Dhormdutt Matev
Dhormdutt Matev – Matthew The Apostle
[बदल]
Matev bara Dhormdutam modlo eklo ani Xubhvortomanacho boroinnar. To Alfevacho put; Kafarnaunt dondd vosul kortalo tednam dhormdut zaunk taka apovnnem ailem. Mark ani Lukas khobor kortat to “Levi” Matev. To dhormdut koso, poilo fokot Palestinacheam sobham khatir vaurlo. Apleam des bhavank boroun Matevan aramaik aple avoi-bhaxen Xubhvortoman boroilam.
Hachea uprant, 42vea vorsa Herod Agripan dhumallo suru kelo tednam, Matev dusream ganvamnim bhonvunk gelo. Dusre khobre pormonnem to bhair sorlo tea kalla ani Jeruzaleachi sobha bhorli tea kalla modem, mhonnge 42vea ani 50vea. Vorsa vo tachea uprant legun Matevan Xubhvortoman boroilem. Tori astanam, Mateavachem Xubhvortoman Povitr Xar ani tachem Mondir azun ubim asleleam porim khobor korta dekhun ani Jezun Jeruzalea vixim bhakit kel’lem tachea kai sanginam mhonntoch, dubhavaviret hem Xubhvortoman Romkaramnim Jeruzaleachem nisontton korche adim boroilem mhonn thaven zata. Hem Xubhvortoman rokddench Greg bhaxen utrailem chodd korun Matev jivoch Astanam, 70 vo 80 vea. vorsa. Uprant tachem mullborovp sanddlem.
Adlea Korarant bhasailolo to Soddvonndar Jezu ani Tache sovem adim bhasavnneo kel’leo teo xarti pauleo mhonn dakhoun, kristanv zal’leam Judevam khatir Matevan hem Xubhvortoman boroilem.
Hea Xubvortomancacho mukhel vixoi mhollear Sorginchem vo Devachem Raj. Tem sonvsaran sthapunk Jezu Sodvonndar ailo. Hem Sorginchem Raj mhollear sogleam mon’xamnim Devak aplo Raza mhonn ollkhuncho, Tachi chakri korchi ani Tacho mog korcho.
Matev Judev ani to Judevank boroita dekhun, Jezuchea jivita ani kornniam vorvim Adlo Korar sompurnnaiek Paulo mhonn bogor-bogor dakhoun dita.