Lonnchem
| |
Romi
|
Lonnchem / Miskutt jeunnantlea sodchea jin'nosantolo ek upjin'nos. Amboleo, limbu, bimlam, amadde, gazor, flaur ani her totsom' follancheo foddi mirsango, hing, sasvam ghalun kel'lo tikhott - ambott podarth. Hea podarkhachi survat ken'na ani koxi zali hem sangop kotthinn. Punn kolpona korum yeta tepromann tench tench khaun, va ekech torechem khann khaun monxak ubgonn aili zatli. Kitem-i punn dusri tora aschi, amxem - tikhxem khatkoch ruch bori yeta oxem adi manvakuy dislam zatlem. Zhaddam - peddamvyolim amxim follam khatkoch ruch vaddtta hem-i tamnni onnbhoulam zatlem. Tatuntleanuch lonncheacho zolm' zala zaumye.
Ho podarth sogllea dexamni, sogllea toranchea lokambhitor vaprotat. Xivrak jeunnamni ho podarth astach. Chodd goddxem jeunn asta ten'navo ruch haddpakhatir ho podarth dourotat.
Purumetakhatir ho podarth mujrot korun dourotat va vikto haddun dourotat.Hea podarthache khub prokar asat. Tacheo korpacheoi pod'doti khub asat. Godd lonnchem, tikhott lonnchem, bhoril'lea amboleanchem lonnchem, zhottpott mhollear hat lonnchem,bhajeanchem lonnchem, koiri - kisachem lonnchem, limbachem lonnchem, gajrachem lonnchem, pikldd aniyns ani her. Him zalim follam - bhajeanchim lonnchim. Mamsahari lonnchim-i kortat. Sungttanchem lonnchem mhollear balvimv, bangddeanchem, chiknachem lonnchem oxe zaite prokar asat.
Toyar korpachi pod'dot - 1)bhoril'lea amleanchem lonnchem: hem lonnchem vorsobhor tigta. Tekhatir bori zotnai gheuchi poddtta. Udkacho matuy vas haka lagunk upkarona.
Samsvam, hing, mireo, methi, hollod, sukeo mirsango hem sogllem telant fuloun gheup.Tacho pittho korop ani to choddxa telan ani mitthachea udkan (amleo cheppak dourotokoch udok sutt'tta tem - toipoun nhivoil'lem udok) kaloun dourop. Amleo bo-yo dhuvn, pusun gheup. Ekeutten okhondd urtat oxo charvatten chirop, tatunt mitth bhorun chepnnak dourop. Don - ton disauporant tea mitthachem udok sutt'tta. Tea udkak kholl mhonnttat. Tea khollantlean amleo kuxik kaddun to kholl boro khotkhotaup ani to boro nhivtokoch, voir sangil'lebhoxen to mosalo kaloup.Uprant ho kaloil'lo mosalo amleamni gochch bhorop ani teo amleo achavant va bornnent sarkeo dallun bhorop. Tacher tapoun nhivoil'lem tel ghalop ani portun chepnnakhatip supul'le fator dourop.
1) Dedd mhoineambhitor hem lonnchem borem murta ani vorsobhor urta.
2) Godd lonnchem:hing, methi, miream, hollod, mirsangecho pittho, samsvam fuloun gheun tacho pittho korop. Goddacho udok ghalun patlloso pank korop. Tatunt mosaleacho pittho ghalop ani amleo va bimlam va amadde va limbu ghalun xizoup. Hem lonnchem mhoinobhor tigta.
3) Sadem sadd'ddail'lem lonnchem:haka hatlonnochem va zhottpott lonnchem-i mhonnttit. Amleo, limbu, gazor va flaur, kid'deacheoi chirun barik foddi korop. Tancher mirsange pittho, hing, limbacho ros, mitth, il'lixi sakor ghalun sadd'ddauchem. Hem lonnchem 7 - 8 disampurotem tigta.
4) Amleo ani kandeachem lonnchem: amleancheo barik foddi 1 vatti, 2 chomche samsvam pittho, mirsange pittho, ruchipromann mitth, ¼ .Chomcho methicho pittho, fonn'nnak hing, hollod, tel ani ek kando. Pod'dot : amlebhoxen kandoi barik chrocho. Soglle jin'nos ekttham-i kalounche. Voilean fonn'nnam divchim. Hich pod'dot gazor, mullo, razaullehanche lonnchem korpakhatir varpotat. Hatunt fokot kando ghalop na.
