Ruzai Saibinn

विकिपीडिया कडल्यान
 
Romi
     
Madonna with Rosary, South-Tyrol, Austria
The most commonly known format of the Rosary, flanked by the Bible and a free-standing Crucifix.
Nuestra Señora del Santisimo Rosario
Our Lady of Lourdes with Rosary beads
Bernardo Cavallino - La Visione di San Domenico (anni 1640)

Our Lady of the Holy Rosary

Oktobrache 7ver akhea sonvsarant Ruzai Saibinnichi porob somorombhtat. jednam 7ver Oktobrache 1571 vorsa Kristi foujen Lepanto zhusant Turkiche foujecher zoit vhelem tednam tea kallachea Pio Vvea Pap Saiban Ankvar Marieche upkar atthovnk hi porob porgott keli. 1716 vorsa Kunvor Eugene ani tache foujen Hungary desant teach dusmanacher loddai korun zoit melloilem tea somoiar hi porob akhea sonvsarache Povitr Sobhek ti porgott keli. Leanv XIIIvea Pap Saiban Oktobracho mhoino Ruzai Saibinnik bhettoilo.

Ruzai hea utracho orth mhonnlear Rozanchi vo gulabanchi bag (garden of roses). Jednam ami Ruzaichem magnnem mhonntana “Noman Marie” mhonntanv tedna Saibinn Mariek ek bhaxen ami ek ek rozachem ful bhettoitanv ani amcho mog tiche sovem ami dakhoitanv. Roz zavn asa sogllea fulam modem sobit ani soglleam fulanchi ranni. Oxem astam Ruzaichem magnnem soglleam bhoktanchem roz amchean mhonnum ieta.

Ruzaichem magnnem zavn asa ek sopurnn magnnem karann tantunt ami amche soddvonnecho mukhi gutt nialltanv. Eke bhaxen Ruzaichea magnneant amkam Novea Koraracho atthap mellta. Ho Novea Koraracho atthap chear bhagamni vanttlolo asa. Sontosacho bhag, Uzvaddacho bhag, Dukhincho bhag ani mhoimecho vo onodacho bhag. Dor ek bhag panch guttamni vanttlolo asa. Oxem mellun soglle vis soddvonneche gutt ami Ruzaient nialltanv.

Atanchea kallar zaiteam zannamcho oso somoz asa. Ruzaichem magnnem ami kitak korunk zai ? Ruzaichem magnnem ami kiteak korunk zai ? Povitr Misache bhettent ani her Sonvskaramni vantto ghetanv to puro. Her zann mhonntat ki hea magnneant porot porot tinch magnnim ami uchartanv ( prayer of repetition ) ani hem magnnem magir “ monotonous” zata. Bisp Fulton Sheen tea vichara voir aplea jivitantli ek ghoddnni sangta. Ek dis tachexim ek ostori aplea magiak (fiancé) ghevn aili ani rozarachea magnneam vhoir oxem mhonnunk lagli : “Ruzaichea magnneant ami porot porot tinch utram uchartat ani zo konn porot porot tinch utram ucharta to ek fottkiro. Zo monis porot tinch utram mhonnta taka hanv kednanch sotmancheak na”

Bisp Sheen-an tiche kodde vicharlem : “tuje borobor aila to monis konn?” Tinnem zabab dilo; “to mhozo mogi” “to tuzo mog korta ?” Oxem Bispan vichar ghalo tedna tinnem mhonnlem “ “Dubhavinn to mhozo mog korta”. “Hem tuka koxem kollun ailem ?” tannem fuddem vicharlem. “Tannnem mhaka sanglam” oxem tinnem sott korun sanglem. “Tanem tuka kosleam utramnim apunn mog korta mhonn sanglam ?” Bispan vichar kelo. Tinnem sanglem “Hanv tuzo mog kortam”. “Tuka tannem oxem nimannem kednam mhonnlam ?” “Sumar ek hor zalem”. “Tache poilem oxem tannem mhonnlolem?” “Hoi, kalche ratri mhonnlolem”. “Tannem tuka kitem mhonnlolem?” “hanv tuzo mog kortam.” “Ani tache adim kednam tori apunn mog korta mhonn sanglolem?” “Dor disa to mhaka mhonnta.” “Toxem zalear” Bispan fuddem mhonnlem, “taka tum sot mandinaka. To porot tinch utram mhonnta. To fottkiro”.

Sot mhonnlear jitle pauvtti ek monis dusream sovem apunn mog korta mhonn sangta title pavtti eke nove bhaxen aplea mogachi thiravnni (assurance) korta. Tech bhaxen jitle pavtti ami Ruzaichea magnneant tinch utram uchartanv titlei pavtti amche Sorginche Maie sovem amcho mog thiraitanv ani amche sombond tiche sovem vaddoitanv.

Ruzaichea magnneantlean Saibinnichi itli ami bhokti kortanv ani tika ami man ditanv zalear hea magnneantleam Jezu tichea Putacho zago khoim asa? Marie adim Jezuk poilo man diunk zai. khorem mhonnlear Ruzaichem magnnem Jezuchea jivita, mornna, jivontponnacho ani sorgar choddnneacho atthap zavn asa. Jednam ami ‘Amchea Bapa’ ani ‘Noman Morie’ mhonntanv tednam amchem dhean mon je soddvonneche gutt uchartanv tacher asunk zai. Ani tacher amcho nihall zaunk goroz.

Jezuchem jivit amcheam dolleam samkar dovrun Mariechea sangata ani tiche udexim Jezu mukha amche anvdde ani otrek ghalunk zai. Tiche vinnovnnen maglem zalear Jezu tika kednanch na mhonnchonam. Zoxem Tannem tichea utrak Kana ganvant udok aslem to soro korun aplem poilem vizmit kelem.

Jitle pavtti Saibinn Mai mon’xak dixtti poddli titlei pavtti tinnem Ruzaichem magnnem sonvsarant xanti haddunk vaprunk sanglem. Teach borobor Ruzaichem moladik hatiar vaittacher zhuzunk ani amchem povitrponn ani bhagevontponn zoddunk ho kherit upai mhonn ugddas kela. Amchea khasgi, familichea ani somudaik tersa udexim Ruzai Saibinnichi bhokti vistarunk ani he bhokte udexim amchem ani sonvsarachem bhagevontponn zoddunk hi rozanchi bag ami ximpum-ia, tichi opurbai korum-ia.

Polleiat[बदल]

"https://gom.wikipedia.org/w/index.php?title=Ruzai_Saibinn&oldid=199913" चे कडल्यान परतून मेळयलें