Dandiya Raas ani Garboh
| |
Romi
|
Gorba gujrat, rajsthan ani malva vattharant prochlit axil'lem ek lokonrity. Gorba xobdachi vyutpot'ti oxi: poilinchea kallant nouratrachea disamni burak axil'le ghagrint okhondd ponntteo pettoun devikodden dourotale. Taka ‘dipogrbhoghott’ oxem mhonnttale. Hea ‘dipogrbh’ xobdantlea kaim vornnancho lop zaun ‘gorba’ ho opbhronx ruddh, zalo oso somoz asa.
Hea lokonriteachem mull ugomsthan gujrat. Krixnnachi natsun (bannasurachi choli) uxa hinnem svota parvotikoddlean xikil'lem lasyonrity souraxttrantlea gopink xikoilem oxi ek akheayika asa. Ajkal haka arvil'le nrityokolent suvat mell'lli tori tachem mull svorup lokonriteatmok zaun asa. Gujrati bhaxent hacho uchchar ‘gorbo’ oso kortat.
Gujratant choleo-bailo nouratrachea disamni ole matyechi, burak axil'li ek ghagor ghetat. Dhormik vidhi zatkoch chumbllichea adaran ti ghagor mathear ghetat. Magir vanttkullim ubim rautat. Ghagrik afddinasotona donuy hatamni talleo ani chuttkeo vazoit omba, kalika, randlomam hea devinchim stutigitam gaun vegvegolle nach kortat. Krixnnolila, rituvrnnonam va somajik vixoi hancher adaril'lea gitrochonancher gorba nach zatat. Ajkal talleam-chuttkeanchea zagear khonjiri, monjiri, ponntteancheo thalleo hea sadhnanchoi gorba nachant aspavo zala.
Gorba hem soubhagyoprotik oxem mantat. Axvin mhoineant nouratrachea disamni gorba nachacho dobazo zata. Bailancho gorba nouratrant 9 dis zata. Dadleancho gorba dosro zatkoch suru zata. Nouratrache ratim matyecheo don lhan-lhan ghagri ekar ek dourotat ani voile ghagricher ponntti dourun tatunt char vati pettoitat. Oxe toren ‘gorba’ sthapon zatkoch bailo tache bhomvtonni talleo vazoit fer dhorun nachtat. Godd avaz axil'li bail pod mhonntta ani nachant vantto gheupi her bailo tika eka surar ani talar sath ditat. Dorek rati komit komi panch tori podam gaunkuch zai oso nem' asa.
‘gorba’ ani ‘gorbi’ oxe gorbeache don prokar asat. Xakt-xoiv somazachea gitank gorba oxem mhonnttat. Him gitam ombaji, bohuchora, kali hea durgarupanchea stounachim astat. Gorbi ho xobd soglleant poilim 17 vea xenkddeant bhanndas hannem vaprolo. Norsi mehtachim podam gorbi hea sogrant ghetat. Gorbi ho prokar chodd korun voixnnovancho axil'lean tea gitamni radhakrixnnachem vornnon asta. Doyaram' hea kovin upatt gorbi-rochna kelea, mhunn taka gorbismratt oxem mhonnttat. Gorba ani gorbi hanchea gaupachea prokaramni legit bhed asa.
Gorba ho nrity-git prokar gujrat-souraxttrant khub lokpriy asa. Somazachea sogllea thoramni gorbachim vegvegollim podam asat. Gujratoche lokjinnechim soglli angam somajik, ragki, itihasik ani pourannik oxa vingodd vingodd vixeantosun ‘gorba’ vorvim progott zaleant.