Karm Saibinn ani Bentinachi Bhokti

Romi

Povitr Sobha Julayache 16ver Karm Saiinnichi porob somarombhta. Sonvsarbhor Karmelit hi porob bhoktiponnan kortat. Moddganvchea Karmelit motthant, Mhapxenchea Karmelit Siminarint, Xellim-Lolienchea Fatima Saibinnichea Kopelant ani Chiklle Madrinchea Bond motthant hi porob chod mhotvachi. Moddganvchea Karmelit motthant khuo lok Bentinachem fest mhunn hie porbek yetat.

Karm Saibinnichie Porbecho Itihias

Saibinn maink sobar nanvamni ami ulo kortat. Him nanvam, Marien kel’le upkar, vo samball vo Kristanvanchea jivitant tinnnem ghetlolo vantto ani tichi xikvonn mhotvachi mhonn sangtat. Jeruzaleantlea Karmel dongrar 1209 vorsa Karmelit Ord suru zali. Izraelachea ut’toriek aslolo ho dongor, Elija provadiachem jivit ani kar’ya hache kodden sombondh asa. Karmelit Ordicho poilo somudai ghoddpi sonyasi (hermits) Elija Provadachi prenna gheun jiyeunk suru kelem.

Hi porob Mariyeche upkar athounk 1386 vorsa suru keli. Karmelit Ord, sonkoxttant asli ten’nam Mariyen tankam sonkoxttancher zoit vhorunk adar dilo. 1274 vorsa Kristi Ekvottachi Mhasobha bhorloli. Tie sobheche vangddi Karmelit Ord bond korunk sodtale, kiteak tea kallar zaitio dharmik Ordi aslio. Dekhun hi Ord kiteak zai, hachim karonnam maglolim. Hem sogllem monant dhorun, Mariye vorvim Devachea adaran ti Ord urli mhonn dhin’vasunk hi porob suru zali.

Bentinachi Bhokti

Hie porbek lagun bentinachi bhokti sonvsar bhor vistaru gelea. Aiz zaito lok golleant bentin ghaltat. Mariyacho mog, hie lhan kornnentlean dakhoitat. Pun zaiteank hie bhoktichi somzonni nam. Hem Bentin ken’nam ailem ? Bentinacho orth kitem ? kiteak tem ami ghalunk zai ? hem zanno zalear borem.

Bentin mhollear ‘khand’ Poilim Benedikt Ordiche motthvaxi ani madri, aprona porim bentin ghaltalim. 16vea vo 17vea xekddeant St. Benediktachea kaidea pormannem motthvaxeamni aplem dharmik angvostr bhesun ravunk zai aslem. Vavrui kaidea khal mhotvacho bhag also. Vavr kortana ang vostr mhellona zaunk aprona porim anik ek angvostr ghaltalim. Takach tannim Bentim mhollem. Vorsam gelim toxim hem Bentin, dharmik angvostracho ek bhag zalo. Benediktacho kaido pallttole dharmik zoxe porim Cluniacs, Larthusians, Cisterians, Camaldulese, Trappists toxench Novio dharmik Ordi, Franciskan, Dominikan ani Karmelit vaprunk lagle.

Karmelitanchi Porompora

Bentin Karmelitank ek khas porompora zali. Sasnnik Soddvonn bhasaun Karmelitanchea tednachea Xrextt Vhoddil Sant Simon Stock-ak 1251 vorsa Julayachie 16ver eka disnneant Mariyen Bentin dilem mhonntat. Punn hem disnnem zaite itihaskarmandun ghenant. Itihasik nodren 1653 vorsa hie vixim bovall zalo. John Launoy hannen Sant Simon Stockache disnneam vixim sobar prosn manddle. Cherion, nanvachea Karmelitan hea disnneam vixim spoxttikoronnnui dilem. Tori astanam itihasik nodren hem disnnem manun ghenant.

Igorjechi maneotai

Dhormxastrachie nodren Bentinachi bhokti vorvim Maria amkam samballtta ani rakjta mhonn sangta. Mariyeche vorgunn ani apnnavunk hem khup gorjechem. Evrop desamni Mariyechea Bentinachi bhokti vaddot geli. Bhavartiank sompem zaunk Bentin mottvem kelem. Aiz porian Bentin lokak ditat, hachie vorvim Mariyecho mog tanchea kallzamni asun, hi bhokti tankam faideak poddum. 1634 vorsa Fr Joseph Elias, St Tereza Kerallant yeun tannem Kuravilangad firgojent Bentinachi konfrad ghoddli. 1657 vorsa, Kerallant Fr. Vincent, St Catarina ail’lo ten’nam hea zomeant 5000 vangddi asle. Zaitea Pap Saibamni toxench Povitr Sobhechea daklleamni Karmelitanchem Bentin vaportat mhollam. St Pio 10vea Pap Saiban hi bhokti vaddunk sohokar dilo. Hen bentin ghalunk urbha dili. Sant Simon Stockachem disnnem Povitr Sobha manun ghenam, pun hie orthabhorit bhoktiek maneotai dita.

Povitr Pustok sangta

Kardial Henry Vaugh-an aplie Gonvllik chittint oxem boroilam : Nhesonn ghalop mhollear mog ani opurbai dakhovop mhonn Povitr Pustok amkam sangta. Aplea Putacho, Jezucho mog korpi Jakoban aplea Putak ek lamb ang vostr nhesoilem. Jonathan-an apli juddi (coat) kaddun David razak dilo kiteak razacho khup mog kortalo.

Mariyen Jezuk mogan ani moipasan falleamni guttlailo. Jezu aplie voparint, lognachea angvostrachi gozal korta. Hem lognachem angvostr mhollear soddvonnechem angvostr. Kristant anmi nhesunk zai mhonn Sant Paulu mhonntta. St Paulu Efezkarank boroun mhunntta : Devcharachea sogllea manddnniancher zoit vhorunk Devan dil’lem zhuzachem angtrann ghalun ravat. (6:11) Mariechi nix bhokti ani tiche vorgunn bhavart ani khaltikai apnnavunk mhollear soitanachea bollacher zhuzunk amkam tem ek zhuzachem angtrann (armour).

Bentin Mariechi Khunna

Povitr Sobhechea pormporentlea zaitea khunnam modem Karm Saibinnichim Bentin ek khunna. Mariyecho mog, tichea sovem aslolo tichea bhurgeancho visvas ani tiche porim jiyeunk tanchi khuxi koxi bhaili khunna mhunn hem Bentin Karmelit Ord manun gheta.

Karmelitanchea bentin magic nhoi. Bentina vorvim amkam soddvonn melltoli, oxem konnech somzunk favona. Pun nix bhavartachem jivit jiyeunk gorjechem. Mariechem jivit ami apnnavunk vavrum-ia

Gallery of statues

सांचो:Scapular Statues of Our Lady of Mount Carmel usually depict her with a Brown scapular.