अँथनी सौझ

अँथनी सौझ हो सुटके झुजारी आशिल्लो.

जल्म, शिक्षण आनी व्यवसाय

अँथनी सौझ हांचो जल्म 14 ऑक्टोबर 1920 त मुंबय हांगासर जालो. ताणीं मॅट्रिक मेरेन शिक्षण घेतलें. सुरवेक पाद्री जावपाक ते सेमिनारींत गेल्ले. पूण उपरांत तें सोडून ते भारताचे भोंवडेर गेले. काशी हांगा कांय काळ वेदांचें शिक्षण घेतलें. उपरांत ते लोयडस् बँकेंत रुजू जाले.

फुडें हे बँकेच्या कामगार संघाचे ते सरचिटणीस जाले. 1952 वर्सा ते नॅशनल काँग्रेस गोवा हे संघटनेचो वांगडी जाले. उपरांत सुटके चळवळींनी ते वांटो घेवंक लागले. ते हे संघटनेचे सरचिटणीस म्हूण काम पळयताले.

सत्याग्रहाच्या मळार वावर

15 ऑगस्ट 1954 दिसा काणकोणच्या पोळें वाठारांतल्यान गोंयचे शीमेचेर सत्याग्रहींचो पयलो पंगड घेवन ताणी सत्याग्रह केलो. तेन्ना तांकां तांच्या वांगड्या सयत अटक केली.

बंदखणीतली जीण

सुरवेक तांकां पणजेच्या आल्तिनो वयल्या मनोरुग्ण बंदखणींत घाल्ले. उपरांत आग्वाद आनी रेईश मागूश बंदखणींत दवरून तांकां 28 वर्सां खर बंदखणीची ख्यास्त फर्मायली.

1959 वर्सा तांचे ख्यास्तींत सूट दिवन तांची सुटका जाली. उपरांत ते परत भूंयगत चळवळींनी वावर करूंक लागले. ह्या वेळार परत पुलिसांनी वास्को हांगा तांकां अटक बंदखणींत घाले. फुडें गोंय सुटके उपरांत तांची सुटका जाली.

सुटके उपरांत तांचे योगदान

1963 वर्सा ते जिल्लो काँग्रेस समितीचे चिटणीस म्हूण आयले. मुरगांव गोदी कामगार संघटनेचे ते संस्थापक वांगडी आशिल्ले. महाराष्ट्रवादी गोमंतक पक्षाचे वांगडी आसले. ओपिनियन पोला उपरांत ते ह्या पक्षाचे जोड चिटणीस जाले.

1964 वर्सा ते पणजी नगरपालिकेचे वांगडी म्हूण वेंचून आयले. गोवा भारत स्कावटस् अँड गायडसचे राज्य मुखेल कमिशनर म्हूणन ताणीं काम केलां. मार्च 1967 त मांद्रे मतदार संघांतल्यान ते गोंय, दमन आनी दीव विधानसभेचे आमदार म्हूण वेंचून आयले.

तेन्ना तांकां कायदो, कामगार, उद्देग आनी शेतवड ह्या खात्यांचें मंत्रीपद मेळ्ळें. पूण महाराष्ट्रवादी गोमंतक पक्षांतल्या फुडा-यां कडेन ताचे मतभेद जाल्ल्यान 19 जून 1970 ह्या दिसा ताणें मंत्रीपदाचो राजिनामो दिलो.

उपरांत ते इडियन नॅशनल काँग्रेस संघटनेचो वांगडी जाले. ते गोंय शिपयार्ड कामगार संघटना, राश्ट्रीय इंजिनीयरींग कामगार संघटना आनी इंडियन नॅशनल ट्रेड युनियन कावन्सिलाचो वांगडी आयले.

समाज सेवेची भावना

उपरांतच्या काळांत राजकारणांतल्यान ताणें पुरायपणान सन्यास घेतलो आनी समाजसेवेचें व्रत आपणायलें. समाजसेवा करपांतच ताणीं आपलें उरिल्लें जिवीत सारलें. 18 जून 1984 ह्या दिसा ते ह्या संवसाराक अंतरले.

पुरस्कार

भारत सरकारान ताम्रपट दिवन सुटके झुजांतल्या ताच्या वावराचो भोवमान केलो. 18 जून 1984 ह्या दिसा गोंय सरकारानय ताम्रपट दिवन सुटके झुजांतल्या ताच्या वावराचो भोवमान केलो.