Pedruchem Dusrem Potr

Romi

Pedruchem Dusrem Potr

Second Epistle of Peter

Pedruchem Dusrem Potr

Hea Dusrea Potrant Pedru aplea Poilea Potrachi ani tantum dil’le xikovnnechi khobor korta. Hem Dusrem Potr chodd korun dhaktte Aziechea teach Kristi Sobhank boroilam-xem dista. Tanche modem khotte xikovpi, xastr-virodhi ani fottovpi upraslole, dekhun tannem hem Potr boroilem. Tanchem borem sugunni jivit ibaddun ani Jezu Kristachea dusrea iennneacho ani sonvsarachea xevottacho bhavarth soddun, te khotte xikovpi tankam khotti sot’tea bhasaitale. Tanche khotte xikovnnen upraslolea prosnank Jezuk khaza polel’lo ani aikol’lo tea govaiam koddlean mellta : he ki Devachi ani somia Jezuchi visvas favo asloli khori vollokh ditat. Hea Potracho xevott mhollear tea Kristi sobhanchea bhavam-bhoinnincho bhavarth ghott korunk ani khottea xikovpianchea chopkeant poddona zaunk tankam rakhuk.

Hem Pedruchem Dusrem Potr ani Judachem Potr itlim ekamekak lagim asat, ki Pedru aplea sangati Dhormdutachem Potr vollkhotalo ani tachea kolponancho tannem upeog kelo mhollear zata.

Hea Potracho boroinnar apnnakuch “ Simanv Pedru, Jezu Kristacho sevok ani Dhormdut” mhonntta. Apun somia Jezuchea rupantoracho khaxa govai mhonn sangta, ani Pauluk aplo mogacho bhav mhonnun lekhta.

Hem Potr kedna ani khoi boroilem tem 1/13-15 hea vollintlean gomun ieta. Aplem moron lagim pavlam mhonn Pedru zanno. Pedru Roma xarant rogtsakxi kozo melo mhonnttoch, hem Potr tannem 66-67vea vorsa Roma thaun boroilem mhonn mhonnunk zata.

Punn hea Potracho khoro boroinnar konn ? Khud Pedrun tem boroilam, vo tachem nanv gheun anink konnem tem boroilam zait ? Pedruchea Poilea Potrache Prostavnent he vixim ami sanglam tem hanga-I lagta.