Zannvaie hem Pustok

विकिपीडिया कडल्यान
Jump to navigation Jump to search

Zannvaie hem Pustok[बदल]

Book of Wisdom

Zannvaiechem Pustok, ak’khea Adlea Korarantlea pustokam modlem, ekuch mul-boroupan Grik bhaxen boroilolem pustok. Choddxe zannar Kristi-iuga adim poilea xenkddeant tem Ejiptachea Alexanddria xarant uzvaddak ailam oxem mhonnttat. Dubava viret, Grik sonvskrutai ani totv-gonean apnnailolea ani Grik bhaxen ani vatavoronnant vaddlolea eka Judev bhavarthean tem boroilam. Nhoich onbhavartheank khori zannvai xikounk punn aplea Judev purvozancho nix bhavarth sanddun ghel’leanchem mon-bodlop korunk – ho mukhel hetu hea boroinnaracho. Patxai Solomonachea nanvan to uloita vo apli xikocnn Solomonache tonddim to ucharta. Heach khatir “Solomonachi Zannvai” – hem dusrem nanv hea pustokak asa.

Tin mukhel bhagamnim tem vanttlolem amkam mellta ani tantunt tacho mukhel sondex ami vollkhunk pavtanv :

1. Zann. 1-5 : Devache ievzonnem mon’xacho xevott Promanikponnan jieunk soglleank ulo. Noxtte monis bores mon’xank dogdavnni ditat; aplem sonvsari jivit fottkire moujen sarun ani tench aplo xevott mhonn somzun, promannik mon’xank chepoun dovrunk ani piddapidd diunk te bharim vavurtat. Borea mon’xanchem moron tancho sotianas mhonn te pixe ani noxtte somzotat. Punn khorench mhonnlear promannik mon’xanche otme Devachea hatant asa (3/1). Borea ani satvik mon’xank mornna uprant omor jivit ani mhoimecho mukutt Dev tankam ditolo. Mon’subidar Deva mukhar te noxtte odhormik ani vaittove monis thortortolet. Mon’xachea nimannea xevottacher, Job ani Upodexok – hea pustokamnim mello naslolo zobab Zannvaiechea Pustokant amkam mellta : “ Promannikponn sodanch omor” (1/15); “aplo kall bhorche adim porian, sugunni monis morot tor, taka visov melltolo” (4/7); “promannik sasnnak jietat, Dhoni tankam inam’ ditolo, ani Sorvespor tanchi rakhonn kortolo” (5/15); “ mon’xam mukhar dogd sonsle zalear-ui omor jivitachea bhorvanxean bhorleant tanchim kallzam” (3/4); ‘ bhangar ujeant ghalun topastat toxem Devan tankam topaslim, ani homachem orponn koxim tankam manun ghetlim” (3/6); “Devan mon’xak omor kelo, apnnachea soimba sarko taka rochlo” (2/23).

2 Zann. 6-9 : Solomon patxai niz Zannvaiechi sodpus korta. Sorv razank khori zannvai apnnaunk ulo korta (6/1-11); Raj cholovpeank ti chodd gorjechi mhonn sangta (8/9-16). Tika mogan ani mhenotin sodtoleank ti melltach (6/12). Solomon zannvaiek vakhann’ta (7/22-30); Dusrea mon’xam bhaxen Solomon ek vinaxi monis (7/1). To Zannvaiek man dita ani bholaike, sobitaie ani girestkaie poros tannem ticho chodd mog kelo mhon ani heach khatir tiche borabor soglleo boreo vostu apnnak mell’lleo mhonun to khatri dita (7/7-11; 8/2-8). Hea dusrea bhagachi ut’tom tengxi 9vea ovesvorant amkam mellta : Zannvai mellunk Solomonanchem magnnem.

3. Zann. 10-19 : Hea nimannea bhagant Devache Soddvonnechea Itihasant Zannvai koxi vavurta tem amkam spoxtt zata. Adanva thaun Moizesa meren ani kheritponnim vinchun kaddlole porjeche suttke somoiar Devache Zannvaien koutik vismitam kelim. Israel porjecher zulumxai choloitolea Ejiptkarancher dhaddlolea khastincher nihall ani he vir-khothe somoiar Devachi ojapvont manddavoll ani sasai amkam dakholl zatat (11/2-16; 12/23-27; 15/18-19/22). Hea dhormik nihalla modem Devache sonsnnikaiechi ani kakutichi khobor amkam mellta (11/17 – 12/22): tech porim kuddea devanche, murteanche pujechi vikottai ani kanttallo ani murtipuza kortoleanchem khud pixeponn ani vhodd noxtteponn hea tisrea bhagant amkam spoxtt zata.

Polleiat[बदल]

ह्या विषयावयर देवनागारींत बरयिल्लें पान वाच : जाणवाये हें पुस्तक


Sandarbh[बदल]


[1]

[2]

  1. http://www.usccb.org/bible/books-of-the-bible/index.cfm
  2. http://www.archgoadaman.org/bible/14
"https://gom.wikipedia.org/w/index.php?title=Zannvaie_hem_Pustok&oldid=170102" चे कडल्यान परतून मेळयलें