आत्माराम नरसिंह करमळकार

आत्माराम नरसिंह करमळकार हो सुटके झुजारी आशिल्लो.

जिणें वळख

आत्माराम (आपा) नरसिंह करमळकार हांचो जल्म 25 जून 1916 वर्सा पणजी हांगा जालो. तांचें शिक्षण लिसेव मेरेन जालां.

म्हत्वाचो वावर

1934 वर्सा भारतीय राष्टीय कॉग्रेस हे संघटनेचे ते वांगडी जाले. छोडो भारत चळवळीतल्यान भुंयगत वावुरप्यां कडेन तांणी आडवाटेन संबंध दवरिल्लो. 1945 वर्सा ताणीं लिपचोरयां पत्रकां छापून आनी ती लोकांक वांटून तांचे वरवीं पुर्तुगेज गोव्हेर्नादोर जेराल,जुजे काब्राल हाच्यो गुपीत कारवायो आनी भ्रष्टचार उक्ताडार हाडपाचो यत्न केलो. 1948 वर्सा मुंबय सावन येता आसतना पुलिसांनी तांकां रातचें कुळें वाठारांत धरले. तांणे तांचे कडेन आशिल्लो दादरा नगर हनेलिचो नकासो जप्त केलो. तेभायर ह्या नकाशाविशीं जायते प्रस्न केले. आनी तांणी भारतीय वकिलाती कडेन संबंध दवरचो न्हय असो आदेश दिवन तांकां सोडलो. ते पणजे बँकेंत नोकरी करता आसतना 1950 त पंडित नेहरून दिल्लीच्या लाल किल्ल्या वेल्यान पुर्तुगेज राजवटी आड टिका केल्ली.ताचे आड निशेद करपा खातर पुर्तुगेज सरकारान एक पत्रक काडिल्लें. ह्या पत्रकाचेर सय करूंक तांणी न्हयकार दिलो. तेखातीर सां तोमे वेले बँकेचे शाखेंत तांची बदली केली.सां तोमे हांगा वता आसतना वाटेर मुंबय पावतकच बरो नाशिल्ल्याचें सवंग करून तांणी तिकेट रद्द करूंक लायली आनी उपरांत निशेद परगटावपाक म्हूण बँकेक सोडचीट दिली.

हेर वावर

उपरांत ते मुंबय युनायटेड कमर्शियल बँकेत काम करूंक लागले आनी वांगडाच राष्ट्रवादी वांवरात वांटो घेवंक लागले. महाराष्ट्र सरकार, गोंयात आशिल्ली भारतांतली वकिलांत आनी दिल्ली आशिल्लें विदेशी मंत्रालय हांकां जोडपी म्हत्वाचो दुवो कसो ते वावुरले. नॅशनल काँग्रेस गोंय संघटनेचे ते वांगडी आसले. सुटके झुजारी पिटर आल्वारीस हांच्या पालवान ते वावुरप्यांक घातपाती आनी भूंयगत वावर करपाक प्रशिक्षित करताले .27 मार्च 1954 दिसा 120 सत्याग्रहींक घेवन गोंयांतली रेल्वे येरदारी बंद करची अशी मागणी करूंक तांणी कॅसलराँक हांगा मोर्चो व्हेलो. 1954 वर्सा तांणी दादर नगर हवेलीचे सुटके चळवळी खातीर वावुरपी धाडिल्ले. आझाद गोमंतक दल संघटनेच्या पालवान नगरहनेलीची सुटका करपांत तांचो वांटो आसा. दादरा नगर हवेलीचो प्रशासक म्हण तांकां एकमतान वेंचून काडले. फुडें तांणी कश्टकरी आदिवासींक आदार दिवपाखातीर पंचायत राज्य आनी भूंय कायदो काडलो आनी प्रांताच्या प्रशासनांत लोकशाय राज्यपद्दत सहजतायेन हाडपाखातीर मोलादीक वावर केलो. ते गोंयच्या आनी गोंया भायल्या कांय सुटके झुजा-यांक आर्थीक पालव दितले. गोंय सुटके मेरेन तांणी मुंबय रावन सुटके झुजाचो वावर केलो. आपा करमळकारान गोंय मुक्तीचो ध्यास घेतिल्लो. तांणी स्वताचें हीत पळयनासतना गोंय मुक्ती चळवळींत भोव मोलाचें काम केलां. तांचे मुखार एकच ध्येय आनी तळमळ आसली. गोंय गुलामगिरींतल्यान मेकळें जावचें. गोंयकारांक मेकळपणान स्वास घेवंक मेळचो. मुक्तपणान वावरूंक मेळचें. गोंयाक जाय तसो आकार दिवंक मेळचो. साडेचारशें वर्सां गुलाम गिरींत घालयल्ल्या गोंयकारांचे बंदपास सुटचे. अंदल्या स्वासांक चिड्डले मनांक मेकळी, भंय विरयत धाकाय मेळची म्हणून वावुरले. गोंय सुटके उपरांत ते जायतीं वर्सां भारतीय राष्ट्रीय काँग्रेस संघटनेचे पदाधिकारी आनी चिटणीस आशिल्ले.

पुरस्कार

1972 वर्सा भारत सरकारान तांकां ताम्रपाट दिवन, मुंबय प्रदेश काँग्रेस समितीन पदक दिवन आनी दादरा आनी नगर हवेलीच्या प्रशासकान तांकां मानपत्र दिवन तांचो भोवमान केला.