Vailankanni Saibinniche Basilika

विकिपीडिया कडल्यान
हुपून वचात: दिशा-नियंत्रण, सोद
Vailankanni Church, rear view
Vailankanni Church, center view
Vailankanni Church, front view
St Sebastian Church at the entrance of the city

Vailankanni Saibinniche Basilikecho Ithias[बदल]

Vailankanni Bholaikeche Saibinnichem devosponn koxem suru zalem tache voir kainch boroilelem mellonam. Soglli khobor ji amkam mellta ti zaun asa fokot porjecheo porom-porecheo ( mhunnge eke pindkent thavn dusre pindkent kollit kel'leo sangnneo )


Sangtat tea pormonnem sollavo xekddo sompot ieta tednam ani sotravea xekddeache survatek, Ankvar Maria don pavtti dixtti poddli ani hea disnneam somoiar tichem devosponn suru zalem .


Ankvar Mariechem disnnem poile pavtt eka hindu bhurgeak kollit zalem. Sod'dam sokallcho utthun ek dudacho buddkulo' ghevun ho burgho Nagapattinam mhunntat tea ganvant dud vinkunk vetalo; ho ganv sumar sov mailo ( miles ) Vailankannicho pois urtalo. Ek dis apunn dudacho buddkulo ghevun vetana, Vailankannichea "Ana Pillai Street" mhunntat tea zagear pavtoch, apun thoklolo dekhun thoddo-so visov ghevunk tannem evjilem, ani thuim ek vhodd zhadd aslem tache savlle khala to add poddlo an dudacho buddkulo laginch dovorlo. Niglolo astana ek zum'zumit varem suttlem ani to nidun aslo to zago soglloch porzollit zalo ani tannem tea vellar dolle ugdddun ek vizmit pollelem ani tem mhunnlear ek sobit Ankvari apleam hatamnim ek bhurgem ghevun taca dixtti poddli. Hanstea tonddan tinnem tache lagim aplea putak ilem-xem dud diunk zata zalear vicharlem. To bhurgea, tea vellar bhirantin ani khuxalkaen bhoromn dudacho buddkulo kaddun tiche lagim dilo. Ti ostori tea bhurgea hansli tache bhair, tinnem anik kosloch sondex utramnim taka diunk nam.


Hem ghoddtoch urlelem tem dud ghevum apli vatt Nagapattinam vochunk bhair sorlo ani disachea-disa tachem dud viktem ghetalo tea hindu dhoniager pavtoch, dhoni tacher tiddlo karann dud-ui tannem komi haddlelem ani uxir korun pavlolo. Dhonian vegim-veginch to dudacho buddkulo ghetlo ani bhukelelea aplea dhattulea bhurgeak tem diunk ghelo. Tednam oxem ghoddlem ki to buddkuko dudan apxinch bhoron-bhoron, dud bhair otonk laglem. Tednam to dhoni bhurgea sangata vegim-vegim Ankvar Mai disleli tea zagear vochunk bhair sorlo. Tea zageak aiz pasun Amche Saibinnichi Talay( Our Lady's Tank) oxem mhunntat. Hi khobor lokachea kannant poddtoch Ankvar Marie thaim ek vhodd mog tanchea kallzamnim xizunk laglo.


Dusrem disnnem ː Thoddinch vorsam he poile ghoddnne uprant, anik pavtt tich Saibinn Mai, eka tonnttea hindu bhurgeak dixtti poddli. Vailankanni ganvant ek 'Nadu Thittu nanvacho zago aslo ani thium ek anjirachem zadd (fig tree) aslem, ani tem zadd tevxilean veteleank aplea panachea savlle khala asro ditalem. Tea thonttea bhurgeachi avoi taka sodam sokallim thium vhorun tea zaddachea mullaxiam dovortali ani to babddo thontto zaunnui dud-mosko vikapachem kam' kortalo. Eka gormechea disa oxem goddlem ki zomnintlean uzo koso ghormi bhair sorta ti tannem dekhli, auchituch tea bhurgean ek uzvadd pollelo, suria-on odhik porzollit, ani to uzvadd tache fuddean ieta-so taka dislem. Bhirantin bhoron bobhav marun, lokacho adhar tannem maglo... Punn tachi bhirant rokddich nam zali, karann tachea fuddean ek sobit ostori aplea hatamnim ek bhurgem ghevun tannem polleli.... ti taka vhoddle apurbaien hansli ani apnnak ilem pieunk tache laghim tinnem maglem. Tednam tea bhurgean tika pieunk diun tiche mukhar to sorpott'lo. Tea fuddem tinnem tea bhurgeak mhunnllem ː "Ho zago hanvem vichun kaddla mhoje porjek zaitem borem hanvem korunk. Tea uprant tinnem taka Nagapattinamak dhaddlo ani eka katolik mun'xak apunn dixtti poddli tea zagear ek igroz bandhunk sang mhunn tinnem taka sanglem. Soggloch dukha-bhorit zaun tannem mhunnlem ː "Hanv choltolom ?" Tednam amchi Sorginchi Avoi tea bhurgeak hansli ani mhunnlem ː "Utth ani hanvem sanglam tea pormonnem kor." Hem aikotoch tachea paiank ek novi ghottai aili ani to khuxalkaen uddio marunk laglo.