5) Bhajeanchem lonnchem:sahity - horve vattanne ord vatti, flaurache barik kuddke, gajrache thoddexe kuddke, 1 chomcho aleacho kis, ole holldiche kuddke ani horvea mirsanganche kuddke pavo vatti, 4 chomche samsvam pittho, 1 chomcho methi pittho, mirsange pittho, hollod, mitth ani fonn'nnachem sahity. Soglle jin'nos ekttham-i korun voilean fonn'nnam divp.
6) Amlea kisachem lonnchem:sahity - tajea imleancho 1 vattibhor kixil'lo kis.3-4 horveo mirsango dhaddail'leo, 1 chomcho hingacho pittho, ½ chomcho hollod, chovipromann mitth, fonn'nnank tel ani samsvam. Pod'dot: kixil'lea amleamni dhaddail'leo mirsango kaloup, fonn'nnank tel hun korun tatunt hing, samsvam, hollod, ghalop. Hatunt voir mirsango kaloun douril'lo kis ghalun bornnent bhorop.
7) Gajrachem lonnchem (sindhi prokar):sahity - tambdde gazor sat-atth, ton'ne losnnicho ek kando,ruchik mitth, samsvam pittho, ½ chomcho hollod, tel.Pod'dot : gazor tasun gheup ani tancher khotkhotit udok ghalop. Gazor matxe movo zatkoch, bore pusun gheup. Losnnicheo bio bo-yo dhuvun barik chirop. Gajracheo lambxo xiro korop ani chiril'li losunn, mitth, samsvam pittho, he soglle jin'nos battlent bhorop. Buddun 1 bott voir yet itlem khotkhotit tel tacher otop.Battlechem dhakonn ghott'tt bond korop. Battli khub fauttim haloup 3-4 disamni hem lonnchem toyar zata.
Limbachea kisachem, kakddechem lonnchem oxech pod'dotin korum yeta. Ut'tor prodexi-i amleanchem lonnchem, sindhi amleanchem lonnchem, limbachim lonnchim (gujrati pod'dotichi), koliflaurachem, limbu-mirsanganchem, ponnsachem lonnchem, vaigeanchem mixr lonnchem, karateachem, karand'deachem oxim zaitea prokarachim lonnchim asat. Him zalim xivrak lonnchim. Mamsahari lonnchim-i kortat.
Gõyant sungttachem lonnchem zaka balvamv oxem-i namv asa. Hem chodd korun kiristamv somazant kortat. Hem lonnchem korpachi pod'dot oxi asa - tel tapoun tatunt hing, methi ani samsvanchim fonn'nnam divp, uprant tatunt mirsangancho pittho ani ujrail'lim sungttam ghalun tollsop. Sungttam xijleuri zatkoch tatunt mitth ani ambttannichem datt udok ghalop. Don - tin minttam xizoun sokoil kaddop. Ruchik il'li sakroi ghaltat. Kaim zann tatunt horvea mirsanganche, losnniche ani aleachey kuddke ghaltat. Hech pod'dotin bangddeanchem lonnchem kortat.
Pouxttik gunn hatunt choddxe nasle tori ho podarth jibek lainafuddem tonddant lall yeta. Taka lagun pottantolo pachok ros zago zata ani jirounn bori zata. Amleo, amaddeamni vhittimin 'si' asta. Ho jin'nos promannantuch khaunk zai. Chodd khalear mal poddpachi xokyotai asta. Tigpasarokem lonnchem korpachi pod'dot matxi kittkittichi axil'lean choddxe lok tem viktench ghetat. Dexbhor lonnchem korpache zaite karkhane asat. Tancheurovim somvsarobhor lonncheachi nireat zata.
Torekovar bhajeo, follam tea tea ritumni khub promannant zatat, ten'na tanchem lonnchem korop faid'deachem zata. Tatunt ghaltat tem mitth, hem lonnchem borem sthitint tigoun douropachem kam' korta. Vorsobhor tigpachem lonnchem chini matyechea bornneamni ghatlear chodd borem urta. Halim lonnchem korpache koyar mosale mellttit. Limbacho ros, tel zamv vhaitt vhinigor ghalun lonnchim kortat. Hea soglleank lagun lonnchem chodd temp tigta ani taka ruchuy bori yeta.
Chodd tep lonnchem tigun urpakhatir bornnechea tonddacher ek nitoll dhovo kopddo bandun, ti bornni meklle, suke suvater dourochi. Bornnentlean lonnchem kaddun astona tem sukea chomchean gheuchem.