Utpoti chem Pustok
| |
Romi
|
|
Utpoti chem Pustok
[बदल]Genesis
Ak’khea Povitr Pustokantlem toxench somurtintlea (Pentateuk) panch pustokantlem poilem pustok.
Hebrev bhaxen tachem survatechem utor bereshit (orombak) ani Grik Septuagint Bhaxantoran “Genesis” – hea mathallean tachem nanv. Him kherit utram utpoti pustokak ak’khea orombanchem pustok mhonn khatri korta : Oromb ak’khea sonvsaracho ani moniskullacho. “Orombak Devan sorg ani prithum rochlim” (Ut. 1/1; 2/4). Oromb patkacho ani sorv vaittacho, oromb jin’nos porzancho, sonvskrutaiancho ani bhasancho; oromb veg-vegllea vaura-dho’deacho, vad-vivadacho ani zhuzacho; oromb mornnacho (!) Ho vixv dekhavo kherit orombacho, Utpotichea poilea bhagant amkam dakholl zata (Ut. 1-11). Dusrea bhagant (Ut. 112-50) Hebrev porjecho oromb tichea mullpurvozam koddlean amkam kollit zata : Abranv, (12-25), Izaak ani Jakob (26-36) ani hacho put Juze (37-50). Hea kuttubancho Itihas, Sorvespora Devachi soddvonnechi Ievzonn, tachi Bhasavnni ani Vinchun kaddop amkam thavem korta.
Zaum sorga ani prithumecho Dev-rochnnentlean zaum Patriarkanchea rong-rongit ani vichitr Itihasantlean zaite dhormik vixoi ani xikounn amkam spoxtt zatat. Te mhollear : Dev sasnnak jieta ni to orom ani xevott sogllea vostuncho; sogllea rochnnam modem monis Devache vhodd opurbaiecho; Aplea sarkeachim ani rupachim Devan dadleak ani bailek rochleant; Dev- Rochnnenchi zannvai ani podvi, tachi vichitr manddavoll, lognanchi sthapnni, udhar kallzan mon’xak dil’lem dennem, mhonnge khur sot’tea; mon’xachem mull patok ani Devachi khast; gorvan bhorlolo monis Devache nem-kaide pallunk raji na, toriastana Dev taka patkantli soddvonn bhasaita: Devachi sasai – ani mon’xacho bhorvanso. Dev mon’xacher axirvad ghalta ani aplea koraram vorvim aplea ekvottan jieunk taka portun-portun apoita. Kheritponnim Abrahamak tachea thir ani nix bhavartha pasot aplea axirvadan bhorta ani Tacheach kuttumbantlo ietolea Messiasa vorvim sogllea raxtttrancher ani ak’khea monis kuttumbacher vhoddantlo vhoddlo axirvad ghalta.
Aplea jivea sobdantlean Dev ak’kho sonvsar rochta. Tachem utor mhollear ek adnia, ek Bori khobor, ek bhasavnni aplea sangata ani aple ixttagotint jieunk dor-eka mon’xak ek mogachem amontronn. Mon’xan Devachem Utor svikar korunk goroz, ani khaltikaien Tachi adnia pallun, Devache soddvonnechi ievzonn ani Itihas hea sonvsarant fuddem vhorunk mon’xachi zobabdari.
Purvilea laginchea udentichea purannantlea jin’nos khotancho vapor korun tech porim xenkdde pottim muttumbamnim tonddim sangil’lea korinam / poromporam udexim, hem Utpotichem pustok uzvaddak ailam. Veg-vegllea sahitik ani dhormik poromporanchi nimanni sompadni korunk povitr boroupeak sumar panch xenkdde lagle (X-VI Krist Uga adim).
Polleiat
[बदल]https://en.wikipedia.org/wiki/Book_of_Genesis