Alem

विकिपीडिया कडल्यान
 
Romi
     
Ginger plant with flower, south India

Ek vokhdi vonspot. (Moratthi-ale; Hindi-odrok, odda; Gujrati-adu; Kon'nodd-ola, hosisuntthi; Somskrit-ardrok xringobera; Inglix-ginger; lettin- jhinjibor efisinel. Gonn-sittemini. Kull-jhinjiboresi). Hi lhan vonspot (mullkxodd) mullchi agney axia vattharantoli (chodd korun Bharot ani Chin) asa. Zaitim vorsam zogpi he vonspotichem kandd zomnint addvem vaddtta. Hea zomnintlea kanddaposun zomniuyor sumar 0.5 te 1.5 mi. Unch fantte yetat.Panam sadim, lambxim, jible akarachim ani mullant gutthlail'leavori astat. Aleache godd'dde hatachea bochkeabhoxen asun tanchim choddxim bottam ekamekank lagun astat.

Pikaullicho vatthar[बदल]

Ginger field

Bharot, Inddonexia, West Inddiz (choddkorun Jomoika), ut'tor ani ostont Afrika hea uxnn kottibondhantlea vattharant aleachi lagoudd mottea promannant zata.Bhartant somudrothoraposun te himaloyache demvtevelea 1670 mi. Unchayemerenchea vattharant ani chodd korun dokxinnekoddlean prodexant aleachi lagoudd kortat. Keroll, andhr prodex, gujrat, himachol prodex, moharaxttr hea rajeant alem roitat.

Lagoudd[बदल]

Hea pikak uxnn, domott ani pausalli hovaman lagta. Vaitti naxil'le,modhyom' kalle, bhusbhuxit ani zambhea fatrache zomnint aleachem pik borem zata. Aleachi laugodd korche poilim zomin khonnun votant tapoitat. Aleachea pikant udok sanchun urchem na hachi zotnai gheunchi poddtta. Dekhun, xetache bhomvtonni mero kaddttat. Hea pikak bhorpur sarem ghalchem poddtta.

Hea pikak proti hekttor 35.50 tton xennachem sarem ani 75 kigre. Naittrozon sarem ghaltat. Uprant zun mhoineache survatik komb axil'le kuddke roupakhatir vaprotat.Sadaronn 30Χ30 sem'mi. Ontracher chorant 5 sem'mi. Khol fonddkulam kaddun tatunt aleacho kuddko roitat. Komi pausachea vattharant va lhan akarachem alem aslear tem 15Χ15 sem'mi. Va 22Χ22 sem'mi. Ontracher laitat. Lagoudd kortokoch hea pikak udok ditat. Komb bhair futtpachea kallant pikant udok sanchlear komb kuspacho sombhou asta. Uprant zaitoxim noddnni korun pikak udok, sarem ghaltat. Fuddem 7-8 mhoineamni panam suktokoch alem khonnun kaddttat.

Utpon'n[बदल]

Gari, a type of pickled ginger

Hea pikache don videxi prokar keroll rajeant laitat. Ek ‘ rio de zanero ’ani dusro ‘ chaina ’ alem. Tancheposun onukroman 22,500 ani 28,000 kigre. Itlem utpon'n melltta. Thollavea pikaposun 7,500 te 12,500 kigre. Alem melltta.

Suntth[बदल]

Sukoil'lea aleak suntth mhonnttat. Survatik alem nivll korunk tem udkant bhizot ghaltat ani tacheveli sal khorouddun kaddttat. Hem alem sat atth dis votant sukoitat.Uprant suktokoch samany protichi dhouxa rongachi suntth toyar zata. Kaim kodden alem khonnun kaddttat ani tem xizoun suntth toyar kortat. Bore protichi suntth dhovi asta. Hi suntth korpak alem survek udkant ghalun tachi sal kaddttat. Uprant tem portem ek dis udkant bhizoitat.Thoinchem kaddun tem chuneachea datt udkant ghaltat. Uprant hem alem votant atth-dha dis sukoitat. Oxetoren bore protichi suntth toyar zata. Ekdom' bore protichi suntth korchekhatir chuneachea udkant ghal'le suntthik gondhkachi dhumvri ditat ani uprant votant sukoitat.

Upeg[बदल]

Fresh ginger rhizome

Alem ani suntth hancho upeg purvil'lea kallasaun vokhod ani mosaleakhatir kortat. Alem tikhott, ut'tezok ani vayunaxok asta. Khank chodd ailear suntth sakhor khaupak ditat. Tokli dukhlear suntth toklek bandtat. Peyam (jinzor) toyar korpak aleacho upeg kortat. Gõyant vokhdant ani zounnakhannant aleacho upeg zata. Opchon va ojirnn zalear aleacho ros pivpak ditat. Suntth ani sakor hancho pittho (suntthi pittho) devacho prosad mhunn vanttpachi chal asa.

Rog[बदल]

Dokxinn bhartant aleak ‘ pithiym' aefaniddoromettom' ’ ani ‘ pithiym' mayariottilom' ’ hea chiteakhatir ‘ kuz ’ ho rog zata. Hea rogak lagun zhadd holldduvem poddtta ani kusta. Udkacho gall nichro zaupi sade zomnint ho rog chodd korun zaina. Modhyom' kalle zomnit udok sanchlear rogachem promann vaddtta. Rogkarok chito kuxil'lea aleachea benneant va mullant asta. Ho rog allabonda haddunk pikachi odlabodol kortat toxench roupak nirogi aleache komb vaprop mhotvachem asta. Lagoudd korche adim ho rog lagcho nhoi mhunn chorant bordo mixronnacho fovaro martat.

Polleiat[बदल]

Ginger

"https://gom.wikipedia.org/w/index.php?title=Alem&oldid=198962" चे कडल्यान परतून मेळयलें