Addnanv vo Alkunz

विकिपीडिया कडल्यान
 
Romi
   
First/given, middle, and last/family/surname diagram with J. S. Bach as example. J. S. Bach shared his given name with six immediate family members and many extended family members. He shared his family name with most family members.

Addnamv mhollear upnamv va kull, ghorannem, va ghorabeachem namv. Ekadrea monxacho chuknasotona ul'lekh korunk mellcho mhonnun addnamvacho ul'lekh zata. Addnamv monxachea khaxelea namvabhair asta ani tem taka her kullamsaun vegllo kaddtta. Addnamv, bapaichea putam-dhuvank, putachea natu-natrank, ponntturank, xenntturank ani tachea fattlean yeupi pillgea-pillgeantolean cholot rauta.

Addnamv utrachi utpot'ti vingddovingodd toren melltta. Kaim zannanchea motan ‘ add ’ hem utor ‘ ordh ’ hea somskrit utravelean ailam tor ‘ odd'dd ’ hea somanarthi kon'nodd utravelean ‘ add ’hem utor ailem oxem kaim zann mhonnttat. Zachea alaxirean apunn vavurota tem namv oxi addnamvachi vyutpot'ti kortat. DekhikH ghor, gamv, dhondo, gunn hanchevelean boreach lokank addnamvam poddleant.

Kullnamv va addnamvachi chal ken'na ani khoim suru zali hevixim sarki mhaiti mellna. Inglonddant normonchea digvizoyauporant mhollear ikravea baravea xotmanasaun kullnamacho vapor zaupak laglo, oxem mhonnttat. Kaim vidvamnachea motan moharaxttrantoi heach kallant kulnamacho vapor suru zalo. Adlea kallar bhartant aplem khaxelem namv ani bapaichem namv ghalpachi chal asli. Brittixanchea kallant svotachea ani bapaichea namvak ‘ addnamv ’ zoddpache podhdotik nett ailo.

Addnamvam tea tea ghoranneank tamnni cholyil'lea veusai-dhondeavelean, tanchea zati velean, tanchea mull gamvavelean, kaim vellar tanchea purvozanim zhuzamollar va her mollamr gajyil'lea porakromavelean, nagrik jivitant man-bhoumanachi podvi mellil'lean favo zalim va poddlim. Kaim ghoranneanchim addnamvam kullachem gotr, doivt va deukamvelean ailim va apnnailim. Kainkodden addnamvam zominodar bhattkarachea nateantlean ailim tor kainkodden munddkaramni ani chakramni bhattkarachim addnamvam aple modle sombond dakhoupak ghetlim.Sadaronnoponnan addnamvam monxacho boro ul'lekh korpi aslim tor kaim fautt samkich orth naxil'lim astat.

Ekadr ghoranneant kary fuddem vhorpak put naslear tem ghorannem bhailea soirea-dhaiream'modolem va daiji-gotrantolem, punn vegllea addnamvachem bhurgem poskem gheta. Oxa vellar poskea bhurgeachea mudolchea addnamvak novea ghorantolem addnamv zoddttat. Techpori ghorzamvoi zal'lo dadlo aple bailechea kullarachem addnamv aplea mull addnamvak zoddtta. Zaite fautt kiristamv dhormant logn zal'li bail aplea ghovachea addnamvavangoddach kullarochem addnamv laita. Aplea mull addnamvache protixtthek, vollkhik, manak, loukikak badha yeunchi nhoi mhonnun oxem addnamv ghetat. Boreach somaz pongddant chodd korun hindumodim logn zal'le cholyechem kullarochem addnamv bodlun tea zagear ghovachem addnamv laitat.

Addnamvachi sankholl, khoinchem namv soddchem va khoinchem namv dourochem hea nirnnoyacher lamb va mottvi zata. Addnamvam ghetna va soddttona auychea ghoranneantolem ek ani bapaichea ghoranneantolem kaidean lagu zaupi addnamv gheupachi chal asa. Hi chal gõychea kiristamvamodim unchelea pamvddear cholta. Gõychea hindumodim zoddnamvam gheupachi chal voilea pamvddear punn unnea promannant cholta. Portugalant son 1930 vorsa kel'lea nagri nondnni kaideapromann (Codigo de Registo Civil-1930) ani tatunt fuddarak kel'lea durustipromann ‘ addnamv tharavik utrant moreadit aschem ’, oso nem' asa. Techpori venchil'lem addnamv bapain vapril'lem va ghoranneachea mull pursakoddlean ayil'lem aspak zai oxi ott asli. Upnamv divpacho hokk bapaik aslo.

