Timotak Pauluchem Poilem Potr

Romi

Timotak Pauluchem Poilem Potr

First Epistle to Timothy

Timotak Pauluchem Poilem Potr

Paulun Timotak boroil’lea don Potrank ani Titak boroil’lea Potrak “Gonvllik Potram” mhonnttat, kiteak tannem tim eke povitr-sobhek nhoi, punn tichea vhoddilak vo gonvlliak boroilim; hannem ti bore bhaxen cholounk taka uzvadd ani vat dakhounk Paulun tim boroilim. Him tinui potram rupan toxem vixoiamnim ekamekak khub lagim asat.

Timot Likaoniechea Listrantlo aslo; tacho bapui Grik ani tachi avoi Judev. Povitr Pustok vachunk taka xikxonn dil’lem. Paulu poile pavtti Listrant ailo tedna, Timotan toxench Eunike tache avoin ani Loixen tache xamain Jezuk Devan bhasailolo Krist Soddvonnar mhonn bhavarthan manun ghetlo. Tea somoiar Kristanvamnim Pauluk Timotachi bori khobor sangloli, ani aplea dhormporgottnnechea vavrant Paulun taka aplo sangati zaunk vinchun kaddlo. Timotachi sunot korunk nasli; punn atam, Frijiechea Judevamnim Timotachea tonddantli Kristi dhormachi porgottnni sompeponnim manun gheunche khatir, Paulun tachi sunot keli. Hea uprant, khub pavtti, Timot Paulu sorxilo pois aslo. Ani avghodd ani chodd molachim kamam Paulun ozun tornnea Timotachea hatant sompoilim. Pauluk poile pavtti Romak bondkhonnint ghalo tedna, Timot aplea guru borabor aslo.

He bondkhonni uprant, Pauluche nimanne dhormporgottneche bhonvdder, Timot tache borabor gelo ani Efezache povitr-sobhecho karbhar cholounk Paulun taka thoi dovorlo.

Hea Potrant don chintnam amkam melltat : Timotan kalljidarponnan khottea guruncher zhuzunk zai, ani povitr-sobha bore manddavollin sthapun haddpachem kam’ xitaben korunk zai. Pauluchem mon hea don-ui vostuncher ghunvta, karonn thoi khub sonkoxtt asle mhonn taka onnbhov aslo.