Juanva Pormannem Jezu Kristachem Xubhortoman
| |
Romi
|
|
Gospel of John
.jpg)
Juanv Jezucho mogacho xis. Tannem boroil’lem Xubhvortoman char-ui Xubhvortomanam modem nimannem. Jezun tka Aplo Dhormdut zaunk vionchun kaddlo tedna, to tornno-danddgo aslo, punn bhov utar piraiek to pavlo. Efez xarant xembor vorsam porian to jielo ani thoich Zannteanchea magnneank kam diun tannem aplem Xubhvortoman boroilem.
Juanv ani tacho bhav Jakob, Zebedevache put, Bethsaida nograntle; dog-ui aplea bapai borabor maslli marpacho dhondo kortale. Te Juanv Batistache xis asle ani Nazaretcho Jezu Judev lokak Devan bhasailolo Soddvonnar mhonn te tache koddchem xiklole. Jezun Aplo pattlav korunk apoil’lea modem te poile. Magir vinchun kaddlolea Bara Dhormdutam modem he dog-ui asle.
Pedru borabor Somia Jezucho khol onnbhov tankam mell’llo. Eke kherit bhaxen Juanv Jezucho prannmitr, ani dekhunnuch “ Jezucho mogacho xis” mhonn taka nanv poddlem. Nimannea Jevnnar tachi svat hench dakhoita. Khursar prann soddchea velar Jezun Aple avoik Juanvache adhin keli, ani Juanvan he “aple” avoik aplea ghora vheli. Heach khatir, tachea Xubhvortomanant unch atmik jivitachi khobor asa zalear, ami ojap zaunk favona. Aplea Xubhvortomanacho hetu khud Juanvan spoxttponnim sangla : “ Jezu khoreponnim Krist ani Devacho Put mhonn tumi bhavarth dhorche khatir ani bhavarth dhorun Tachea nanva vorvim tumkam Jivit mellche pasot……” (20/30) Hem sot ruzu korche khatir, Juanv Jezuchea thoddea ojapanchi ani hea ojapam borabor mell’llole Jezuche xikovnnechi khobor korta. Vachpi her tin Xubhvortomanam vollkhotalim mhonn to zanno aslo dekhun, tantum kitem unnem asa tem to aplea Xubhvortomanant bhorun haddta. Punn hantunt to sogllem mukhel vixoia khala dovorta ani ho vixoi bariksannin iskuttaun dita.