem zalear tea choleak ti choli auddlea oso orth zatalo ani uprant ghorantole vangddi tanche soirigotichi toyari kortale. Haka lagun choli hudd'ddanchi denngi divn apleak boro ghorkar mellcho mhonn magtali.

Bhurgeam khatir touxeachi denngi

Touxem bhettoup mhollear pruthument utopn'n kel'lem foll bhettoup. Santan tollauli hea gamvant pausalleant vegvegolle torechi touxim zatat ani hench foll lok sant anank bhettoitat ani bhurgeachea dennea khatir magtat.

Cholye khatir ani novea kazarancher besamv poddpa khatir kel'li chuddeanchi bhett

Bhartantole porompore promann choddxeo bailo kanknnam ghaltat. Chodd korun lok sant anak chuddo bhettoitat. Adim sangil'le promann sant anam ghovo – baile modlo mog vaddoita. Tankam sambhallotta. Sonkxttam pasun pois dourota ani tanche modlo ekoutt vaddoita. Hea karnnak lagun lok chuddo bhettoun apli magnnim sant ana vorvi deva mukhar dourota.