दों मोरायश

विकिपीडिया कडल्यान
Jump to navigation Jump to search

दों मोरायश हांचो जल्म 19 जुलय 1938, मुंबयत जालो. ते नामनेचे कवी, लेखक आनी पत्रकार आशिल्ले. संवसारीक नामनेचो भारतीय पत्रकार फ्रँक मोरायश हो ताचो बापूय. ताणें बी. ए. मेरेन शिक्षण घेतलें. पिरायेच्या एकुणिसाव्या वर्सा ताका ताच्या 'अ बिगिनींग' (A Begining) ह्या इंग्लीश कविता झेल्याक 'हॅथोर्नडेन प्रायझ' हो प्रतिश्ठेचो पुरस्कार फावो जालो. 'जॉन नोबडी' (1965). 'पोयम्स' (1960) 'वॅल्डम अॅन्ड अदर्स' (1968), 'अॅबसेन्स' (1983) ही ताच्या कवितांचीं आनीक कांय पुस्तकां. ताचो 'कलॅक्टेड पोयम्स' (1857-87) हो सगळ्या कवितांचो झेलो पँग्वीन बुक्स इंडियान भारतान उजवाडोयलो (1987). तातूंतले 'लेटर पोयम्स' ह्यो 1967-1987 मेरेनच्या काळेंतल्यो कविता. 'द ब्रास सरपंट' 1964 'एडिटेड वोयस फॉर लायफ' (1975) हीं ताचीं अणकारीत पुस्तकां.

तो 1956-58 ह्या काळांत 'जेमिनी' ह्या ऑक्सफर्ड-केंब्रिज साहित्यीक परिक्षण पत्रिकेचो फिचर संपादक, 1965-68 ह्या काळांत 'नोवा' ह्या लंडनाचे पत्रिकेचो फिचर एडिटर, 1969-71 ह्या काळांत न्यूर्याक टायम्स सण्डे मॅगझीनाचो युरोप आनी उदेंत आशियाकडलो भोंवतो 1973-77 ह्या काळांत यू. एन. फंड फॉर पॉप्युलेशन ऑर्क्टव्हिटीज हे संयुक्त राश्ट्र संघटणेचो स्पेशल लिटररी कन्सल्टंट आनी सण्डे स्टॅण्डर्ड, मुंबय ह्या इंग्लीश पत्राचो कांय काळापुरतो संपादक आशिल्लो.

ताची गद्य बरपावळ अशी - 'Green in the Grass' (1951), 'Gone Away' (1960), 'My Son's Father' (1968), 'A Matter of People' (1974), 'A Family in Goa' (1975), 'The open Eyes' (1976), 'The Tempest Within' (1972), 'From East & West' (1972), 'Bombay' (1980), 'Mrs. Gandhi' (1980), 'Answered by Flutes' (1983).

1980 वर्सा धर्तरेक प्रदक्षिणा घालपी भारताची पयली नौका 'तृष्णा' आनी तिचे वयले धाडशी तारवटी हांगेल्या आठ म्हयन्यां मेरेनच्या काळांत मुलाखती घेवन तृष्णाचे शौर्यकथेचेर ताणें एक पुस्तक बरयलां. तेचपरी भारतीय क्रिकेट खेळाच्या मळार 'लिजॅण्ड' जावन बशिल्ल्या लिटल मास्टर सुनील गावस्कर हाचें 'An Ilustrated Biography - Sunil Gavaskar' चरित्र ताणें बरयलां. गोंयच्या उद्देगीक धेंपे घराण्याच्या इतिहासाचेरूय ताणें एक पुस्तक बरयलां.

पुरस्कार[बदल]

'Lamont Prize for Literature' (1969), 'Citation for Excellence in journalism', ओव्हरसीज प्रॅस क्लब ऑफ अमेरिका (1972) हे ताका मेळिल्ले कांय पुरस्कार.

तो निधर्मीपणाचो आनी राश्ट्रीय एकात्मतेचो एक कट्टर पुरस्कर्तो. लिला नायडू हे हिंदू फिल्म अभिनेत्री वांगडा तो लग्न जाला.

"https://gom.wikipedia.org/w/index.php?title=दों_मोरायश&oldid=166565" चे कडल्यान परतून मेळयलें