Sadaronnoponnan addnamv monxachea namvachea nimannea zagear boryil'lem asta. Punn dokxinn bharot hea nemak addvad asa. Kerllant poilem ghorachem va kullachem namv, dusrem bapuy va ghovachem namv ani tisrem khaxelem-zonnik namv ghetat va zoddttat. Kornattokant kainkodden gamvchem namv, asa toxem ghetat ani taka ek khaxelem zonnik namv zoddttat va khaxelem namv poilim ghalun addnamv dusrem ani nimannem namv gamvchem, asa toxem ghetat. Tomillonaddunt poilem mull gamvchem, dusrem bapaichem ani tisrem khaxelem namv ghetat. Ken'nai nimanne zatichem va birud oxem favo zal'lem addnamv mhunn laitat. Andhrant zat dakhoupi addnamv nimannekodden ghaltat, va ken'nai fokot mull gamv va bapaichem va kullachem addnamv ani nimannekodden aplem khaxelem namv ghetat.

Gõyant hindumodim voileuri kull, zat, dhondo ani her karnnank lagun addnamvam poddlim. Kiristamvamodim dor eka gamvant kristikoronn zalem ten'na voile zatintlea gamvkaranchea vangddampromann pornea addnamvam va kullambodola novim portugez addnamvam dilim. Her zatiche chalipromann va eka kullachea daizapromann doreka gamvant eka-eka kullachea vangddeak ek ek addnamv dilem. Kaim zannamni padornanchim addnamvam ghetlim. (padorn mhollear odheatmik nodren batismavellar vat zolloupi palok - god father) gõychea kiristamvachea namvamni addnamv zor aslem tor bapaichem namv tatunt aspauna, toxench logn zal'le bailechea namvat aplea ghovachem namv asta. Addnamv bodlopachi podhdotH

Khobreptracher bhouxik kollounni divn va sorkari razoptracher zairat divn lok aplim addnamvam bodlunk xoktat. Osprixy manil'lea zatini aplim adlim addnamvam bodlun novim voilea manil'lea zatichim addnamvam ghetleat. Kaim zatini apli zat sangpi addnamvam soddun novim borim dispi va gamvcho ul'lekh korpi addnamvam ghetleant. Kaim mongllurokar kiristamvani apli mullchim manil'lim hindu addnamvam aplea kiristamv addnamvak zoddleant. Kaim padrimni ani gõy, mongllurchea kiristamv lokamni aplim mudlochim hindu addnamvam va novim ghoddoil'lim addnamvam ghetleant. Tomillonaddunt ‘ souraxttr ’ namvache zatin thoinchea sogleant unch manil'lea ‘ oyyor ’ ani ‘ oyyongar ’ bamonn zatichim addnamvam aple zatikhatir apnnaileant. Ut'torprodex, ponzab ani her ut'torekoddlea rajeamni zat sangpi namv soddun divpachi chal ailea. Atam thoim fokot aplem khaxelem namv ani bapaichem va ghovachem namv vaprotat. Voile torechi chal roxia ani her kaim dexamni cholta. Addnamvacheo dekhiH

Vingddovingodd karnnank lagun poddil'lea addnamvacheo dekhi fuddletoren asat. VattharamveleanH kuddtorokar, samvdd'ddenkar, moddgamvokar, xelddenkar.Veusai-dhondeaveleanH zoxi, dexmukh, bhott, purannik, poritt, xett. Vornn rongaveleanH kalle, gore. Zhaddam-peddamveleanH poddoull, ambo, madd, bhenddo.Saudam-pranniH vagh, kaulle, razhoms, more, gaitondde. PodarthamveleanH bhobo, sambari.DhatumveleanH tambe, lokhondde. XoriraveleanH ddolle, kanne.NateantleanH satpute, natu, noure, kakulo. GunnamveleanH dhoiryovan, ojinky, sohstrobudhde, budhdisagor. NindakoropiH aglave, bomble, jiutodde.

Gujratantolim upadhyai, bhott, desai, mehta, pottel, kapddia him namvam veusai dakhoitat. Bongali lokant mukhrji (mukhopadhyai), benrji (bondhopadhyai), chotrji (chott'ttopadhyai), bos (bosu va vosu), dot't, mitr, sen, tthakur him namvam veusai va zati dakhoitat. Ut'tor prodexantole dube, dvivedi, tripatthi, choube, choturvedi, dikxit, pont, ponddit, xorma, xrivastou ani mhoisur modrasakoddole oyyor - oyyongar, pill'lle, naiddu toxech kerllantole nair, nombudripad him namvam zativachok va veusaivachok asat. Parxi lokambhitor ddokttor, battlivala, daruvala, mottarovala axi veusaivachok namvam mellttat. Moharaxttrant va herkodden ayil'lea dokxinni lokambhitor ‘ ravo ’ hi podvi laupachi podhdot asa. Ut'tor bhartant ram', das, lal, chond hea namvacho addnamvauri upeg zata. Xikh ani rojputam'modim addnamvam asnat. Muslomanant xekh, soiyod, xoha, kajhi, fokir, gulam', nodaf, muzaur oxim ponthvachok va veusaidrxok addnamvam vaprotat. Khorem mhollear tanchebhitor addnamvanchi chal na.

Polleiat[बदल]

Surname

"https://gom.wikipedia.org/w/index.php?title=Addnanv_vo_Alkunz&oldid=198913" चे कडल्यान परतून मेळयलें