सुरेंद्रनाथ बॅनर्जी

विकिपीडिया कडल्यान

सुरेंद्रनाथ बॅनर्जी

सुरेंद्रनाथ बॅनर्जी हांचो जल्म दि. 10 नोव्हेंबर 1848 ह्या दिसा कलकत्ता हांगा जालो. ताचो बापूय दुर्गाचरण , वैज आशिल्लो. सुरेंद्रनाथाचे शिक्षण कलकत्यांत जालें. 1968 वर्सा बी. ए जातकच इंग्लंडाक वचून आय. सी. एस. परीक्षा तो 1869 वर्सा उत्तीर्ण जालो. भारतांत येतकच सहाय्यक दंडाधिकारी म्हूण ताची सिल्हेट हांगा नेमणूक जाली. पूण 1874 वर्सा ताच्या, प्रशासनांतल्या किरकोळ चुकांचें निमित करून ताका नोकरेवयल्यान काडून उडयलो. बार अँट लॉचे परीक्षेक बसपाक लेगीत ताका न्हयकारलें. ब्रिटीश राज्यकर्त्याच्या ह्या अन्यायाक लागून तांचेआड सुरेंद्रनाथान 1875 वर्सा चळवळ सुरू केली. कलकत्त्यांतल्या मेट्रोपोलिटन इन्स्टिट्यूशनांत सुरवेक इंग्लीश विशय शिकयतकच, फुडें कांय दीस फ्री चर्च कॉलेजींत शिकयले. उपरांत ताणैं रिपन महाविध्यालय स्थापन केलें. थंय अध्यापक म्हूण ताणें 37 वर्सा काम केलें. सुरेंद्रनाथ 26 जुलाय 1876 वर्सा इडियन अँसोसिएशन ही संस्था स्थापन केली आनी तिचो प्रसार करपाखातीर ताणें भारतभर भोंवडी केली. 1878 वर्सा बेगॉल हे इंग्लीश खबरांपञ ताणें काडलें आनी सुमार 50 वर्सा तातूंत लिखाण केलें. ह्याच खबरापञातल्यान कलकत्ता उच्च न्यायालयाची बदनामी केल्याा च्या आरोपाखाला ताका अटक जातकच , देशभर निशेधाच्यो सभा जाल्यो. ताणें इंडिया अँसोसिएशनचेवतीन कलकत्त्यांत राश्ट्रीय सभा आपयली. राश्ट्रीय काँग्रेसाचो तो दोनदां अध्यक्ष जालो. ब्रिटीश सरकारान नाईट हो किताब दिवन ताचो भोवमान केलो. जिविताच्या निमण्या वर्सानी ताजी लोकप्रियता कमी जाल्ली. ताका बराकपूर हांगासर ता. 6 ऑगस्ट 1925 ह्या दिसा मरण आयलें.