Hea dusrea disnneak lagun porjechea kallzant ek vhodd mog ani bhavarth upzolo. Tika Bholaikechi Saibinn (Arokia Matha̠) oxem mhunnn sogllo lok pacharunk laglo. Tea katolk dadleak adle ratri oslench ek soponn poddlelem ani tea sopnnant Sorginche Avoin tache lagim toch upkar maglolo. He ghoddnnecho sodanch ugdass korunk ani Saibinnichea magnneak kan diun tea zagear ek dhakttuli Igorz bandhli ani tea disnneant disleli toslich Ankvar Mariechi ek murti korun mukhel altarar dovorli. Zaiteam zageancho lok tea uprant thuim ektthaim zaun Ankvar Mariechi tust kortalo ani tiche fuddeant apleo gorzo ghaltolo.


Portugez nov-nov doria sodun kaddunk laglet tea kallar (mhunnge sollavea-sotravea xekddeamnim) ek portugez tarum Makau-ak thavn Ceilanv-ak vetanam eka merekar moddak sampoddlem, ani hea moddantle Devanuch ek vismit korun sambhallum ietalet. Tednam tannim maglem. Ankvar Marieche mozotin bhavartan kel'lem magnnem Devan aikolem ani tankam tarum-soit, soglleank nivarle ani he porim te soglle Vailankannichea doria deger pavlet. To dis mhunnlear Setembrachi att tarik, Ankvar Mariechea zolmacho dis. Te igorjent bhitor sorlet ani soglleank moddantle suddoilet dekhun Ankvar Mariek ekach tallean te dhin'vasle ani hea edea vhoddlea upkara pasot tannim Ankvar Mariek ek angovnn keli, dhakti igorz asleli tiche suater ek vhoddli igorz bandhunk ani igorjecho altar odhik bore bhaxen nettounk.


Dusre pavtt novean bhett diunk portun ailet tednam novea kopelacho vaur tannim sompoilo ani porcelanachea boximnim tannim altar nettoilo. Tea porcelanacheam boxincher povitr pustokantlim sobit chitram dixtti poddtalint. Aple upkar Ankvar Mariek attounk teo boxeo dil'leo teo aiz pasun Basilikechea mukhel altarar dixtti poddtat.


Team portugez tarvotteamnim kopel bandhlelem tem uprant 70 paim x 22 paim itlem vaddhoilem, punn adlo povitr zago (sanctuary) ani altar toxech sambhall'let.


1920vea vorse tich igorz anikui vaddhoili, he pavtt chearui vattamnim, eka khursa porim ani don noveo 'gothic' minar 82 paim unchean Padri Sebastia de Noronha-hannem ubharleot. 1933 vea vorsa, modhlea altar voir, tannench ek ghopur(tower) 93 paianche unchaechem bandhlem. 1962vea vorso hi Igorz Juan XXIII Papa Saiban Dhaktti Basilika mhunn pacharli ani "Santa Maria Major he Basilkeche ekttaili. Ho upkar Thanjavurchea Bism Saiban Rev. Dr. R. A. Sundram-hannem Pap Saiba kodde magun ghetlo.


1974vea vorsa Setembrache mhoineant ek novi igorz bandli ani he porim Basilika asli ti toxich sambhallun 160 paim lambaien ani 55 paim mottaen, 1975 vorsa, tech igorje voir toslich ek vhoddli igorz bandli. Ani heam doniancher Thanjavurchea Manadik Bism Saiban axirvad ghalo.


Hea porim tea dhakttulea ganvant thavn Mariechem, Jezuche ani soglleam mun'xanche avoichem devosponn sogllea sonvsarak pavlem. khoreaninch ti zaun asa Avoi Bholaikechi ː bholaiki kuddichi toxich atmeachi.

"https://gom.wikipedia.org/w/index.php?title=Vailankanni_Saibinniche_Basilika&oldid=133502" चे कडल्यान परतून मेळयलें