ॲगमार्क

ॲगमार्क (AGMARK - Agricultural Marketing) शेतमाल, फळां आनी प्राणिज जिनसांचो पांवडो आनी विशुध्दता हांच्या खातीर वापरतात तें चिन्ह. भारत सरकारान वयर सांगिल्ल्या जिनसांचो पांवडो आनी उच्च प्रत हांचे खातीर 'शेतमाल (ग्रेडिंग अँड मार्केटिंग) कायदो' १९३७ त लागू केलो. ह्या कायद्या वरवीं ज्या वस्तूंचो, जिनसांचो दर्जो आनी प्रतवारी थारायतात, तांचेर 'ॲगमार्क' (AGMARK) हें चिन्ह लायतात. लेबलाचेर अनुक्रमांक, सीलबंद करतल्याचें नांव, माल भरला ती तारीख आनी ठिकाण हे निर्देश आशिल्ल्यान गिरायकाक लेबलावयल्या पांवड्या प्रमाण भितल्लो माल पारखप सोपें जाता.

अँगमार्क लेबलाफाटल्यान व्हडली यंत्रणां आसता. तातूंत सरकारान खास नियुक्त केल्ले वैज्ञानीक आनी तंत्रज्ञ आसतात. हें लेबल फकत अधिकृत संस्थांकूच लावपाक मेळटा. तेखातीर असलीं अधिकारपत्रां त्या त्या कारखान्यांची आनी प्रयोग शाळेची तपासणी करून कारखानदारांक दितात. मालाचो पांवडो थारायतकूच मोट्या प्रमाणाचेर माल तयार करप चालू आसतना गुणवत्ता नियंत्रण (Quality Control) जतनायेन पाळटात. कारखानदार, घाऊक आनी किरकोळ व्यापारी हांच्या कडल्यान नमुनो म्हूण मेळिल्ले जिनस सीलबंद करून तपासपा खातीर नियंत्रित प्रयोगशाळां कडेन धाडटात. थंय तांची सविस्तर रसायनीक विस्कटावणी जाता. पांवडो थारावन दिल्लो जिनस तापसणेंत कमी प्रतीचो आसा अशें मेळ्ळ्यार ताच्या वयलीं 'ॲगमार्क' लेबलां काडून उडयतात.

'ॲगमार्क' चो सुदारीत कायदो १९४३ त आयलो. ताचो आवांठ वाडयलो आनी तातूंत फुडल्या वस्तूंचो आस्पाव केलोः भाजीपालो, फळां, चामडी, दुदाचे जिनस, तंबाखू, कॉफी, डबोबंद फळां, तीळ, तेल, कापूस, तांदूळ, गंव, सनताग (सॅन हेम्प), गोड, लोकर, रेझीन, टर्पेटायन, सुपारी.

निर्यातीच्या मालाचेर 'ॲगमार्क' लेबल लावपाची सक्ती १९४२ त केली. तेन्ना सावन वस्तूंची प्रतवारी आनी संवेश्टन (रक) करपाच्या म्हत्वाच्या सगळ्या केंद्रांचेर निरीक्षक अधिकारी दवरतात. वस्तूंचें संवेश्टन, वर्गवारी आनी पांवडो थारावचे आदीं ह्यो वस्तू ते तपासतात.

तंबाखू खातीर गुंतूर, राठ केंसां खातीर कानपूर, सनतागाखातीर कलकत्ता, वासाच्या तेलाखातीर कोचीन, कानपूर, लोकरीखातीर मुंबय आनी राजकोट ह्या शारांत आनी हेरकडे १६ प्रयोगशाळा उबारल्यात. केंद्रीय प्रयोगशाळा नागपूर हांगा आसा. मिरयां, वेलची, काजू, आलें, वासाचें तेल, लाख आनी तेफळां ह्या निर्यातीच्या ३८ वस्तूंची सक्तीन प्रतवारी करतात.