Obadia achem Pustok

विकिपीडिया कडल्यान
Jump to navigation Jump to search

Obadia achem Pustok[बदल]

Book of Obadiah

Prophet Obadiah Basilica of St. John Lateran


Provadanchea pustokam modem, OBADIA hem soglleam poros lhan pustok ani toxench tem Adlea Korarantlea pustokam modem lhan zaun asa. Hea pustokant fokot ekvis slok asat. Obadia mhollear ‘Sorvesporacho chakor’.

Povitr Pustokant, Edom’ ani Israel hance modem zalolea poromporik dusmankaiechi khobor kelea. Hi dusmankai khub adli, mhollear Esau ani Jakob hea Izakachea putam thaun suru zaloli. Itlench nhoi hi dusmankai Utpotichea pustokant (25:23) bhakit kelam tea pormannem Rebekachea kusveant thaun suru zaloli. “Don raxttram tujea kusveant asant ani tuje thaun zolmotolim don kullam doxim zatolim.”

Edomitkar, Esauachea vounxantle zalear Israelitkar Jakobachea vounxantle mhonn mandun ghetat. Suttkechea kallar Edoman Israelitank bhair sorpacho rosto bond kelo ( Lok. 20 : 14-21). Edom’ ani Israela modem zhuzam zaleant tachi khobor Dusri Somurt, 2Samuel, 1Itihas, 1 Raza, 2Raza hea pustokamnim vachunk mellta. Vilapachem pustok Edoma add arop manddta. Ho fattlo itihas monant dhorun hem pustok vachunk zai. hem pustok khub prosnamnim bhorlolem asa. Obadiachea bhakitant don vixoi asat :

1) Edomak khast (1 – 15) – Edomache guneanv dakhoileat ani kosli khast favo zatoli tem sanglam. Dekhik : Tunvem tujea bhava Jakobak kel’le zobordosti khatir, tum lojen bhortoloi ani sorvkallak tujem nisontton zatolem. (1/10).

2) Sorvesporacho Dis ietolo tedna Israel Edomachi sudd ghetolo (15, 16-18) mhonn ‘Sorvespor uloila’. Punn pollun geleant tim Sion dongrar ravtolim ani to zatolo ek povitr sthan. Jakobachem Ghorannem hok’kan aplem daiz tem novena aplea hatant ghetolem. (1/17). Esauchea Porvotacher raj choloupak, zoitivont zaun Sion Porvot choddtolim ani sogtta-sorvancho odhikar Sorvesporacho zatolo. (1/21). Gorvachem nisontton zatolem ani atmsontushtt’taiecho ( complacency) nas zatolo mhonn Obadiachea pustokant xikounn mellta. Jim konn Devak soddun dusreancher visvas thevtat tanchem nisonnton zatolem mhonn Obadiachea pustokant spoxtt zata.

Tujea gorvixtt kallzan tuka fosoilo. Tum khoddpachea khanchimnim jietai, unch zagear tthikann korun asai, tujeach monant mhonnttai : ‘Konnachean mhaka khala zomnir uddounk zata ?’ Zorui ghonni bhaxen tum unch-unch uddtai, zorui noketram modem tunvem tuzo ghontter kelai, torui thoim thaun Hanv tuka khala haddtolom! – uloita to Sorvespor ! (1/3, 4).

Hea pustokant, bhav-bhoinnim koxim mogachea sombondan jieunk gorjechem tachem mhotv dakhoilam. Edom’ aplea bhava Jakoba sovem krurtaien vaglo ani jedna Jakobachem luttun vhortale tedna tannem tachi porva keli na punn portench zalear to tea vixim khuxal zalo. Dekhun Sorvesporan taka khast laili.

Jea disa porkea mon’xamnim tachi girestkai kaddun vheli, ani tachea darvontteantlean bhitor sorun videxiamnim Jerusalea vixim sorti ghaleo, tea disa tum pois ubo ravloi dekhun tum-I tanche sarkoch vaittovo zaloi. Tujea bhavachea durdoivachea disa tacher nodor ghalun tuje dolle dhadoxi kori naka. Judachea putam-dhuvanchea nisonttonachea disa tanche vixim tunvem boddai ulounk favo naslem. Hal-upodreanchea disa tunvem suki boddai ulounk favo naslem. (1/11, 12). Karonn sogllea raxttrank Sorvesporacho Dis lagim pavla. Tuvem kelai toxem tuka kel’lem melltolem; tujim kortubam tujea mathear poddtolim. (1/15).

Polleiat[बदल]

Obadia achem Pustok

Book_of_Obadiah

Devachem Utor - Povitr Pustok

Books_of_the_Bible

Bible

ह्या विषयावयर देवनागारींत बरयिल्लें पान वाच : औबादया आचें पुस्तक


Sandarbh[बदल]


[1]

[2]

  1. http://www.usccb.org/bible/books-of-the-bible/index.cfm
  2. http://www.archgoadaman.org/bible/14
"https://gom.wikipedia.org/w/index.php?title=Obadia_achem_Pustok&oldid=169997" चे कडल्यान परतून मेळयलें